“Mga Kapanguhaan sa Simbahan alang sa Paglaom ug Tabang,” Liahona, Abr. 2025.
Mga Kapanguhaan sa Simbahan alang sa Paglaom ug Tabang
Ang Simbahan naghatag og daghang kapanguhaan alang niadtong kinsa nakigbisog sa mga hagit sa kahimsog sa pangisip, ingon man alang sa ilang mga minahal ug sa mga lider.
Mga paghulagway pinaagi ni David Green
Namatikdan sa usa ka therapist sa Chile nga daghang tawo sa iyang branch ang murag naguol ug nag-inusara, ilabi na atol sa mga bulan sa tingtugnaw.
Mentras, sa dihang gipangutana mahitungod sa mga hagit sa iyang lugar sa South Africa, ang usa ka therapist naghisgot sa pagkaadik ug sa ekonomikanhon nga mga kalisod.
Ug gipadangat sa usa ka therapist sa Portugal kon sa unsang paagi ang presyur sa social media ingon og nakatampo sa dakong kabalaka sa mga batan-on nga iyang nailhan.
Ang mga hagit nga sama niini anaa hapit sa tanang dapit, dili ba? Tinuod, ang pipila ka piho nga mga pagpamugos [pressure] ug mga makaugtas mahimong talagsaon ngadto sa usa ka kultura o kahimtang. Apan sa daghang mga paagi, ang mga sundanan sa mga hagit sa kahimsog sa pangisip malukpanon.
“Importante nga hinumdoman nga kita buhi—ug mipili nga magpakabuhi—sa nalaglag nga kalibotan diin ang atong balaanong mga katuyoan sa tinguha sa pagka-diosnon kanunayng pagasulayan,” miingon si Presidente Jeffrey R. Holland, Akting nga Presidente sa Korum sa Napulog Duha ka Apostoles.
Nakasabot niini, ug nasayod nga si Jesukristo mao ang Gamhanan nga Tig-ayo, ang mga propesyonal sulod sa Simbahan nakamugna og mga kapanguhaan sa kahimsog sa pangisip aron matabangan ang mga miyembro nga makonektar ngadto sa paglaom ug tabang. Kini nga mga kapanguhaan miila kon unsa ang atong nasabtan sa siyentipikanhon nga paagi mahitungod sa kahimsog sa pangisip ingon man kon unsa ang atong nasabtan sa espirituhanon nga paagi mahitungod sa mga kamatuoran sa ebanghelyo.
Kon kamo man nakigbisog o wala sa pagkakaron sa pagbati nga maayo sa emosyonal nga paagi, kini nga mga kapanguhaan angay nga susihon. Malagmit, usa ka tawo nga kamo adunay impluwensiya nakigbisog matag karon ug unya. Pinaagi sa pagsabot sa sitwasyon ug kon unsa nga tabang ang anaa, mas masangkapan kamo aron mahimong tubag sa ilang mga pag-ampo. Ug kamo malig-on diha sa proseso.
Tabang sa Kinabuhi
Diha sa Librarya sa Ebangheyo, ang Simbahan naghatag og daghang kapanguhaan alang niadtong kinsa nanlimbasog, ingon man usab alang sa ilang mga minahal ug mga lider.
-
Diha sa Librarya sa Ebanghelyo nga app, pangita og tile nga gimarkahan og “Tabang sa Kinabuhi.” Tuploka kana aron ipakita ang nagkalainlaing mga hilisgotan, lakip ang “Kahimsog sa Pangisip.”
-
Sa ChurchofJesusChrist.org, tan-awa ubos sa “Librararya,” “Tabang sa Kinabuhi,” ug “Kahimsog sa Pangisip.”
“Daghang elemento ang makahatag og mga hagit sa mental nga kahimsog—kaliwat, palibot, makadaot nga mga aksidente, mga kahimtang sa kinabuhi, ug, usahay, mga pagpili,” gipahayag sa usa ka seksiyon. “Walay pagsapayan sa mga elemento nga nakatampo, kita makakuha og kalig-on gikan sa Manluluwas.”
