“Faasoaina atu o Kopi e 72 o le Tusi a Mamona,” Liahona, Sete. 2023.
O Leo o le Au Paia o Aso e Gata Ai
Faasoaina atu o Kopi e 72 o le Tusi a Mamona
O taimi uma lava ou te tatalaina ai lo’u gutu e talanoa e uiga i le Tusi a Mamona, sa faatasi mai le Agaga Paia ia te a’u.
Ata na tusia e Allen Garns
I le taimi o le faama’i oti o le KOVITI-19, sa faamanuiaina i matou i le i ai o se tausiga mo lo’u toalua, o Claude, i lo matou fale. O iina, sa matou fesoasoani ai ma le alofa ma le ma fanau i lona tausiga seia oo ina agai ese atu filemu o ia i lo matou aiga faalelagi.
I se taimi na muamua atu, sa ma tatalo ai ma Claude pe suia la matou faapaologa e avea o se falema’i, lea e mafai ona ofi ai mea uma na te manaomia e lagona ai le lagolelei. Sa ma mauaina le faamautinoaga e tatau ona faia.
Ina ia toe faafou le faapaologa, sa manaomia e nisi o tagata faigaluega le ui atu i lo matou fale. O le mea e lelei ai, sa i ai se faitotoa i tua o le faapaologa, lea sa mafai ai e le aufaigaluega ona o atu ma o mai e aunoa ma le ulufale atu i le potu malolo autu o le matou fale. O se faamanuiaga maoae lena i le taimi o tapu o le KOVITI-19.
Ina ua mae’a le potu o Claude, sa o mai tausimai i aso taitasi. Sa agalelei, agaalofa, ma atamamai i latou e uiga i mea sa manaomia ona matou faia e faatumauina ai le lagolelei o Claude.
Ina ua ou auai i le Ekalesia, sa aoaoina au o tagata uma o le Ekalesia o se faifeautalai.1 Ona ou te fiafia e faasoa atu le talalelei, sa ou okaina ai ni pusatusi se tolu o le Tusi a Mamona, e 24 tusi i pusa taitasi. Sa ou tautino e tuuina atu se tusi i tagata uma na ulufale mai i lo matou fale.
Sa ou makaina vaega taua o tusi taitasi i se kata faapisinisi sa ou mamanuina na faaalia ai se ata na ou pueina o le Malumalu o Sate Leki. Sa ou faapipiiina foi la’u molimau i luga o le itulau avanoa i luma o tusi taitasi. Ona, a o lei tuuina atu se tusi i se tagata faigaluega po o se tausimai, sa ou faamalamalama atu ia i latou le uiga o le Tusi a Mamona.
Sa ou ofo ma le fiafia i o latou uiga faaalia. E na o le toatasi le tagata na musu e talia se tusi. Sa fiafia isi tagata uma e faalogologo e uiga i ai. Sa matuai faafetai mai nisi ia te au, ma fai mai ua latou iloa e uiga i le Tusi a Mamona ma sa mananao i se tusi. E toatele tagata sa matuai fiafia lava ma sa latou opoina foi au.
Ou te talitonu na tupu lenei mea auā o taimi uma lava ou te tatalaina ai lo’u gutu e talanoa e uiga i le Tusi a Mamona, sa faatasi mai le Agaga Paia ia te au. Ou te mautinoa e mafai e tagata faigaluega ma tausimai ona lagonaina le Agaga. Sa ou tuuina atu tusi uma e 72, ma sa ou tuuina atu talu ai nei se oka mo le isi 24.