Ua Na’o Tusiga Faaeletonika
O Auala e 15 e Fatuina ai le Olioli Pe a E Lagonaina le Tuuatoatasi
Lagonaina le Tuuatoatasi? Ua tuuina mai e le Tama Faalelagi ia i tatou le tele o auala e lagona ai Lona malamalama ma le alofa e tauave ai i tatou i taimi faigata.
I tausaga ua mavae, sa ta’ua ai e se uo e faapea, soo se taimi lava e na te maua ai se aso faigata (po o le vaiaso) ma na te manaomia sina malamalama sili teisi atu i lona olaga, e na te saili se poloaiga e tausia. Ioe, e taumafai o ia e tausi pea poloaiga ona o lona alofa mo le Atua. Ua ia iloa foi e mafai ona ia lagonaina atili le malamalama—i le taimi lava lena—e ala i le sailia ma le loto i ai o se tasi e auauna atu i ai po o le faia o nisi talafaasolopito o aiga po o le faitauina o nisi mau pe e ala i le faailoa atu o le lotofaafetai sili atu mo faamanuiaga ua tuuina mai e le Tama Faalelagi ia te ia. Sa mau upu a la’u uo ia te a’u, ma ua faamanatu mai ia te a’u e faapea “a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (Mataupu Faavae ma Feagaiga 130:21). Ua ou tauaveina nei lena lava manatu e tasi, ma au i soo se taimi ou te manaomia ai se faamoemoe faaopoopo, mafanafana, filemu, po o le olioli.
Pe a tatou mananao ia maua atili le olioli1 i o tatou olaga pe afai o tatou lagonaina le tuuatoatasi (po o soo se taimi!), e mafai ona tatou galulue i valaaulia a le Alii faatasi ai ma lena faamanuiaga folafolaina. O faataitaiga nei e 15 o na valaaulia na tuuina mai e ala mai i Ana Aposetolo lea ua aumaia ai le olioli faaopoopo i lo’u olaga ma e mafai foi ona aumaia ai le olioli sili atu i lou olaga!2
1. Taulai Atu i Fesootaiga Ua Ia te Oe
E masani ona tatou lagonaina le tuuatoatasi ona o le leai o se fesootaiga faapitoa o loo tatou sailia. Ae ia manatua e i ai lava se tasi e aapa atu i ai. Atonu o se aiga, uo, tagata faigaluega, uso ma tuafafine o auaunaga, po o isi taitai o le Ekalesia. Mafaufau ma fesootai ma tagata ua saunia e le Alii i lou olaga e siitia ma faamanuia oe.
E pei ona aoao mai Peresitene Dallin H. Oaks: “Ia faapelepele ma faalauteleina ou sootaga faaleaiga. … Faatāua au faauoga ma avanoa mo le aoaoina ma le auauna atu, aua o na taumafaiga e mafai foi ona taitai atu ai i le olioli e faavavau.”3 Ma e pei ona valaaulia i tatou e Elder Quentin L. Cook o le Korama a Aposetolo e Toasefululua: “Ou te uunaia outou ia aua nei taulai atu i fesootaiga e te le o maua—ae nai lo lena ia taulai atu i sootaga faaleaiga o loo ia te oe. A o e faia lena mea, o le a faamanuiaina oe i le vavalalata ma le olioli sili atu ma ē pele ia te oe.4
2. Aapa Atu ma Auauna Atu
O le taulai atu i isi e mafai ona fesoasoani ia i tatou e faatoilalo ai lagona o le tuuatoatasi. Atonu e faigata ona aapa atu i nei taimi, pe atonu foi tatou te tuufesili pe o le a mananao tagata i la tatou fesoasoani. Ae e mafai ona tatou tatalo i le Tama Faalelagi ia iloa po o ai e manaomia la tatou fesoasoani, ma o le a Ia taialaina i tatou ia i latou e mafai ona tatou faamanuiaina (ma o le a mautinoa foi le faamanuiaina ai i tatou), aua e i ai lava se tasi e manaomia o tatou lima fesoasoani.
