“Pagnabigar sa mga Kalisdanan diha sa mga Relasyon,” Liahona, Ene. 2023.
Pagnabigar sa mga Kalisdanan diha sa mga Relasyon
Ang mga pagsulay sa pamilya mahimong mabuntog kon kita andam nga magtinguha sa tabang sa Ginoo aron mausab ug molambo.
Mga paghulagway pinaagi ni Ale+Ale
Ang pagnabigar sa mga hagit diha sa relasyon sa atong pamilya mahimong mosulay kanato sa atong emosyonal nga mga kinutoban. Isip usa ka therapist, akong nakita kon unsa ka daghang sitwasyon nga makapaguol sa kasingkasing. Apan ako usab nakasaksi sa mga panalangin diha mga kinabuhi niadtong nagsagubang og mga pagsulay sa ilang pamilya pinaagi sa pagtinguha sa tabang sa Ginoo aron molambo ang ilang komunikasyon, mouswag ang ilang gugma ug pagsabot, ug magtinabangay sa paghimo og importanteng mga kausaban. Uban sa tabang sa Ginoo, sila makakaplag og kalig-on sa paglambo latas sa ilang mga problema.
Ang Kristohanong komunikasyon makadala og gugma ug pagsabot
Si Tom ug si Joan (mga ngalan giusab) ang duha nawad-an sa ilang mga kapikas. Ang asawa ni Tom namatay tungod sa kanser, ug ang bana ni Joan, tungod sa pagkaadik, mibiya tungod sa laing karelasyon. Sila si Tom ug Joan nagkahimamat atol sa usa ka komperensiya sa mga single ug nanglantaw ngadto sa kaminyoon.
Ang matag usa nila adunay mga anak, nag-edad og 15 ug paubos. Ang ilang mga pamilya nakahimo na og pipila ka kalihokan sa gawas [outing], ug sila si Tom ug Joan nakakita og potensiyal nga mga problema sa pagsagol sa mga pamilya. Mianhi sila sa pagpatambag alang sa pipila ka ideya kon unsaon sa pagpakig-istorya sa hilwas nga mga paagi sa pagnabigar niining bag-ong anib sa ilang kinabuhi.
Misugyot ko nga ilang rebyohon ang mensahe kabahin sa mga tambag sa pamilya ni Presidente M. Russell Ballard, ang Akting nga Presidente sa Kurom sa Napulog Duha ka Apostoles. “Gikinahanglan kaayo sa mga anak ang mga ginikanan nga maminaw kanila,” siya nagtudlo nga “ug ang konseho sa pamilya makahatag og panahon diin ang mga sakop sa pamilya makakat-on sa pagsabot ug paghigugma sa usag usa.”1
Alang sa ilang konseho sa pamilya, sila mihukom sa mosunod nga agenda:
-
Pagtumbok sa problema.
-
Paghunahuna og mga solusyon.
-
Pagpili og plano.
-
Pagbutang niini ngadto sa buhat.
-
Pagtimbang timbang sa kalamposan sa plano sa sunod nga semana ug paghimo og usab sa plano kon gikinahanglan.
Agig dugang ngadto sa pakigtambagay isip usa ka pamilya, si Tom ug Joan nakakat-on nga kon taas ang kaugtas sa relasyon, mahimong adunay panginahanglan sa pagkat-on kon unsaon usab sa pagpalambo sa tinagsahay nga pagkigkomunikasyon.
Si Tom ug Joan nakakat-on og pipila ka mga pamaagi nga nakatabang nila sa pagpalambo sa ilang komunikasyon ug sa ilang relasyon sa ilang mga anak.
-
Ang mga ginikanan mag-uban sa pagpangita og mga solusyon sa mga problema sa mga anak.
-
Kon ang usa ka anak adunay kalisdanan sa pagkompleto sa ilang inadlaw adlaw nga tahas, usa sa mga ginikanan mogahin og panahon uban kanila, hisgotan ang adlaw samtang sila magtinabangay sa pagkompleto sa tahas.
-
Sila mogahin og panahon sa matag semana sa pagpalig-on sa ilang relasyon ngadto sa matag anak.
