Frá Síðari daga heilögum
Blessa áa mína
Þegar ég fékk patríarkablessunina mína, fylltist hjarta mitt elsku til áa minna.
Ljósmynd frá Richard M. Romney
Ég fæddist í Kamerún, landi áa minna. Ég flutti síðan til Frakklands, þar sem ég bjó, lærði og starfaði sem hjúkrunarfræðingur á ýmsum sjúkrahúsum í París. Ég bý nú í Montreal, þar sem ég starfa enn sem hjúkrunarfræðingur.
Ég hafði leitað að hinni sönnu kirkju Jesú Krists um árabil. Þegar ég hitti trúboðana í París vitnaði heilagur andi fyrir mér að ég hafði loks fundið það sem ég var að leita að – Kirkju Jesú Krists hinna Síðari daga heilögu. Ég fylltist svo mikilli gleði að mér fannst að ég hlyti nú þegar að vera á himnum! Ég var staðráðin í að lifa til fulls eftir fagnaðarerindinu.
Mér var kennt að leita að áum mínum og vinna að helgiathöfnum fyrir þeirra hönd í musterinu. Þegar ég fékk patríarkablessunina mína, var mér sagt að ég myndi verða frelsari á Síonarfjalli og færa fjölskyldu minni hjálpræði. Hjarta mitt fylltist elsku til þeirra; ég gat ekki brugðist þeim. Frá því hef ég unnið sleitulaust við ættarsögu og ættfræði.
Ég hafði alltaf vitað að ég fæddist í konungsfjölskyldu Kamerún, Bamoun-fjölskylduna. Munnmæli og arfsögn segja að þetta fólk hafi komið frá Assýríu og blandast öðru fólki meðan á búferlaflutningunum stóð. Það hafði viðhaldið ættfræði sinni og skrifað sögu sína frá 1300 e.Kr. Skjölin eru í bókasafni konungshallarinnar. Meðal margra annarra sagna, segja þau sögu langafa míns móður megin, Fon-gouhouo, sem ríkti frá 1818 til 1863.
Ég gat snúið aftur til heimalands míns og sem meðlimur í Bamoun-fjölskyldunni fékk ég aðgang að þessum skjölum. Ég heimsótti einnig konunginn, hitti aðra embættismenn og talaði við stjórnvöld um kirkjuna og áhuga hennar á ættarsögu. Þökk sé hinu endurreista fagnaðarerindi að ég get lagt mitt af mörkum við að blessa heimaland mitt og áa mína.