Fepuari

Ua Aoao Mai e Tusitusiga Paia le Fuafuaga a le Tama Faalelagi

Pese: “O Le a Ou Mulimuli i le Fuafuaga a le Atua”

(TT, 86–87)

“Faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: E i ai se fuafuaga a le Tama Faalelagi mo au.

Faailoa atu le aoaoga faavae: Faaali i tamaiti se ata o se fale. Faamatala atu e manaomia e tufuga faufale se fuafuaga [ata] o le fale a o lei fausiaina se fale. Fesili, “Aisea e taua ai le fai ma mulimuli i fuafuaga?” Uu i luga tusitusiga paia, ma tau atu i tamaiti e mafai ona tatou maua le fuafuaga a le Tama Faalelagi mo i tatou i tusitusiga paia. Tusi i luga o le laupapa “E i ai se fuafuaga a le Tama Faalelagi mo au.” Faitau faatasi le fuaiupu.

Uunaia le [agaga] malamalama (usuina ni pese): Tusi fesili nei i luga o le laupapa:

• O ai au?

• O fea na ou sau ai?

• Aisea ua ou i ai iinei?

• O le a le mea o le a tupu ia te au pe a ou oti?

Tuu i tamaiti taitasi se fasi pepa o loo tusia ai se tasi o upu nei: o ai, o fea, aisea po o o le a. Faitau faatasi le fesili muamua o loo i luga o le laupapa, ma fesili i tamaiti uma o loo uuina le upu o ai e tutu i luga. Usu le pese “O Au o se Atalii o le Atua” (TT, 2–3), ma fesili i tamaiti o loo tutu pe faapefea ona latou taliina le fesili. Toe fai mo fesili taitasi, ma faaaoga ai pese nei: o fea: “Ou te Nofo i le Lagi” (Liahona Ape. 1999, 5); aisea: “O Le a Ou Mulimuli i le Fuafuaga a le Atua” (TT, 86–87); o le a: “Pe na Toe Soifua Moni Mai ea Iesu?” (TT, 45). Molimau atu o le fuafuaga a le Tama Faalelagi o le a aumaia ia i tatou le fiafia.

A boy holding up a picture in the Gospel Art Book.

Faamalosia le malamalama: A fetufaai atu e tamaiti mea latou te aoaoina i le Peraimeri i isi, e faamalolosia ai o latou malamalamaaga ma molimau e uiga i le aoaoga faavae. Mafaufau e tuuina atu ia i latou ni avanoa e fai ai lenei mea i le vasega, ma uunaia i latou e faasoa atu mea na latou aoaoina i o latou aiga.

Vaiaso 2: Na foafoaina e Iesu Keriso le lalolagi mo au.

Uunaia le [agaga] malamalama: Talatalanoa ma tamaiti i mea latou te faia e i ai se faasologa e fai ai, e pei o le nonoaina o se seevae po o le sauniuni e moe. Faamatala atu o totonu o tusitusiga paia tatou te aoao ai o Iesu na foafoaina le lalolagi i se faasologa faapitoa. Vaevae tamaiti i ni vaega se ono ma tuu atu i vaega taitasi se mau faasino o loo faamatalaina ai se aso se tasi o le Foafoaga (tagai Mose 2). Fai atu i vaega taitasi e tusi ata o a latou aso. Tuu atu ia i latou e faaali a latou ata i isi tamaiti ma faamatala atu ia i latou mea na foafoaina i lena aso. Valaaulia tamaiti e faapipii ia ata i le faasologa sao i luga o le laupapa.

Uunaia le faaaogaaga: Fesili atu i tamaiti, “O le a le mea e tasi na foafoaina e Iesu e taua ia te oe?” Tuu atu i tamaiti taitasi sina potoi faamasima (tagai AALVSA, 174, mo le fua o le potoi faamasima). Tuu atu i tamaiti e faaaoga le potoi e fai ai le foafoaga lena e taua ia i latou. (Afai e le maua le potoi faamasima, e mafai e tamaiti ona tusia se ata.) Tuu atu i tamaiti e faasoa ia latou vaega i vasega po o le a le mea na latou faia pe na tusia ma pe aisea e taua ai ia i latou. Usu le pese “E Alofa Lo’u Tama Faalelagi ia te Au” (TT, 16–17).

Molimau: E mafai e se molimau puupuu ona valaaulia le Agaga i soo se taimi a o faia le lesona. E mafai ona faigofie e pei o le faapea atu, “Ou te iloa o le a aumaia e le fuafuaga a le Tama Faalelagi le fiafia ia i tatou,” pe e mafai foi ona fai o se molimau e sili atu le aloaia e aofia ai le gagana e pei o le “Ou te fia tuuina atu la’u molimau.” (Tagai AALVSA, 45–46.)

Creation Picture

Creation picture

Creation Picture

Vaiaso 3: O aiga e totonugalemu i le fuafuaga a le Tama Faalelagi.

Faailoa atu le aoaoga faavae: Tusi le fuaitau lea i luga o le laupapa: “O aiga e totonugalemu i le fuafuaga a le Tama Faalelagi.” Talanoa i le uiga o lenei fuaiupu. Tape le fuaiupu. Faaleo atu upu muamua e lua, ma fai atu i tamaiti e toe fai mai. Ona faaleo lea o upu muamua e fa, ma fai atu i tamaiti e toe fai mai. Faaauau seia mafai e tamaiti ona toe fai mai le fuaiupu atoa.