-
Sila motakda daan sa panahon nga sila magpalayo una kon ang sitwasyon diin ang mga tawo “emosyonal” (magsininggitay) mopatigbabaw sa paghisgot sa problema sa “rasyonal,” nga paagi (panaghisgot).
-
Sa sitwasyon nga adunay pagpalabwanay tali sa ginikanan ug anak, ang ginikanan, kon mobati sa pagbuhat sa ingon, mosibog ug mobalik taodtaod aron sa paghunahuna og usa ka bag-o nga solusyon.
Samtang ang pamilya naningkamot sa ilang labing maayo sa pagsulbad sa mahagiton nga mga isyu sa relasyon pinaagi sa pagkamatinud-anon, hilwas nga mga paagi—sa pakigkomunikasyon kabahin sa ilang mga hagit ug pakigtambayayong latas niini—si Tom ug Joan nakakita sa importanteng paglambo sa ilang mga anak ingon man sa ilang kaugalingon.
Ang pagsabot ug ang paghigugma makapasuod kanato
Samtang ang mga bata mahimo nang mga hamtong, sila dili kanunayng mohimo og mga pagpili nga buot nato nga ilang pilion. Unsaon nato sa pag-atubang sa maong mga sitwasyon? Unsaon nato sa pagpatunhay o gani sa pagpalig-on sa atong mga relasyon aron nga kita makapadayon nga mamahimong usa ka maabagon, matarong nga impluwensiya sa ilang mga kinabuhi?
Si Terry ug si Bruce miadto sa akong opsina dili pa lang dugay human nga si Terry ug ang iyang anak nga lalaki si Seth, nag-away diha sa telepono. Si Seth nalayo didto sa eskwelahan sulod sa tulo ka tuig. Siya adunay grabe nga sakit ug wala pa mahuman ang pag-atiman sa doktor. Tungod sa iyang sakit, wala siya nakaserbisyo og misyon. Si Terry ug Bruce wala masayod kon hain na ang iyang pagmapatuod o gani kon mitambong ba siya sa simbahan. Nabalaka sila nga si Jolyn, ang bag-ong hinigugma ni Seth, dili ang matang sa impluwensiya nga gusto nila alang sa kinabuhi ni Seth. Ang duha ka ginikanan nasuko kabahin sa dalan nga iyang mga gipili nga subayon sa kinabuhi.
Samtang naghisgot kami kabahin sa unsay ilang mahimo, gihisgotan namo ang sambingay sa nawala nga karnero. Ang magbalantay sa karnero tingali naminaw sa pagbahihi [bleating] sa nati sa wala pa kini nakit-i, mihigugma niini, ug midala niini balik ngadto sa panon (tan-awa sa Lucas 15:6). Si Terry ug Bruce nakahibalo nga sila dili makausab ni Seth, apan sila nakahukom nga maningkamot sa pagpaminaw kaniya, paghigugma kaniya, ug pagdapit kaniya sa panimalay. Sila dili makapili sa iyang pangasaw-on o sa dalan nga iyang pilion alang kaniya, apan sila makapahinumdom kaniya sa ilang gugma sa pamilya alang kaniya ug alang sa ebanghelyo.
Si Terry mitawag ni Seth ug nangayo og pasaylo tungod sa panaglalis. Naminaw lang siya samtang gisulti ni Seth nga siya naulaw tungod kay wala siya moserbisyo og misyon. Naghunahuna siya kon unsaon sa pagpakigdate og usa ka babaye sa simbahan. Midapit sila ni Seth ug Jolyn sa panimalay atol sa bakasyon sa pag-eskwela.
Miabot si Seth ug Jolyn. Ang igsoong babaye ni Seth migakos sa magtiayon. Ang duha ka ginikanan ganahan nga nahibalik si Seth sa panimalay ug misulti kaniya niini. Sila si Terry ug Bruce mikontak kanunay ni Seth. Mitext si Terry sa makadaghang higayon sa usa ka semana. Ang pamilya nagtawagay gamit ang bidyo matag Dominggo. Ang papa ni Seth migahin og panahon sa pagdula og golf ug sa pagpamasol uban niya. Hinay hinay kining nahitabo, apan si Seth nasuod pag-usab ngadto sa pamilya. Sa kadugayan, si Seth nakahukom nga ang gipili nga dalan ni Jolyn dili husto alang kaniya. Siya sa kaulahian naminyo og usa ka talagsaong babaye nga iyang nabunyagan.
