Tagata na Faasino mai i Totonu o le Falepuipui

Saunia e Jeffrey N. Redd, Peresitene, Misiona a Mekisiko Aguascalientes, 2019–2022

I totonu o le falepuipui, e le’i aveesea lava le vaai a Sister Llanos i lona faamoemoega o se sui o Iesu Keriso, ma aoaoina ana uo i totonu o le sela e uiga i lo latou faasinomaga paia ma le auala e tatalo ai.

Ata

tamaitai faifeautalai ma le peresitene o le misiona ma lona faletua

O Ata na pueina e Amelia Lyon

O Sister Aketzaly Llanos o se faifeautalai lelei sa i ai se molimau malosi. Sa muai tofia o ia i le Misiona a Costa Rica San José i Sasae, ae sa matou galulue faatasi ma lo’u toalua, o Janeen i le Misiona a Mekisiko Aguascalientes mo se tausaga a o le’i maua lona visa mo Costa Rica.

Ia Aperila 2022 sa matou talotalo faatofa atu ai a o malaga atu Sister Llanos i se vaalele mo le Aai o Mekisiko, lea o le a ia maua ai se malaga fesootai i Costa Rica. Peitai, e itiiti ifo ma le 24 itula talu ona ma faatofa atu, ae valaau mai leoleo i le Aai o Mekisiko ia i matou.

“Ua matou pueina Aketzaly Llanos i le malaevaalele mo le umiaina o se pulufana e faaaoga e le militeli,” na latou fai mai ai. “O se solitulafono faalemalo lenei, ma o le a faasalaina o ia.”

O le taimi lava lena, sa ou faafesootaia ai le ofisa mo mataupu faaletulafono a le Ekalesia i le eria, ma sa latou faafaigaluegaina se loia e saili le tatalaina i tua o Sister Llanos. O lenei loia e le o se tagata o le Ekalesia. Sa ia tautino mai e fesoasoani ia i tatou ae sa faaalia lona lē mautonu. Sa ia faamalamalama mai o le mauaina o se pulufana faamiliteli i se tagata e le o se tagata faigaluega i le militeli o se solitulafono matuia, e tusa lava po o le a le faamoemoega o se tagata.

Mulimuli ane, sa ta’u mai e Sister Llanos ia i matou sa ia pikiina i luga le pulu mai le auala i lana eria mulimuli. Sa mafaufau o ia e fai ma se suvania. O le pulufana, e ui i lea, na foliga i se filifili tautau ki faasuvania sa faatauina atu i fafo o se maina eli siliva tuai i se tasi o ona eria na i ai muamua. Peitai, sa taulimaina o ia e tagata sailiili a le malo e pei o se tagata faatupu faalavelave. I totonu o ni nai aso, na siitia atu ai Sister Llanos mai le falepuipui i le malaevaalele i se falepuipui e maualuga le saogalemu lea sa i ai le au solitulafono tamaitai sili ona leaga.

O Tatalo o le Faatuatua

Na vave lava ona amata tatalo ina ia vave tatala mai i tua ia Sister Llanos. Sa ma valaauliaina ma Janeen ia faifeautalai e 115 o loo auauna atu i la matou misiona e faatino le faatuatua ina ia mafai ona matou vaai i se vavega, pe a finagalo i ai le Alii. Sa ou faafesootaia ia peresitene o misiona i le Aai o Mekisiko, o le Misiona a Costa Rica San José i Sasae, ma le Nofoaga Autu e Aoao ai Faifeautalai i Mekisiko, ma sa latou valaauliaina a latou faifeautalai e auai faatasi ma i matou i le tatalo.

I totonu o puipui o le falepuipui, sa lei aveesea lava le vaai a Sister Aketzaly Llanos mai i lona faamoemoega o se sui o Iesu Keriso.

I totonu o puipui o le falepuipui, sa lei aveesea lava le vaai a Sister Llanos mai i lona faamoemoega o se sui o Iesu Keriso. Sa ia aoaoina ana uo e toaiva i le sela e tatalo e ala i le faia o tatalo i le taeao ma le afiafi o se vaega i aso taitasi. Sa ia aoaoina foi i latou e uiga i lo latou faasinomaga paia.

Sa tautino mai e se tasi o ana uo i le sela, “O au o se tagata leaga tele mo le mea sa ou faia e oo mai ai i totonu iinei, ma e ita le Atua ia te au.” Sa tilotilo atu Sister Llanos ia te ia ma fai atu, “Leai. E le o oe o se tagata leaga. O oe o se tasi na faia se mea leaga. O oe o se afafine o le Atua, ma e alofa o Ia ia te oe!”

O le isi uo i le sela na faamatalaina se miti sa ia faia i ni nai vaiaso a o lei pue faapagotaina Sister Llanos. Sa miti lea tamaitai i le sela e faapea, na lele atu se manulele i totonu o le falepuipui e fesoasoani ia te ia. A o lei auai Sister Llanos i le Ekalesia, sa i ai se ata o se manulele sa tāina i lona tua. Ina ua vaai le tamaitai lenei i le pe’a, sa ia iloa e tatau ona ia faalogo i le sāvali faafaifeautalai a Sister Llanos.