Uunaia le [agaga] malamalama: Vave faatonu tamaiti e fai ma sui o aiga mai tusitusiga paia. Saunia ni faaataataga e faatatau i aiga taitasi (mo se faataitaiga, Atamu ma Eva: “O lo matou aiga o le aiga muamua lea i le lalolagi”; Aperaamo ma Sara: “Na ma matutua lava faatoa maua se ma tama”; ma Liae ma Sarai: “Na matou asaina le vasa laolao ina ia oo atu i le nuu folafolaina”) ma tuu atu i tamaiti ia faaataataga. Saunia ni togiga faigofie, pe a tatau ai. Fai atu i tamaiti o e o fai ma sui o aiga faatusi paia e o mai i luma o le potu, auaua’i taitasi mai vaega. Tuu atu ia i latou e faitau a latou faaataataga ma fesili i isi tamaiti o le Peraimeri e mate mai po o ai o loo latou sui ai. A maea ona faailoa aiga taitasi, faaali i tamaiti le mea e mafai ona latou aoao ai e uiga i lenei aiga i totonu o tusitusiga paia. Tau atu i tamaiti auala na mulimuli ai ia aiga taitasi i le fuafuaga a le Tama Faalelagi mo i latou.

A woman leader standing with two children dressed in Biblical costumes in Primary sharing time.

Uunaia le faaaogaaga: Tuu atu i tamaiti e mafaufau i uiga lelei o loo maua e o latou aiga. Valaaulia i latou e fefaasoaai i le tasi i le isi nei uiga taua i vaega po o le Peraimeri atoa.

Fetuunai gaoioiga e tusa ai ma vaitausaga o tamaiti i lau Peraimeri (tagai AALVSA, 114–24). Mo se faataitaiga, i le gaoioiga lona lua o le vaiaso 3, e mafai e tamaiti matutua ona fesili i vaega i ni fesili o le ioe ma le leai nai lo le faalogo i faaataataga e uiga i aiga faaletusi paia o loo latou sui ai.

Vaiaso 4: O le a ou mulimuli i le fuafuaga a le Atua.

Uunaia le [agaga] malamalama: Faaali atu ni fatu pi po o ni maa laiti ma se fagu o tusi ai se foliga fiafia. Ta’u atu i tamaiti o le fuafuaga a le Tama Faalelagi ua tuuina mai ia i tatou le saolotoga e filifili ai le sao po o le sese. Faamatala atu o filifiliga lelei o le a taitai atu ai i le saolotoga ma le fiafia, a o filifiliga leaga o le a taitai atu ai i le nofopologa ma le faanoanoa (tagai 2 Nifae 2:27). Fesili i tamaiti, “O a poloaiga e te tausia pe a e mulimuli i le fuafuaga a le Atua?” Tuu atu se fatupi i tamaiti taitasi e tali mai i le fesili. Tusi a latou tali i luga o le laupapa. Fesili atu i tamaiti taitasi o loo i ai se fatu pi e faasoa mai pe faapefea ona taitaiina atu o ia i le fiafia i le tausiaina o le poloaiga na ia ta’u maia. Ona fai lea i le tamaitiiti e tuu lana fatu pi i totonu o le fagu. Molimau atu o le a tatou faatumuina o tatou olaga i le fiafia pe afai tatou te filifili e mulimuli i le fuafuaga a le Atua.

2016 Outline for Sharing Time/Children's Sacrament Meeting Program

E maua fu’a i le sharingtime.lds.org

O le a ou mulimuli i le fuafuaga a le Atua a ala i le:

Uunaia le faaaogaaga: Saunia se fasi pepa lapoa i le foliga o se fu’a mo vasega taitasi. Tusi i luga o fu’a taitasi “O le a ou mulimuli i le fuafuaga a le Atua e ala i le …” Faamalamalama atu o le fuafuaga a le Tama Faalelagi ua tuuina mai ai ia i tatou le saolotoga e filifili ai le sa’o po o le sese, ma e taua i lo tatou fiafia le mea o le a tatou filifili e fai i aso uma. Tuu atu i tamaiti e galulue o se vasega e tusi i luga o a latou fu’a ni ata po o ni mea e mafai ona latou faia e mulimuli ai i le fuafuaga a le Tama Faalelagi, ma valaaulia i latou e saini ai o latou igoa. Fai i vasega taitasi e faamatala mai a latou ata ma mea na tusia i luga o a latou fu’a. Fai i tamaiti e savavali faataamilo i le potu a o uuina a latou fu’a ma usu le pese “O Le a Ou Lototoa” (TT, 85). Faapipii ia fu’a i totonu o le potu o le Peraimeri.

Children standing in a line at the front of the Primary room. Some of them are holding banners.

Taulai atu le malosi o tamaiti e ala i gaoioiga talafeagai e faatumauina ai lo latou auai punoai.

A glass jar containing dry beans. A smiling face icon is attached to the outside of the jar.

E maua foliga fiafia i le sharingtime.lds.org