Na faamanatu mai Peresitene M. Russell Ballard, o le Sui Peresitene o le Korama a Aposetolo e Toasefululua ia i tatou e faapea:
“Ua tatou ola i se lalolagi o le le mautonu, lavelave, ma le fenumia’i. O manaoga o le olaga i aso uma e mafai ona faavaivaia ai i tatou. Ou te talitonu e i ai se mataupu faavae faigofie se tasi ae loloto e mafai ona fesoasoani ia i tatou e faasaoloto ai i tatou lava mai lenei felavesaiga lavelave o luitau e maua ai le filemu o le mafaufau ma le fiafia: auauna atu i le tasi ma le isi.
“E tele auala laiti ma faatauvaa ma tulaga e mafai ai ona tatou auauna atu ma alolofa i isi i le aiga, i le lotu, ma i o tatou nuu.
“O mea tetele e tutupu e ala i faatinoga faigofie ma laiti o le agalelei ma le auauna atu. O le a faaputuputu e avea o se olaga e faatumulia i le alofa mo le Tama Faalelagi, tuuto atu i le galuega a le Alii o Iesu Keriso, ma se lagona o le filemu ma le fiafia i taimi uma lava tatou te aapa atu ai le tasi i le isi.”5
3. Molimau atu e Uiga i le Tama Faalelagi ma Iesu Keriso
Pe o se faatinoga i luma o tagata, i luga o ala o faasalalauga faaagafesootai, pe o api talaaga foi po o Manatuaga i le FamilySearch mo tupulaga i le lumanai, e mafai ona tatou molimau atu e uiga i le Tama Faalelagi ma Iesu Keriso. O le faia o lena mea e mafai ona fesoasoani tatou te lagona e pei ona saunoa mai ai Elder David A. Bednar o le Korama a Aposetolo e Toasefululua: “O se tasi o olioliga silisili o lo’u olaga o le molimau atu lea i lo tatou Togiola ma valaaulia isi e mulimuli ia te Ia. Ou te valaaulia tagata uma ia aoao e uiga ia Iesu Keriso ma o mai ia te Ia.”6
Sa faasoa mai foi e Alema se aafiaga faapena ina ua ia faamaumauina, “Atonu e mafai ona avea au o se meafaigaluega i aao o le Atua e aumai ai se agaga i le salamo, ma o lo’u olioli lea” (Alema 29:9).
4. Usu se Viiga
E pei ona aoao mai le Au Peresitene Sili:
“O viiga e mafai ona faamanuiaina tele ai i tatou o ni tagata taitoatasi. E mafai e viiga ona sii ae o tatou agaga, tuuina mai ia i tatou le lototele, ma uunaia i tatou e fai mea tonu. E mafai ona latou faatumuina o tatou agaga i mafaufauga faalelagi ma aumaia ia i tatou se agaga o le filemu. …
“… Ia tatou tauloto ma mafaufau loloto i ai, tauloto ma usuina, ma aai ma feinu i a latou meaai faaleagaga.”7
Ua tatou iloa foi le folafolaga silisili o lo o i le Mataupu Faavae ma Feagaiga 25:12: “Aua e olioli lo’u agaga i le pese a le loto; ioe, o le pese a e amiotonu o le tatalo lea ia te a’u, ma o le a tali i se faamanuiaga i o latou luga.”
E mafai ona e maua ni musika eseese e siitia ai oe i le vaega o le “Musika” o le polokalama o le Gospel Library.
5. Faalagolago i le Atua ma Na te Silafia Ou Lagona
Atonu e le vave mavae atu o tatou taimi tuuatoatasi, ae o le Tama Faalelagi ma Iesu Keriso o le a faatasi pea ma i tatou. Ma faatasi ai ma i La’ua, e le tatau ona tatou lagonaina moni le tuuatoatasi. A tatou faatuatuaina La te silafia i tatou ma iloa o tatou lagona, e mafai ona siitia o tatou agaga. E pei na faasoa mai Peresitene Henry B. Eyring, Fesoasoani Lua i le Au Peresitene Sili, e faapea:
“O le pogisa e oo mai pe a tatou oo i faigata e mafai ona tatou lagona ai le faaesea ma le tuuatoatasi. Peitai, ina ua togiola Iesu Keriso mo i tatou i le Faatoaga o Ketesemane, na Te lei faia mo na o a tatou agasala. Sa ia lagonaina foi le tiga ma le tuuatoatasi tatou te lagonaina pe a alia’e mai tofotofoga. Po o le a lava le le mailoa o le ala o i luma atu, e i ai lava Le na savalia le ala lava e tasi ma e mafai ona taitaiina i tatou i le ala.