Na aoaoina o ia e Sister Llanos e uiga i le Toefuataiga o le talalelei a Iesu Keriso ma avatu ia te ia le kopi o le Tusi a Mamona sa ia aumaia faatasi ma ia i le falepuipui—o le kopi lava lea e tasi na tuuina atu e faifeautalai tamaitai ia Sister Llanos i le lima tausaga na muamua atu ina ua ia sailiili i le Ekalesia.

Sa vave ona faatulagaina se faamasinoga muamua i le Aai o Mekisiko. Sa ma o ma Janeen e avea ma molimau. Ina ua matou feiloai i le vaega o loia i fafo o le falefaamasino, sa manino lava le popole o le loia, ma savalivali i luga ma lalo o le auala savali.

Sa ou alu atu ia te ia ma fai atu: “O le asō o le a e lagona atili ai le toafimalie ma le toafilemu sili atu nai lo se isi lava taimi na e lagonaina i se potu faamasino. Sei ou faamatalaina atu ia te oe pe aisea. E silia ma le 500 faifeautalai ma o latou aiga o loo tatalo mo oe ma lou manuia i le asō. O loo latou tatalo foi ina ia maua e le faamasino se loto ua faamalūlūina ma o le a ia tatalaina Sister Llanos mai le falepuipui.”

Sa faatumulia mata o le loia i loimata, ma sa ia faaalia lona talisapaia o le faatuatua ma tatalo a le toatele o tagata mo ia.

I le 10 i le taeao na amata ai le faamasinoga, ae sa manaomia ona ou faatali i fafo seia oo i lo’u taimi e molimau ai. Na mavae atu le lua itula umi. Ona sau lea o le leoleo o le potu faamasino ma fai mai e lē manaomia ona faalogo le faamasino i la’u molimau—ua uma ona ia faia lana faaiuga.

Ma le naunautai, sa ou ulu atu i le potu faamasino, ma sa amata ona tautala le faamasino. Sa ia saunoa e uiga i le tulafono na solia e Sister Llanos ma e uiga i moliaga matuia sa feagai ma ia.

“E ui i na mea uma,” sa ia faaauau ai, “Ou te talitonu i le faamaoniga na tuuina mai e faatatau i uiga lelei o Sister Llanos.” Ona ia sii maia lea o se vaega e faalēiloa o le tulafono lea na mafai ai e ia ona tuuina mai le alofa mutimutivale, ma sa vave ona ia tatalaina loa o ia.

Ata

tamaitai faifeautalai ma le faletua o le peresitene o le misiona

O Sister Llanos ma Sister Janeen Redd, o ona lima na solofa ifo i ai Sister Llanos ina ua tatalaina mai le falepuipui.

“O Le Atua i Lo’u Autafa”

O le vavega lenei sa matou sailia! Nai lo le faasalaina i le fa po o le sili atu o tausaga i le falepuipui, sa saoloto Sister Llanos e alu. Ina ua uma le faamasinoga, sa fai mai lana loia i lena aso o se tasi o aso sili ona taua o lana matātā faalegaluega.

“Sa ou lagonaina moni lava le Atua i o’u autafa,” o lana tala lea. “Ou te fia aoao atili e uiga i a outou talitonuga.”

Sa ou valaauliaina o ia i le Nofoaga Autu mo Tagata Asiasi mai i le Malumalu o le Aai o Mekisiko i Mekisiko. “O le a e vaai i isi faifeautalai iina e lelei e pei o Sister Llanos,” sa ou fai atu ai ia te ia. “O le a e vaaia le aloiafi i o latou mata, ma o le a e fesili ifo ia te oe lava pe aisea.”

I le sefululua itula mulimuli ane, na tatalaina ai Sister Llanos, o loo laei pea i ofu o le falepuipui. Sa solofa ifo o ia i lima o Janeen. O le taimi lava na matou lē toe fetagisi ai ae tautatala, sa valaau atu ai Sister Llanos, “Peresitene, sa maua ni a’u igoa e faailoa atu mai i le falepuipui!”

O lenei aafiaga atoa na faamautu mai ai e faapea “e lei taofia lava le avea o le Atua ma se Atua o vavega” (Mamona 9:15). E leai so’u masalosalo o le faatuatua ma tatalo a le toatele o tagata lelei na fesoasoani i se loia e finauina lona tulaga ma faamalūlūina ai le loto o le faamasino.

Ona sa pue faapagotaina Sister Llanos, sa maua ai e nisi o tamaitai sa faafalepuipuiina le faamoemoe e ala i le talalelei a Iesu Keriso, sa totoina e se loia se fatu o le faatuatua, ma sa faamalosia i matou i lo matou talitonuga maumaututu e mafai e le Atua ona faaaoga i tatou e faalautele ai Lana galuega e tusa lava po o fea o tatou i ai.