“E Lotogatasi o Tatou Agaga i le Pese,” Liahona, Mat. 2022.
Leo o le Au Paia o Aso e Gata Ai: Tamaitai o le Faatuatua
E Tuufaatasia o Tatou Agaga i le Pese
Na soloia le papupuni o le gagana ona sa matou iloaina Po o Ai ma po o a mea na faatatau i ai a matou pesepesega.
A o ma o atu ma la‘u uo i le vaalele i Seoul, Korea i Saute, sa luelue atu o ma ulu e faatalofa i le tinamatua mai Korea o loo nofo i le nofoa o le alasavali. Ona ma faaofiofi atu lea ma la‘u uo ma pasia o ia i o ma’ua lava nofoa, o la‘u uo i le ogatotonu ma a’u i talaane o le faamalama.
Sa na o ni nai minute talu ona matou lele ae ou faalogoina le leo lemu o se viiga. Sa ou iloaina o le “Ua Sili Oe,”1 lea ua masani ai i le tele o tapuaiga Kerisiano ma lea sa ou taulotoina talu ai nei.
Sa ou tilotilo solo ma le faautauta e tau filima’oti ai po o fea e sau ai le leo. A o ou faia lea mea, sa ou matauina ai o le tamaitai Korea i le matou atulaina sa i ona lima se tamai tusipese—na lolomiina i mataitusi FaaKorea—mai lana lotu Porotesano.
Sa vave ona fesuia’i o ma nofoa ma la’u uo ma auai lemu atu i le usuina o le pese a le fafine, ma matou fiafia faatasi ai. Sa le tautala faaPeretania o ia, ma ou te le tautala pe faitau foi i le faaKorea. Ae ou te faitauina nota.
O lea, a o ia susueina itulau o lana tusipese, ou te tilotilo i le laina muamua o nota ma lue atu pe a ou iloaina le viiga. Ona ou hamuina lea o se fati, ma amata ona ma pesepese, o ia i le faaKorea a o a’u i le faaPeretania. Na te usuina le fati, ae ou faafetaui atu i ai.
E lei leva ae auai faatasi mai le pasese i laina i luma, tua, ma o matou autafa. Mo le vaega sili atu o se itula, sa lagiina ai e le matou aufaipese e lei fuafuaina ni viiga masani faaKerisiano i a tatou lava gagana. Sa soloia le papupuni o gagana e musika ma le mea moni sa matou iloaina Po o Ai ma po o a mea na faatatau i ai a matou pesepesega. E tuufaatasia o tatou agaga i le pese.
A o lei tufatufaina e le aufaigaluega le taumafataga o le afiafi, o la matou viiga faaiu o le “Po Filemu”2—ma sa na o le ogatotonu o Oketopa.
Talu mai lena aafiaga, ua ou mafaufau ai lava i le tulaga ese, ae matagofie, o se vaega o tagata ese e tatau ona tuufaatasia o latou leo i viiga i se vaalele i luga o le Pasefika.
O loo ou maua taufeto’i i lo‘u faai i taimi uma ou te usuina ai le “Ua Sili Oe” ma le “Po Filemu.” E le mafai ona ou usuina na viiga e aunoa ma le mafaufau i lena tamaitai Korea ma le meaalofa o musika na mafai ai ona matou fefaasoaa’i lo matou faatuatuaga masani i lo tatou Faaola, o Iesu Keriso.