“O le iloaina o lenei mea, ou te folafola atu ai e mafai ona tatou lagonaina le olioli ma le faamoemoe i taimi o o tatou tofotofoga—e le faapea ona ua tatou faamoemoe i ni taimi ia lelei atili pe faigofie atu, ae ona tatou te faatuatuaina o Ia. Ua lava lo tatou faatuatuaina o Ia e tatalo ai ma ole atu mo se fesoasoani. Tatou te talitonu e malamalama atoatoa o Ia i o tatou lagona i nei taimi. O le a aumaia e lenei mea ia i tatou le talitonuga mautinoa e faapea, o le a lelei mea uma.”8
Na faasoa mai foi e Elder Bednar se folafolaga talitutusa faapea: “E malamalama atoatoa le Faaola i o tatou mafatiaga. Talu ai na Ia tauaveina o tatou le fiafia, vaivaiga, ma mafatiaga, e mafai ona Ia lagolagoina ma faamalosia i tatou. O le a Ia faamalosia o tatou mafaufau ma agaga. O le a Ia faamalosia i tatou faaletino ma i auala uma e manaomia e faia ai mea e tatau ona tatou faia. A o tatou liliu atu ia te Ia, e le tuua lava na o i tatou.”9
6. Saili le Suiga ma le Tuputupu Ae
O nisi taimi e faamanuiaina ai i tatou e faatoilalo lo tatou tuuatoatasi e ala i le auai i aoaoga fou ma gaoioiga. E aofia ai le vaega na ta’ua e Peresitene Russell M. Nelson “o le olioli o le salamo i aso taitasi”10 ma le aoaoina foi o tomai fou i le olaga atoa.
E pei ona aoao mai Peresitene Nelson: “Ia tatou talia le meaalofa atoatoa ma le taua a le Atua. Ia tatou lafoai a tatou avega ma agasala i aao o le Faaola ma lagonaina le olioli lea e sau mai le salamo ma le suiga.”11
Sa faasoa mai foi e Elder Cook faamanuiaga o le tuputupu ae i isi auala:
“O le Faaola, i le totogiina o le sala mo a tatou agasala, sa lei tuumamaina ai i tatou mai le tiutetauave patino mo le ala tatou te ola ai i o tatou olaga. O le taua o le galue, toaaga, galulue ma lo tatou malosi, faaleleia atili o a tatou taleni, ma le sauniaina o aiga ua uma ona folafola mai i tusitusiga paia mai lava i le amataga.
“O la’u lu’i ia te outou o le suesue lea o a outou sini ma fuafua po o a sini o le a faatagaina oe e faataunuu ai matafaioi faaleaiga, tausia oe i luga o lou ala o feagaiga, ma faataga oe ia maua le olioli e finagalo ai le Alii mo oe. Manatua, o le i ai o se sini e mafai ai ona e sefeina le taimi ma taumafaiga e ala i le fuafuaina i luma atu ma le le misia o mea taua e manaomia ma aso e faagata ai.”12
E oo lava i le Faaola na faaali mai ia i tatou le taua o le tuputupu ae pea, aua o Ia sa “tupu le poto ma le tino, ua alofagia o Ia e le Atua atoa ma tagata” (Luka 2:52).
7. Taulai Atu i Au Feagaiga
E oo lava i o tatou taimi sili ona faigata, e mafai ona tatou taulai atu i faamanuiaga e faavavau ua tatou maua, lea e toatele naua tagata i le lalolagi e lei mauaina, e ala i a tatou feagaiga. Mafaufau i faamanuiaga ma le mana o le perisitua e mafai ona tatou utuvai mai ai, e aofia ai le auai i le faamanatuga i vaiaso taitasi ma le mauaina o le mana tatou te maua (pe mafai foi ona maua) i totonu o le maota o le Alii. Na aoao mai Elder Bednar e uiga i lenei faamanuiaga sili ma le olioli:
“O le ola ma fiafia i tautinoga o feagaiga e fatuina ai se sootaga ma le Alii lea e patino loloto ma mamana faaleagaga. A o tatou faamamaluina tuutuuga o feagaiga paia ma sauniga, e faifaimalie lava ma tuputupu pea ona tatou latalata atili ia te Ia ma iloa ai le aafiaga o Lona paia ma le moni o loo soifua i o tatou olaga.