Nakaplagan nila ni Terry ug Bruce ang ilang nawala nga nati nga karnero pinaagi sa pagpaminaw, paghigugma, ug pagdapit kaniya balik ngadto sa panon.
Ang pagtambayayong nga mausab makapalig-on sa mga relasyon ug makadasig og kalamboan
Si Marie ug ang iyang bana, si David, naminyo sulod sa daghang katuigan ug nahimong respetado nga mga miyembro sa ilang komunidad. Apan sa usa ka adlaw si Marie nakahibalo, nga wala mahibaloi ni David, nga siya nalambigit sa usa ka relasyon sa laing babaye.
Miadto si Marie sa akong opisina, sagol-sagol ang gibati nga kasuko, pagbangotan, ug kasubo. Samtang nagbakho siya sa iyang pag-istorya, nasayod siya nga kinahanglan niyang sultihan si David kon unsa ang iyang gibati sa paagi nga dili masuko, aron ang Espiritu magauban kanila.
Human sa mainampoon nga pagpangandam, siya misulti ni David nga siya nahigugma kaniya apan nga siya nahugno sa pagkahibalo sa iyang relasyon sa laing babaye. Magkinahanglan sila nga makigkita sa bishop og magkonsiderar sa dangatan sa ilang kaminyoon. Dili gusto si David nga mawala ang iyang asawa o ang iyang pamilya. Uban sa tabang sa bishop, siya misugod sa proseso sa paghinulsol.
Nasayod si Marie nga adunay mga butang nga kinahanglan buhaton sa matag usa kanila aron makakaplag og tinagsa-tagsang pagkaayo ug isip usa ka magtiayon. Mihangyo si Marie ni David sa pagpuyo ngadto sa iyang mga ginikanan sa usa ka panahon samtang siya mosusi ug mosabot sa iyang mga pagbati. Migahin siya og panahon diha sa templo, nangayo og tabang sa Ginoo. Mipabilin siya diha sa therapy, nagpalig-on sa iyang kahanas sa pagkigkomunikasyon ug nagkat-on sa pagtakda og tukma nga mga utlanan.
Silang duha, si Marie ug David:
-
Mobasa sa mga kasulatan sa matag gabii.
-
Nag-ampo.
-
Mipaambit sa mga panghitabo sa matag adlaw.
-
Mag-date kausa sa usa ka semana.
Sila mas bukas nga makighinabi. Isulti ni Marie unsay iyang hunahuna, ug si David naminaw. Sila misugod sa pagpakigsulti sa usag usa sama sa ilang panag-istorya sa una nilang pagminyo.
Misulti si Marie nga dili lang si David ang nausab; siya sab nausab. Mibati siya nga mas nalig-on ug mas masaligon sa iyang kaugalingon. Nagpadayon si David nga mahinulsulon ug miuli sa panimalay.
Ang paglakip sa Ginoo diha sa ilang inadlaw adlaw nga mga kinabuhi nakahatag og mas dakong pagsalig ug gugma ngadto sa ilang relasyon. Ang duha mibati nga ang pagpaningkamot sa pagbuntog niining hagit inubanan sa tabang sa Ginoo nakapalig-on kanila.
Ang mga pulong ni Kristo mogiya kanato
Samtang kita magsagubang sa malisod nga mga relasyon sa pamilya, hinaot nga kitang tanan makahinumdom sa paglingkod sa konseho uban sa Ginoo. Usahay Siya mosulti kanato unsa ang buhaton. Usahay kita mahimong makapili. “Kini dili maayo nga Ako magsugo diha sa tanan nga mga butang” (Doktrina ug mga Pakigsaad 58:26). Apan adunay laing mga panahon nga kita kinahanglan gayod nga motugyan sa atong kaugalingon ngadto sa Ginoo. Kon kita maghupot og usa ka mahangturon nga panglantaw, ang bahandi sa kahangtoran maato, “ug ang tanan nga mga butang maghiusa sa paglihok alang sa [atong] kaayohan” (Doktrina ug mga Pakigsaad 90:24).