Sa pipila ka pinulongan, makakita kamo og mga link ngadto sa mga numero sa telepono nga matawagan alang sa emerhensiya nga suporta sa tibuok kalibotan. Daghang nasod karon nagtanyag og libre, kompidensyal nga mga serbisyo pinaagi sa mga tawag sa telepono o sa mensahe sa text. Ang mga lider sa ward ug branch mahimong moawhag sa mga miyembro sa pagdugang niini nga mga numero ngadto sa ilang listahan sa mga kontak nga andam nga gamiton kon mobati sila nga anaa sila sa krisis.
Dugang pa, kini nga seksiyon sa Tabang sa Kinabuhi nagpakigbahin og tinuod nga mga istorya sa kinabuhi niadtong kinsa nakakaplag og kalinaw bisan pa sa emosyonal ug kahimsog sa pangisip nga mga hagit.
“Usa sa labing lisod nga mga butang mahitungod sa sakit sa pangisip mao ang imong pagbati nga nabulag gayod ug nag-inusara,” miingon si Eldon, kinsa nahiling nga adunay bipolar disorder.
Ang pakigkonektar ngadto sa mga therapist ug mga pagpatambal, pagdawat og gugma gikan sa mga higala, pagpahiangay sa mga gilaoman, ug pagkaandam sa pagdawat sa tabang sa Ginoo tanan nahimong mga himan nga gibuhat ni Eldon isip kabahin sa iyang panaw sa pagkaayo. “Makahimo ka og mas daghan pa kay sa mahimo nimo sa imong kaugalingon kon mosalig ka sa Manluluwas,” miingon siya.
Mga Serbisyo sa Pagbarog Pinaagi sa Kinaugalingong Paningkamot
Nakasulay ka ba nga gidapit sa pag-apil sa usa sa mga klase sa pagbarog pinaagi sa kinaugalingong paningkamot nga gitanyag sa Simbahan? Kining gamhanan nga mga panaghisgot sa grupo naghisgot sa mga hilisgotan sama sa personal nga panalapi, pagsugod ug pagpalambo sa negosyo, ug pag-angkon og edukasyon alang sa mas maayo nga trabaho. Adunay usa ka klase usab sa emosyonal nga kalig-on.
Makita nimo ang workbook diha sa Librarya sa Ebanghelyo ubos sa “Mga Basahon ug mga Leksiyon,” “Pagbarog sa Kinaugalingong Paningkamot,” dayon “Pagkaplag og Kalig-on diha sa Ginoo: Emosyonal nga Kalig-on.” Kini adunay mga kapitulo bahin sa pagbuntog sa kasuko, pagsabot sa depresyon, pagpalambo og maayo nga mga sundanan sa panghunahuna, ug daghan pa.
Sama pananglit, sa kapitulo 4, “Pagdumala sa Kaugtas ug Kabalaka,” inyong makita ang usa ka bidyo kon sa unsang paagi ang usa ka sister nga ginganlan og Olivia nakakat-on sa pagbuntog sa pagkamahingpit pinaagi sa pagsalig sa Ginoo. “Ang grasya sa Dios mao ang Iyang abilidad sa paghulip sa tanang butang nga dili nako mahimo—ang Iyang kaandam sa paghigugma nako sa tanan kong kakulangan ug kahuyang,” miingon si Olivia. “Ug ako naghupot lamang niana.”
Mahimo nimong pangutan-on ang imong mga lider sa ward o branch kon kanus-a kini nga kurso ipahigayon sunod sa inyong dapit, o bisitaha ang ChurchofJesusChrist.org/self-reliance?lang=ceb aron makat-on og dugang.