“Ou te molimau atu o se sootaga faalefeagaiga ma le Alo toetu ma soifua o le Atua e mafai, e moni, ma o le puna autu o le faamautinoaga, filemu, olioli, ma le malosi faaleagaga lea e mafai ai ona tatou ‘le faalogo’ ma ‘aua le fefefe, e ui ina tauemu le fili.”
Na aoao atili mai Elder Stevenson: “O le ‘penina tau tele’ o sauniga, feagaiga, folafolaga, ma faatonuga na maua [i totonu o le malumalu]. O le fiafia ma le olioli na lagonaina e i latou i itu uma e lua o le veli a o latou mauaina faamanuiaga o le malumalu ma o mai ia Keriso.” Ma na ia valaaulia i tatou ia “tomanatu i le filemu lea e sau mai tapuaiga ma auaunaga i le malumalu.”14
8. Suesue i Upu a le Faaola e Faalatalata Atu ai ia te Ia
Na faasoa mai e Peresitene Eyring:
“A o ou suesue i afioga a le Faaola ma Lona soifuaga, ou te iloa o Ia ma alofa ia te Ia mo mea ua Ia faia mo i tatou taitoatasi. …
“Aua ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).
“O le meaalofa a le Alo o le Atua o se meaalofa e le mafaatauina. O Ia o le meaalofa e faamalamalamaina lo tatou ala ma siitia i tatou. O Ia o le meaalofa e lagolagoina i tatou i aso faigata o la tatou malaga i le olaga nei. O Ia o le meaalofa lea e ofoina mai le alofa paia, faamoemoe tumau, ma le olioli moni.”15
O le tele o lo tatou aoao e uiga i le Faaola ma faalatalata atili atu ia te Ia, o le tele foi lea o Lona olioli moni e mafai ona tatou lagonaina. Na faasoa mai e Liae le ala na faamanuiaina ai o ia i lenei mea, ao ia faitauina tusitusiga paia, “sa faatumulia o ia i le Agaga o le Alii” (1 Nifae 1:12).
Ua tatou maua foi lenei folafolaga a o tatou faitau i le Tusi a Mamona, e pei ona aoao mai Elder Ronald A. Rasband o le Korama a Aposetolo e Toasefululua: “Ou te valaaulia outou ia faitau le Tusi a Mamona ma ia mulimuli i aoaoga a Iesu Keriso o loo i ai i lenei tusi paia. A o e faia lena mea, e mafai ona e maua le olioli faateleina ma le filemu i lenei olaga ma i le olaga a sau. Ou te iloa e moni lenei mea.”16
9. Tautala Ma Le Agaalofa E Uiga i Isi
O le faasoaina atu o upu lelei e uiga i isi e mafai ona fesoasoani tatou te maua ai foi se lagona lelei atu! Na aoao mai Peresitene Eyring, “E mafai ona ou folafola atu ia te oe se lagona o le filiemu ma le olioli pe a e tautala ma le agalelei e uiga i isi i le Malamalama o Keriso.”17
10. Avatu le Faafetai
O se uiga faaalia o le lotofaafetai e mafai i taimi uma ona liua ai se aso! E pei ona faasoa mai Elder Dieter F. Uchtdorf o le Korama a Aposetolo e Toasefululua:
“E tusa lava po o a o tatou tulaga, po o a o tatou luitau po o tofotofoga, o loo i ai pea se mea i aso taitasi e olioli atoa ma faamemelo ai. O loo i ai se mea i aso taitasi lea e mafai ona aumaia le lotofaafetai ma le olioli pe afai o le a tatou vaai i ai ma talisapaia.
