“Auauna Atu i Valaauga o le Ekalesia,” Liahona, Mat. 2022.
Aoaoga Autu o le Talalelei
Auauna Atu i Valaauga o le Ekalesia
E talosagaina e taitai o le Ekalesia ia tagata o le ekalesia e galulue i tofiga faapitoa ua ta‘ua o “valaauga.” O valaauga e tuuina atu ai i tagata ia avanoa e auauna atu ai i isi ma faalatalata atili atu ai i le Atua.
Ata na pueina e David Bowen Newton
Pe a tatou auauna atu i o tatou valaauga, ua tatou fesoasoani e faataunuu le galuega a le Atua. Tatou te aoao atu isi e uiga i le Tama Faalelagi ma Iesu Keriso ma fesoasoani ia i latou ia latalata atili atu ia i Laua. Tatou te maua foi faamanuiaga a o tatou auauna atu ma le faamaoni.
Mauaina o Valaauga
O i latou e auauna atu i le Ekalesia ua valaauina e le Atua. E tatalo taitai o le Ekalesia mo musumusuga ia iloa ai po o ai e talosagaina e auauna atu i valaauga taitasi. Ona talosagaina lea e se taitai se tagata o le ekalesia e auauna atu ma faamalamalama atu i ai tiute o le valaauga. Mo le tele o valaauga, e lagolagoina tagata o le ekalesia i se sauniga a le Ekalesia. E ofoina atu e tagata o le uarota po o le paranesi se palota lagolago. O lona uiga ua latou naunau e lagolago le tagata ua valaauina. Ona tuuina atu lea i le tagata o le ekalesia se faamanuiaga e se taitai perisitua. Ua ta‘ua lenei mea o le vaetofiaina. O le a tuuina atu i le tagata le pule e galue ai i le valaauga ma isi faamanuiaga e fesoasoani ia te ia e auauna atu ai.
O Epikopo
O se epikopo o le taitai o se uarota. (I se paranesi, o se peresitene o le paranesi e talitutusa ma se epikopo.) E fautuaina atu e le peresitene o le siteki se tasi e umia ma le agavaa le perisitua e valaauina e avea ma epikopo. E faamaonia e le Au Peresitene Sili le valaauga. Ona lagolagoina lea ma vaetofia le epikopo e auauna atu. Na te mauaina foi ki o le perisitua, o lona uiga ua ia te ia le pule e taitai ai le uarota. I le avea ai ma epikopo, e auauna atu o ia ma taitai tagata uma o le uarota.
Au Peresitene
O korama a le au perisitua ma faalapotopotoga a le Aualofa, Tamaitai Talavou, Peraimeri, ma le Aoga Sa e taitaia e au peresitene, e masani lava o se peresitene ma ni fesoasoani se toalua. O au peresitene o korama a toeaina e valaauina ma vaetofia e le au peresitene o le siteki. E talosagaina e le au epikopo ia tagata o le au paia e galulue i isi au peresitene o le uarota ma vaetofia i latou. E auauna atu taitai uma i tagata o a latou korama po o faalapotopotoga. Latou te auauna atu i manaoga o tagata o le ekalesia ma fesoasoani ia latou lagonaina le alofa o le Atua.
O Isi Valaauga
O isi valaauga o le Ekalesia e aofia ai le aoao atu, fesoasoani i musika, tausia o faamaumauga, fuafuaina o gaoioiga mo le autalavou po o tamaiti, ma le auauna atu i isi auala. O valaauga taitasi i le Ekalesia e taua ma e maua ai e tagata o le ekalesia se avanoa e auauna atu ai i isi ma auauna atu ai i le Atua. A o tatou galulue faatasi uma e faataunuu o tatou valaauga, tatou te faamalolosia isi ma fesoasoani i le Ekalesia ia tuputupu ae.