“Papatisoga i le Po o le Aso Faraile” Liahona, Sete. 2023.
O Leo o le Au Paia o Aso e Gata Ai
Papatisoga i le Po o le Aso Faraile
O lo’u manao e salamo na fesoasoani ia te au e maua ai le Faaola ma Lana Ekalesia.
Ata na tusia e Katy Dockrill
Ina ua uma ona ou lagonaina le uluai fiafia i le sau i le Iunaite Setete mai Saina ina ia maua la’u PhD, sa lofituina au i le tele o pepa faaleaoaoga sa tatau ona ou faitauina ma tusia. Sa ou lē mautonu foi pe faapefea ona fegalegaleai ma lo’u faufautua faaakatemia, lea na faaopoopo i lo’u atuatuvale. Sa ou lagona le leiloa ma le tuuatoatasi, ma sa ou lē iloa le mea e fai.
Sa ou faaiuina faapea o a’u mea sese ua tuanai na mafua ai ona ou puapuagatia ma e tatau ona ou salamo. O se afiafi, o lea sa ou sailia ai le “lotu” i luga o le initoneti. Sa ou maua ai o Le Ekalesia a Iesu Keriso o le Au Paia o Aso e Gata Ai ua na o le pau lea o le ekalesia e tatala seia oo i le 9:00 i le po. Sa tonu i lo’u mafaufau e salamo i le falelotu, o lea sa ou alu ai i se savaliga e itula le umi.
Ina ua ou taunuu i le falelotu pe tusa o le 6:00 i le afiafi, sa ou vaaia moli ma faalogoina le taliē ma le musika na sau mai totonu. Sa ou saili faataamilo i le fale ae sa lē mafai ona ou maua le faitotoa. I se faamalama, sa ou vaaia ai se tamā o taaalo ma lona atalii i se tasi o potu. Sa ou tuitui i le faamalama ia tosina mai ai. Sa ia faasino au i le faitotoa, faafeiloai au i totonu, ma fai mai ia te au o loo faia se papatisoga a se tasi.
Sa ou mulimuli i lana taitaiga ma ou alu atu i se potu lea sa tuuina atu ai e se tamaloa se faamanuiaga i se tamaitiiti faatoa uma ona papatiso. I le tu ai i talaane o le faitotoa, ma faalogologo i le faamanuiaga, sa ou lagonaina sa musumusu mai foi e le Atua faamanuiaga ia te au. Sa mafanafana lo’u loto, ma sa ou lagonaina le mea na ou iloa mulimuli ane o le Agaga Paia. Sa ou faalogoina foi se leo o faapea mai ua faamagaloina au.
Ina ua maea le papatisoga, sa matou potopoto faatasi ma isi ma feiloai i le toatele o tagata lelei. Sa ou lē toe tuuatoatasi. O se alii na faailoa mai o ia lava o le “peresitene o le paranesi” na muamua atu sa ofo mai e momoli au i le fale. I ni nai masina mulimuli ane, ina ua uma ona faia lesona a faifeautalai, sa papatisoina au.
I le aso o lo’u papatisoga i le 2018 i Cambridge, Massachusetts, sa saunoa ai se uso e uiga i le ala na faatulagaina ai e lo tatou Tama Faalelagi pele lena papatisoga i le Aso Faraile. Sa ia faamalamalama mai o le papatisoga sa tatau ona faia i le Aso Sa na sosoo ai, ae ona o se feteenaiga o taimi, sa tatau ai ona toe faatulagaina mo le po o le Aso Faraile. Ana leai lena suiga, semanu ou te lē iloaina lava le Ekalesia, lo tatou Faaola ma lo tatou Tama Faalelagi, ma o’u uso ma tuafafine i le talalelei.