“Pe o le a Ou Alu Ese Ea?,” Liahona, Mat. 2022.
Leo o le Au Paia o Aso e Gata Ai: Tamaitai o le Faatuatua
Pe o le a Ou Alu Ese Ea?
Ina ua mavae le tiga o lo’u loto i le taimi o se gaoioiga a le Aualofa, sa i ai sa‘u faaiuga e fai.
Faatino mai e se tagata faataitai
E lei leva ona ou auai i le Ekalesia, ae talasua mai se taitai o le Aualofa e uiga i ni tulaga malie. Sa faafuasei ona amata ona ia tausua mai ia te au i luma o tagata uma. Sa ou lagona le le toafimalie ma tuu atu au lava e faatausuai mai i ai.
O lo‘u manatu muamua lava o le le toe foi mai lea i le uarota. Sa ou susueina a‘u tusitusiga paia, ma taumafai ia maua le mafanafana. A o ou faitau, sa ou tau atu i se fuaiupu lea na fesili ai Iesu ia i latou na tiga i Ana aoaoga, “Pe tou te fia o ese foi?” (Ioane 6:67).
O le taimi lava lena, sa ou tali atu ai i lou mafaufau, “Leai, o le a ou le alu ese lava!”
Sa ou valaau atu i le peresitene o le Aualofa, o le sa fautua mai ou te vili i le uso sa talasua mai ia te au. Sa ou valaau atu ia te ia ma faailoa atu i ai o‘u lagona. Sa ma faaiuina faapea o se uiga malie e lelei ae e le tatau ona tatou tausua e uiga i se tasi tatou te le iloa i luma o se vaega o tagata. Sa ma talanoa foi e uiga i le nofouta i tagata fou o le uarota.
Sa faaauau pea ona ou auai i lena uarota a o ou nofo ai i lena aai. Sa tele ni o‘u aafiaga matagofie ina ua mavae lo’u liua i le talalelei.
I la‘u malaga patino i le faatoilaloina o mea faatausuai, sa ou maua ai upu aoga nei mai o tatou taitai o le Ekalesia:
“Afai e fai mai e se tagata se mea po o se upu tatou te manatu e faatausuai, o le tatou matafaioi muamua lava, o le aua lea nei tiga le loto ae talanoa patino atu i ai, ma le faamaoni, ma tuusao i lea tagata.”1
“Ou te folafola atu ia te oe, a e filifili ia aua nei tiga lou loto … , e te lagonaina le alofa [o le Faaola] ma lana ioega.”2
Ou te faafetai sa ou filifili e le tuua le Ekalesia i se faamatalaga e le mafaufau. Ma ou te faafetai i le avea ai ma se tagata o le Ekalesia toefuataiina, lea ou te maua ai le malosi e faamaoni ai ma faaauau ai pea i luga o le ala o le avea ma soo. Ou te faafetai i fautuaga a perofeta ma aposetolo, o e aoaoina i tatou i le ala e fegalegaleai ai ma o tatou uso ma tuagane i le talalelei.
E mafai ona faaauau pea ona ou faamaoni ma filifili ia aua nei tiga. E mafai ona ou taulai atu i au lava taumafaiga ia avea e faapei o Keriso ma lagonaina le alofa ma le finagalo malie o le Faaola.
Pe o le a ou alu ese ea? Leai. E i ai sa‘u molimau o le Ekalesia toefuataiina lenei a Iesu Keriso i le lalolagi i aso nei ma o loo i ai “afioga o le ola e faavavau”(Ioane 6:68).