“Masalo e tatau ona faaitiiti lo tatou vaai i o tatou mata ae ia faateleina i o tatou loto. Ou te fiafia i le upusii: ‘E na o le loto e mafai ona vaai manino ai se tasi. Soo se mea taua e le vaaia e mata’ [Antoine de Saint-Exupéry,The Little Prince, trans. Richard Howard (2000), 63].
“Ua poloaiina i tatou e ‘tuu atu le faafetai i mea uma.’[Mosaea 26:39]. Pe le lelei atu ea la ona tatou vaai i o tatou mata ma loto e oo lava i mea iti ia e mafai lava ona tatou faafetai ai, nai lo le taulai atu i tulaga le lelei i o tatou tulaga o i ai nei?”18
11. Ia Lotogatasi
Atonu o lou tuuatoatasi e ono sau mai le lagonaina o ou mafaufauga ma manatu e le o malamalama i ai isi. Afai o lea, ia manatua le folafolaga lenei mai ia Peresitene Eyring:
“Ua tatou iloa mai aafiaga, o le olioli e oo mai pe a faamanuiaina i tatou i le lotogatasi. Tatou te moomoo, o ni fanau agaga a lo tatou Tama Faalelagi, mo lena olioli sa tatou mauaina faatasi ai ma Ia i le olaga na muamua atu i lo lenei. O Lona finagalo ia tuuina mai ia i tatou lena moomooga paia mo le lotogatasi ona o Lona alofa ia i tatou.
“E le mafai ona Ia tuuina mai ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou e le taitoatasi. E ao ina tatou sailia ma agavaa i ai faatasi ma isi. E le o se tulaga la e faateia ai le uunaia o tatou e le Atua e faapotopoto ina ia Ona faamanuiaina i tatou.” Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto soo faatasi. I na faapotopotoga, lea ua mamanuina e le Atua mo i tatou, o loo taoto ai lo tatou avanoa sili. E mafai ona tatou tatalo ma galulue mo le lotogatasi lea o le a aumaia ia i tatou le olioli ma faateleina ai lo tatou malosi e auauna atu.
“I le au Nifae e Toatolu, sa folafola atu e le Faaola le olioli i le lotogatasi ma Ia o lo latou taui mulimuli i le mavae ai o la latou auaunaga faamaoni. Na ia fetalai mai, ‘O le a outou maua ai le atoatoa o le olioli; ma o le a outou nonofo ai i lalo i le malo o lou Tamā; ioe, o le a atoatoa lo outou olioli, e pei lava o le atoatoa o le olioli ua tuuina mai e le Tamā ia te au; ma o le a avea outou e pei lava o au, ma ua pei lava au o le Tamā; ma o le Tamā ma au ua tasi’ [3 Nifae 28:10].”19
Faaauau pea ona saili ni avanoa e fefautuaai faatasi ai i aiga, uarota, ma isi iunite. Ma mafaufau i mataupu faavae e mafai ona taitai atu ai i le fefautuaai faatasi ma le mataalia i totonu o le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 4.4.
12. Fatufatuina
Saili se mea e fatua’i, pe o lena mea o se ataata, galuega tau ata, se meaafale, po o se nofoaga mama. Mafaufau i upu nei mai ia Elder Uchtdorf: “O le a sou manatu o le a le ituaiga fiafia aupito silisili e mafai ona maua? Mo a’u, o le tali i lenei fesili o le, fiafia o le Atua. O lenei mea e taitai atu ai i se isi fesili: O le a le fiafia o lo tatou Tama Faalelagi? … O le fatufatuina ma le agaalofa o ni faamoemoega ia e lua e saofaga i le fiafia atoatoa o lo tatou Tama Faalelagi. … O le foafoaga e aumaia ai le faamalieina loloto ma le faamalieina.”20
13. Valaaulia le Agaga Paia i Lou Olaga.
E aumaia e le Agaga Paia le olioli i o tatou olaga, o lea soo se mea tatou te faia e valaaulia ai o Ia i o tatou aso e mafai ona fesoasoani tatou te lagona ai lena olioli. E pei na aoao mai tusitusiga paia, “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faatuatua” (Kalatia 5:22). Ma i le Mataupu Faavae ma Feagaiga 11:13, ua folafola mai ai ia i tatou e le Faaola, “O le a Ou faaali atu ia te oe lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli.”
