Valaau Mai Muamua ia te A‘u

Tusia e Diana Loski, Penisilevania, ISA

Ua ou fiafia ou te lei maimauina le avanoa e fesoasoani ai i se uso sa manaomia au ma o le sa ou manaomiaina.

Ata

o se tamaitai matua ma se tamaitai talavou o loo talatalanoa.

A o avea a‘u ma se tina talavou ma la’u pepe muamua, sa i ai pea lo‘u toalua i le kolisi. Sa ma taufai faigaluega uma faavaitaimi e faafetaia’ia ai o matou manaoga.

O le tulimatai atu i se aso e malolo ai mai le galuega, sa ou fuafua ai e matamata i se ata tifaga ua leva i le televise. O le taimi e lei i ai ni DVD po o tautua faapena.

O le a amata le tifaga i le taimi fetaui leleii—10:00 i le taeao—pe a moe lo ma atalii. E autu ia Cary Grant, o se tasi o a’u fetu o tifaga Amerika ou te fiafia i ai.

O le po a o lumanai lo‘u aso faamoemoeina, na valaau mai ai le peresitene o le Aualofa a le uarota. Sa oso faafuase’i se ma’i o se uso i le matou uarota na pe ai sona itutino, ma sa manaomia le tausiga i le aso na sosoo ai seia toe foi mai lana tama mai le galuega.

“Semanu ou te faia lenei mea e au lava ia, ae o loo i ai a’u malo,” na fai atu ai le peresitene o le Aualofa. Sa ia faamatala atu e leai se isi tagata e fesili i ai ma ofo mai e vaaia lo ma atalii a o ou tausia lea uso. Sa ou ioe ma le musuā.

O le taeao na sosoo ai, sa ou momoli ai lo ma atalii ma alu atu e asiasi i le uso ma’i. O lona igoa o Louise, ma sa faafuasei ona ou lagonaina le faananati o le alofa mo ia. Sa lava lona matua e avea ai ma ou tinamatua, o le e lei leva ona maliu.

Sa ou fesoasoani e fai ofu o Louise ona saunia lea o lana meaai o le taeao. Sa ia taumafai atu i se nofoa ma ki le televise. E lei umi ae ta le 10:00 i le taeao. A o ia faasolosolo atu i alaata i le ki taumamao, sa ia fai mai, “E leai se mea manaia i lenei televise.”

Sa ou faatuai ona ou fai atu lea, “O loo i ai se ata tifaga a Cary Grant i le alaata 11.”

“E mo’i?” na ia fesili mai ai. “Ou te fiafia lava ia Cary Grant!”

Sa ma matamata faalelei i le tifaga ma fiafia ai. Mulimuli ane, sa ia faasoa mai ni mea e uiga i lona olaga a o pei o lo’u matua. Sa ia faamatala mai ia te au e uiga i lana tama tama, ma sa ou tau atu ia te ia e uiga i la‘u tama. Sa ia talanoa e uiga i le Ekalesia ma lona misia.

Ina ua toe foi mai lana tama, sa ou folafola atu o le a ou toe alu. Sa ou fai atu i le peresitene o le Aualofa e valaau muamua mai ia te au pe afai e manaomia e Louise se tasi.

I se taimi i le lua vaiaso na sosoo ai, na toe stroke ai Louise ma maliu ai ae ou te lei maua se avanoa e toe vaai ai ia te ia. Sa na o le iva itula ma se tifaga na ma mafuta faatasi ai, ae na avea o ia ma se uo pele. Ou te mafaufau soo ia te ia.

Ou te faafetai ona ou te lei maimauina le avanoa e fesoasoani ai i se uso sa manaomia au—ma o le sa ou manaomia, e ui ou te lei iloaina.