“Ang Pinulongan sa Espiritu,” Liahona, Ene. 2023.
Mga Tingog sa mga Santos sa Ulahing mga Adlaw
Ang Pinulongan sa Espiritu
Nakat-onan nako nga ang Espiritu makatabang kanato sa pagpahayag sa gugma sa Langitnong Amahan, bisan kon mobati kita og kakulang.
Litrato sa maayong kabubut-on sa tagsulat; paghulagway pinaagi ni Jennifer M. Potter
Paghulagway pinaagi ni Jennifer M. Potter
Kasagaran gigahin nako ang mga ting-init sa pagbiyahe sa Uropa uban sa usa ka grupo sa mga mananayaw. Ang among mga tigtan-aw, mga pasundayag, ug mga lebel sa kusog nagkadaiya, apan kami adunay usa ka tradisyon nga kanunayng nagpabilin nga pareho: taposon namo ang matag pasundayag pinaagi sa pagkanta sa “Ang Dios Magauban Kanimo”1 sa pinulongan sa nasod nga among gibisita. Tungod kay kadaghanan sa akong grupo sa sayaw nahisakop sa Ang Simbahan ni Jesukristo sa mga Santos sa Ulahing mga Adlaw, ganahan kami niini nga tradisyon. Nindot kadto nga paagi nga mokonektar sa among mga tigtan-aw ug mopaambit sa gugma sa Langitnong Amahan.
Sa hapit na matapos ang usa niini nga mga pagbiyahe, bag-ohay lang kaming mitabok sa utlanan paingon ngadto sa Germany ug nagbansay sa awit sa German alang sa umaabot nga mga pasundayag. Apan pag-abot, nahibaloan namo nga kini nga piho nga rehiyon sa Germany namulong og Sorbian, usa ka sinultihan nga lahi kaayo sa awit nga among gibansay og maayo.
Sa biyahe sa bus paingon ngadto sa among pasundayag, gikapoy ko ug gusto lang nga matulog sa tibuok biyahe. Apan ang among mga direktor adunay laing mga ideya. Gihangyo nila ang among mga giya sa paghubad sa himno ngadto sa Sorbian. Karon gusto nila ang tibuok bus sa nagduka nga mga tigpasundayag nga magkat-on sa awit pipila lang ka oras sa dili pa ang among pasundayag.
Gibuhat namo ang among labing maayo. Sa kataposan sa pasundayag, nagbarog kami sa atubangan sa entablado ug nagsugod sa pagkanta. Nakahinumdom kong mibati og kasorpresa samtang ang dili pamilyar nga mga pulong nga naglisod ko sa pagkat-on ug paglitok pipila ka oras ang milabay sayon nga misantop sa akong hunahuna. Nabati nako nga nagkawala ang akong bag-ohay lang nga mga pagduhaduha mahitungod sa among kaandam nga mokanta samtang misalig ko sa Espiritu sa pagpahinumdom kanako sa mga pulong.
Sa pagkahuman namo og sayaw ug nagsugod sa pagkanta, ang Espiritu mipahinumdom sa akong hunahuna sa mga pulong sa awit.
Litrato sa maayong kabubut-on sa tagsulat
Ang mga sakop sa mga tigtan-aw nasorpresa ug dayon nagmahinamon. Sa dihang natapos ang awit, hilom kaayo ang mga tawo. Dayon mibarog sila ug nagsugod sa pagkanta og awit balik kanamo, nga sa kaulahian ilang gipasabot nga kadto usa ka awit sa pasalamat nga kasagaran gigahin nila alang sa espesyal nga mga okasyon.
Kusog kaayo nakong nabati ang Espiritu nianang higayona, bisan og wala ako makasabot sa unsay gikanta nila. Mapasalamaton kaayo ko nga ang Ginoo mitabang kanako sa pagpahayag sa Iyang gugma bisan pa man sa akong mga pagbati sa kakulang. Napahinumdoman ko nga ang gugma sa Langitnong Amahan usa ka mensahe alang sa tanan. Bisan unsa pa ang atong mga kalainan, kitang tanan makasabot sa pinulongan sa Espiritu.