Mga Baroganan sa Pagpangalagad

Pagpangalagad gamit ang Mas Dakong Kahibalo

Wala gikinahanglan nga ikaw aduna sa tanang mga tubag, apan ang pag-ila Kaniya og mas maayo makatabang kanato sa pagpangalagad sama sa gibuhat sa Manluluwas.

batang Jesus diha sa Templo

Detalye gikan sa Christ in the Temple [Kristo diha sa Templo], ni Heinrich Hofmann

Kita mahimong mas mahisama sa Manluluwas kon kita magkat-on sa pagpangalagad sama sa Iyang gibuhat. Gamit ang mga ehemplo ni Jesukristo ug sa Iyang mga disipulo diha sa Bag-ong Tugon, sa 2023 kita makakat-on kon unsaon sa pagpalambo og Kristohanong mga hiyas nga makatabang kanato sa atong mga paningkamot sa pagpangalagad sama sa Manluluwas.

Si Jesus mipakita Kanato og usa ka Sundanan sa Pagkat-on

Samtang nagdako ang Manluluwas, “mitubo [Siya] ug nahimong kusgan. Napuno siya sa kaalam ug ang panalangin sa Dios diha kaniya.” (Lucas 2:40). Ang termino nga mitubo nagpasabot nga anam-anam nga mitubo, sama sa buwan nga magkadako paglabay sa bulan. Midugang ni Lucas nga “Ug mitubo si Jesus sa lawas ug sa kinaadman ug gikahimut-an siya sa Dios ug sa mga tawo” (Lucas 2:52). Dili kalit ang pag-angkon ni Jesus sa kahingpitan sa kahibalo—Siya nakaangkon niini paglabay sa panahon (tan-awa sa Doktrina ug mga Pakigsaad 93:12–14).

Sa dihang si Jesus 12 anyos na, nakit-an siya sa Iyang mga ginikanan didto sa templo—ang sentro nga dapit sa pagsimba didto sa Jerusalem—“naglingkod sa taliwala sa mga doktor, ug sila naminaw kaniya, ug nangutana kaniya og mga pangutana” (Hubad ni Joseph Smith, Lucas 2:46 [sa Lucas 2:46, footnote c]). Tungod kay ang pagkat-on nahimong importanteng bahin sa Iyang pagtubo, sa dihang miabot ang oportunidad sa pagtudlo niadtong anaa sa templo, Siya andam na. Ang iyang pagtudlo didto adunay usa ka makapahingangha nga epekto diha kanila ug sa Iyang ginikanan.

Gamit ang Kahibalo sa Pagpangalagad

Ania ang tulo ka paagi nga ang pagpalambo og kahibalo nga Kristohanong hiyas makatabang kanato sa atong pagpangalagad:

1. Sa atong pag-ila sa Manluluwas ug pagkat-on mahitungod sa Iyang mga hiyas, kita makahibalo og mas maayo kon unsa ang Iyang buhaton sa pagpangalagad diha sa atong dapit.

2. Samtang kita mouswag diha sa kahibalo sa ebanghelyo ug pagsabot, kita anaa sa mas maayong posisyon aron ang Espiritu Santo makapahinumdom kanato unsa ang atong gikinahanglan kon kita magkinahanglan niini (tan-awa sa Juan 14:26). Kini makatabang kanato nga makasabot sa panginahanglan niadtong atong gialagaran ug matubag ang ilang mga pangutana ug mga kabalaka.

3. Samtang atong usbawan ang atong abilidad sa pagkat-on, kita mas makahimo sa pagkonektar o makaserbisyo sa uban. Kita mahimong makakat-on og dugang pa kabahin sa usa ka hilisgotan sa pagkonektar sa usa ka higala kinsa interesado niini. O kita mahimong makakat-on og piho nga mga kahanas nga makatabang nga matubag ang usa ka panginahanglan.

Ang pag-angkon og kahibalo makatabang kanato sa pagpangalagad sa daghang paagi. Agig dugang, “Bisan unsa nga baroganan sa salabotan nga kita makakab-ot niini nga kinabuhi, kini madala uban kanato sa pagkabanhaw” (Doktrina ug mga Pakigsaad 130:18).

young adult nga nagtuon sa mga kasulatan

Pag-ugmad og Kahibalo

Sa unsang paagi kita makaugmad og hiyas sa kahibalo? Ania ang pipila ka hunahuna:

1. Hinumdomi nga bisan si Jesus anam-anam nga nakakat-on paglabay sa panahon. Pagmakugihon, apan pagpailob sa imong kaugalingon. Ang pagkat-on mahitabo nga “pagtulun-an human sa usa ka pagtulun-an, lagda human sa usa ka lagda” (2 Nephi 28:30).

2. Pagkat-on sa pag-ila sa mga kasaligan nga mga tinubdan sa kasayoran. (Tan-awa sa “Finding Truth in the Misinformation Age” sa Oktubre 2022 nga digital nga Liahona.)

3. Magmausisahon. Pagkat-on gikan sa unsay nanghitabo sa imong palibot sa matag adlaw. Mangutana. Pagbasa og maayong mga libro ug magpadayon sa pagpakisayod. (Tan-awa sa Doktrina ug mga Pakigsaad 88:79, 118; 90:15.)

4. Pagkat-on pinaagi sa pagtuon ug pinaagi sa hugot nga pagtuo (tan-awa sa Doktrina ug mga Pakigsaad 88:118). Ang imong abilidad sa pagsabot sa kamatuoran sa bisan unsa nga hilisgotan mapalambo pinaagi sa pagpares sa imong labing maayo nga intelektuwal nga paningkamot uban sa imong labing maayong espirituwal nga paningkamot. Pagpakabuhi aron ikaw makabaton sa tabang sa Espiritu Santo.

Pagdiskobre pa og Dugang

• Pagkat-on og dugang kabahin sa pag-ugmad og Kristohanong hiyas sa Isangyaw ang Akong Ebanghelyo: Usa ka Giya sa Misyonaryo nga Pangalagad (2019), 121–32.

• Basaha ang “Ang Sugo sa Ginoo nga ‘Pangitaa ang Pagtulun-an,’” Liahona, Peb. 2022, 26–29.

• Sutaa kon sa unsang paagi ang kababayen-an makagamit sa pagkat-on aron makapanalangin sa uban diha sa “Pangitaa ang Pagtulun-an: May Buluhaton Kamo” ni Mary N. Cook (Liahona, Mayo 2012, 120–22).