14. Ia Usiusitai
O le olioli o “se tulaga o le fiafia tele e sau mai le ola amiotonu. O le faamoemoega o le olaga faaletino e mo tagata uma ia maua le olioli (2 Ni. 2:22–25). O se olioli atoatoa e na o Iesu Keriso e oo mai ai (Ioane 15:[10–]11; M&FF 93:33–34; 101:36).”21
E ui o le usisuitai e le o folafola mai ai ia i tatou se lalolagi e saoloto mai luitau ma faigata, ae e mafai ona fesoasoani tatou te maua ai le malosi ma le olioli e faatoilalo ai. E pei ona aoao mai Elder Benjamín De Hoyos o le Fitugafulu: “O le fiafia o se tulaga o le agaga. O lenei tulaga fiafia e oo mai o se taunuuga o le ola amiotonu.”22
Ma ua ia i tatou foi le valaaulia mai i le Mosaea 2:41 ina ia “manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga.”
15. Tatalo
E alofa faapelepele le Tama Faalelagi ia i tatou taitoasi o Lana fanau. E finagalo o Ia ia tatou lagonaina le olioli o le avea ma Ona atalii ma afafine faapelepele. O loo i ai pea o Ia iina mo i tatou, ma e mafai ona tatou liliu atu pea ia te Ia. Ma e pei ona aoao mai le Mataupu Faavae ma Feagaiga 136:29 , “Afai ua e faanoanoa, ole atu i le Alii lou Atua i le talosaga, ina ia olioli o outou agaga.”
E pei ona faamanatu mai e Elder Rasband ia i tatou: “E alofa tele le Tama Faalelagi ma Iesu Keriso ia i tatou. O i Tatou o Fanau a le Atua. E tatau ona tatou faasoa atu lenei upumoni taua i tagata uma tatou te iloa. E le o tuua lava na o i tatou. I le Tama Faalelagi ma Iesu Keriso, e i ai pea lava la tatou faauoga ma le lagolagosua.”23
I Mea Uma: Mulimuli ia Iesu Keriso
E sili atu i lo mea uma, o lo tatou olioli aupito taua ma faavavau e oo mai e ala i le mulimuli i le faataitaiga a le Faaola i mea uma! E pei ona aoao mai Peresitene Ballard: “Ou te avatu le faafetai i le Atua lo tatou Tama mo le auina mai o Lona Alo, o Iesu Keriso, i le lalolagi. Na faatoilalo e le Faaola le oti ma le agasala. Afai tatou te mulimuli ia te Ia, e mafai ona tatou maua le olioli e faavavau.”24
Na faasoa mai e Elder Cook se faaupuga talitutusa: “Tatou te manatunatu ma olioli i mea uma ua faia e le Faaola mo i tatou. Na Ia tuuina mai Lona soifua o se Togiola sui, faatoilaloina o le oti ma le tuuina atu o le togiola mo tagata uma. Ou te folafola atu o le mulimuli i Lona malamalama ma faataitaiga o le a aumaia ia i tatou le olioli sili atu, fiafia, ma le filemu i lenei olaga nai lo se isi lava mea.”25
Ma le vaega mulimuli, sa matua manino le aumaia e Elder D. Todd Christofferson o le Korama a Aposetolo e Toasefululua e faapea “o le faamoemoe, filemu, ma le olioli lea e sau mai le mulimuli ia Iesu Keriso e le mafai ona soona faamamafaina. O lona uiga o mea uma lava.”
E moni lava, e pei ona saunoa mai Peresitene Nelson, “O Iesu Keriso o le olioli.”27 Ma sa ia faaauau pea i se folafolaga ofoofogia e faapea “e mafai ona fiafia le Au Paia i lalo o tulaga uma. E mafai ona tatou lagona le olioli e tusa lava pe le o lelei le aso, se vaiaso, po o se tausaga! O’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga. Afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma. Tatou te lagonaina i le taimi o le Kerisimasi pe a tatou usuina, “Le lalolagi ia fiafia, lou tupu ia talia” [Le Lalolagi ia Fiafia, Viiga, nu. 113]. Ma e tatou te lagonaina i le tausaga atoa.”28