“Tatou Asiasi Atu i le Malumalu,” Liahona, Mat. 2022.
Leo o le Au Paia o Aso e Gata Ai: Tamaitai o le Faatuatua
Tatou Asiasi Atu i le Malumalu
Ina ua ou tatalo ia iloa pe mafai faapefea ona ou fesoasoani i lo‘u tina faaletulafono, sa ou mafaufau i le malumalu.
Ata pue o le Malumalu o Bogotá Kolomupia na saunia e Ivan Ortiz Ponce
I le taimi o le faama‘i oti o le KOVITI-19, sa tapunia ai le Malumalu o Bogotá Kolomupia. Ona sa le mafai ona ou toe auai, o nisi taimi ou te savali ai faalemafaufau i totonu o le malumalu, ma manatua ai le auaunaga sa ou tuuina atu iina o se tagata faigaluega o le malumalu.
Sa matua ma‘i tigaina lo’u tina faaletulafono i se taimi e lei leva ona amata le faanofoesea o le KOVITI-19 i Kolomupia. Ina ua ou tatalo ia iloa pe mafai faapefea ona ou fesoasoani ia te ia, sa ou mafaufau i le malumalu.
A o ou mafaufau e uiga i le malumalu, sa uunaia au e le Agaga Paia e fesili atu i lo‘u tina faaletulafono pe manao e asiasi faalemafaufau i “se tasi o nofoaga e sili ona matagofie i le lalolagi” faatasi ma a’u.
I se leo vaivai, sa ia tali mai, “Ioe.”
Sa ma vaai faalemafaufau e amata mai lona fale i Medellín, ma malaga atu i lo‘u fale i Bogotá, ona taunuu ai lea i le malumalu. Sa ma vaai faalemafaufau e ulu atu ma auauna atu i le malumalu. Sa ma vaai faalemafaufau ua nonofo faatasi i le potu selesitila, ma faia se tatalo o le lotofaafetai i le Alii.
Mulimuli ane, sa ma aioi atu i le Tama Faalelagi ina ia toe maua e lo‘u tina faaletulafono, e tusa ai ma Lona finagalo, lona soifua maloloina ma iu ai ina faatagaina e toe foi faaletino atu i le malumalu. O se aafiaga faapitoa, ma paia na faamalosia ma faamalosiauina ai o ia.
O se tasi o tala e uiga i le Faaola na aupito sili ona pa’i mai ia te au o le mea na tupu i le aai o Kapanaumi. Ua aoao mai e lenei tala ia i tatou e mafai e le Alii ona faamanuia ma faamalolo isi e ala i le fesoasoani mai tagata o aiga ma uo.
Ina ua iloa e tagata i Kapanaumi sa i ai Iesu i se fale faapitoa, sa latou aumai ia te ia se tagata sa ma‘i supa.
“Ua le mafai foi i latou ona faalatalata atu ia te ia, aua le motu o tagata, ona latou tatala lea o le ufi o le fale sa i ai o ia: ua faasosofa i ai, ona latou tuutuu ifo ai lea o le moega o taoto ai le supa.”
Ina ua silafia e Iesu lo latou faatuatua, sa Ia fetalai atu i le tagata, “Tulai ia, ma ave lou moega, ma alu i lou ala i lou fale.” (Tagai i le Mareko 2:1–12.)
E pei o le tagata ma’i supa, sa faamaloloina lo‘u tina faaletulafono e le mana o le Faaola e ala i se faamanuiaga faaleperisitua ma e ala i lona faatuatua ma le faatuatua o aiga ma uo.
I nei taimi le mautonu, ou te iloa e mafai ona tatou maua le taitaiga e faamalosia ma faamalosiau ai i latou e le tagolima. Afai tatou te liliu atu i le Tama Faalelagi ma manatua pea o Ia ma Lona Alo, e mafai ona tatou maua le filemu, faamoemoe, ma le faamalologa.