Tabang gikan sa Ubang mga Miyembro sa Simbahan
Tingali ang labing nindot nga kapanguhaan nga ikatanyag sa Simbahan mao kita! Kita makasiguro nga kita nagpalambo sa usag usa imbis nga magdinaotay sa usag usa. Usa ka paagi sa pagsugod mao ang pagtimbang-timbang sa atong kaugalingon nga mga pangagpas ug tingali sa mga sayop nga pagsabot bahin sa sakit sa pangisip.
“Ang mga isyu sa kahimsog sa pangisip sagad makita isip personal nga kahuyang o kaulawan sa pamilya, nga nagdili sa mga indibidwal sa pagpangita og tabang,” miingon si Yoonseok Kil, usa ka therapist sa Family Services sa Korea. “Ang mga tawo nabalaka nga sila mag-tubang og diskriminasyon sa katilingban kon sila mahibaloan nga adunay usa ka isyu sa mental nga kahimsog.”
Gitratar ba nato ang laing mga tawo uban ang kaluoy, nakaamgo nga kita wala gayod makasabot kon unsa ang ilang giagian? Motabang ba kita uban ang gugma, mapailobon nga mosuporta sa usa ka tawo latas sa ilang mga pagsulay ug mga hagit? Gipangita ba nato ang labing maayo sa uban imbes nga motutok sa ilang mga kahuyang?
Ang Simbahan naghatag kanato og daghang oportunidad sa pagpraktis niining Kristohanon nga mga kinaiya. Pinaagi sa pagserbisyo sa mga calling ug sa mga buluhaton sa pagpangalagad, ang matag usa kanato adunay mga kahigayonan sa pagdawat ug paghatag og tabang sa tibuok natong kinabuhi. Ang estruktura sa mga ward ug mga branch nagsiguro nga dili gayod kita mag-inusara sa atong mga hagit.
“Ang lokal nga mga lider anaa kanunay aron sa paghatag og suporta ug pagdasig kanato kon kita mangayo og tabang kanila,” miingon si Linda Opuene, usa ka therapist sa Family Services sa Nigeria. “Makahatag sila og espirituhanon nga giya, mainampoon nga suporta, ug mahimong mohatag og mga panabot o mga kapanguhaan nga piho sa atong espirituhanon nga panaw.”
Ang mga bishop mahimong makatabang sa mga miyembro nga makonektar sa pagtambag pinaagi sa Family Services sa pipila ka dapit o mag-refer sa mga tawo ngadto sa lokal nga mga magtatambag kansang mga binuhatan nahiuyon sa mga sumbanan sa ebanghelyo.
Gusto ni Sister Opuene nga dasigon kadtong nakigbisog sa mga isyu sa kahimsog sa pangisip, bisan og gibati nila nga gibuhat nila ang tanan aron magpabiling duol sa Ginoo. “Pagpabiling masaligon sa inyong hugot nga pagtuo ni Kristo ug ayaw pagduha-duha sa Iyang gugma alang kaninyo,” miingon siya. “Ang inyong hagit sa sakit sa pangisip wala magpasabot nga ang Manluluwas wala mahigugma kaninyo. Naghunahuna gayod Siya sa inyong mga hagit.”
Ang Panaghisgot Nagpadayon
Kini mao ang una sa tulo ka artikulo karong tuiga bahin sa mga kapanguhaan sa kahimsog sa pangisip. Ang isyu sa Hunyo 2025 magpakigbahin og pipila ka personal nga mga kapanguhaan nga mahimo natong magamit nga makatabang bahin sa kahimsog sa pangisip, ug ang isyu sa Agosto 2025 maghisgot kon sa unsang paagi makatabang ang makasuporta nga mga relasyon. Kon gibati ninyo nga gikinahanglan ang therapy, ikonsiderar ang pagbasa sa “Pagpangita og Propesyonal sa Kahimsog sa Pangisip Kinsa Angay alang Kanimo” (digital lamang nga artikulo), Liahona, Ene. 2019, diha sa Librarya sa Ebangheyo.