មូលដ្ឋានគ្រឹះនៃដំណឹងល្អ
ព្រះមានព្រះបន្ទូលមកកាន់យើងសព្វថ្ងៃនេះ
ព្រះវរបិតាសួគ៌មានព្រះទ័យចង់ជួយដល់យើង ។ តើយើងកំពុងស្ដាប់ដល់ទ្រង់ទេ ?
កាលពីពីររយឆ្នាំមុន ព្រះវរបិតាសួគ៌ និងព្រះយេស៊ូវគ្រីស្ទ បានបង្ហាញព្រះកាយដល់យុវជនម្នាក់ឈ្នោះ យ៉ូសែប ស្ម៊ីធ ។ ការនិមិត្តដំបូងបង្រៀនយើងនូវសេចក្ដីពិតដ៏សំខាន់ទាំងឡាយ ។ ព្រះយេស៊ូវកំពុងដឹកនាំសាសនាចក្រមួយនៅលើផែនដីម្ដងទៀត ។ មានពួកព្យាការីសព្វថ្ងៃនេះដូចជានៅជំនាន់បុរាណដែរ ។ ហើយព្រះស្គាល់ឈ្មោះរបស់យើងម្នាក់ៗ និងកំពុងស្ដាប់ការអធិស្ឋានរបស់យើង ។ យើងមានពរ ពេលយើងព្យាយាមស្ដាប់ព្រះសូរសៀងរបស់ទ្រង់ជារៀងរាល់ថ្ងៃ ។
តើអ្វីជាវិវរណៈ ?
ពេលព្រះមានព្រះបន្ទូលមកកាន់បុត្រាបុត្រីទ្រង់ វាត្រូវបានហៅថា « វិវរណៈ » ។ មានវិវរណៈប្រភេទខុសៗគ្នា ។
វិវរណៈផ្ទាល់ខ្លួនគឺពេលដែលព្រះមានព្រះបន្ទូលមកកាន់យើងម្នាក់ៗតាមរយៈព្រះវិញ្ញាណបរិសុទ្ធ ។ ទ្រង់អាចលួងលោម និងណែនាំយើង ។
យើងអាចទទួលវិវរណៈអំពីរបៀបដើម្បីជួយពួកអ្នកដែលយើងត្រូវបានហៅឲ្យដឹកនាំផងដែរ ។ ឧទាហរណ៍ ឪពុកម្ដាយអាចទទួលវិវរណៈអំពីគ្រួសាររបស់ពួកគេ ហើយប៊ីស្សពអាចទទួលវិវរណៈអំពីវួដរបស់គាត់ ។
មានតែព្យាការីប៉ុណ្ណោះដែលអាចទទួលវិវរណៈសម្រាប់សាសនាចក្រទាំងមូល ប៉ុន្តែយើងម្នាក់ៗអាចអធិស្ឋានដើម្បីដឹងថាបើអ្វីដែលថ្នាក់ដឹកនាំរបស់យើងបង្រៀនជាការពិតឬទេ ។
រូបថតក្មេងស្រីនៅលើកៅអីវែងនៅព្រះវិហារ ដោយ មីហ្គែល អេ អនន័រស៍ ត្រូនខូសខ៍ ។ រូបថតស្ត្រីកំពុងអធិស្ឋាន ដោយ ខាធើរីន ហ្វ្រស្ត ។ រូបថតបុរសនៅក្នុងព្រៃ ដោយ ដេវីដ វិនធើរ ។ ព្រះយេហូវ៉ារក្សាការសន្យាមួយ ដោយ សេម ឡឡូ ។
តើខ្ញុំអាចអញ្ជើញវិវរណៈដោយរបៀបណា ?
យើងអាចនិយាយទៅកាន់ព្រះវរបិតាសួគ៌ដែលពេញដោយក្ដីស្រឡាញ់ ពេញដោយព្រះចេស្ដាទាំងអស់ ដែលត្រាស់ដឹងការណ៍ទាំងអស់ នៅពេលណាក៏បានតាមរយៈការអធិស្ឋាន ។ ទ្រង់ចង់ឲ្យយើងអរព្រះគុណទ្រង់សម្រាប់ពរជ័យទាំងឡាយ និយាយទៅកាន់ទ្រង់អំពីជីវិតយើង និងទូលសូមអ្វីដែលយើងត្រូវការ ។ បន្ទាប់មកយើងគប្បីយកចិត្តទុកដាក់ទៅលើគំនិត និងអារម្មណ៍ដែលមកពីព្រះវិញ្ញាណបរិសុទ្ធ ដែលទ្រង់ដូចជាសារទូតមកពីព្រះវរបិតាសួគ៌ ។
តើវិវរណៈមានសំឡេងបែបណាដែរ ?
ពុំមានវិធីតែម្យ៉ាងដើម្បីពិពណ៌នាអំពីវិវរណៈនោះទេ ។ ព្រះមានព្រះបន្ទូលមកកាន់យើងម្នាក់ៗ ក្នុងរបៀបមួយដែលយើងនឹងយល់ ( សូមមើល គោលលទ្ធិ និង សេចក្ដីសញ្ញា ១:២៤ ) ។ ពេលខ្លះមនុស្សមានបទពិសោធន៍នៃការយល់សុបិន និងការនិមិត្ត ។ ប៉ុន្តែជាញឹកញាប់ ព្រះមានព្រះបន្ទូលមកកាន់យើងតាមរយៈអារម្មណ៍ដ៏ស្ងប់ស្ងាត់ពីព្រះវិញ្ញាណបរិសុទ្ធ ដូចជាអារម្មណ៍កក់ក្ដៅ សុខសាន្ត ឬអំណរ ។
នៅក្នុងការសិក្សាខែនេះអំពី គោលលទ្ធិ និង សេចក្ដីសញ្ញា យើងអានអំពី អូលីវើរ ខៅឌើរី ដែលបានទទួលការបង្រៀនថា វិវរណៈនឹងចូលមកក្នុងគំនិតគាត់ផង និងដួងចិត្តគាត់ផង ( សូមមើល គោលលទ្ធិ និង សេចក្ដីសញ្ញា ៨:២ ) ។
តើមានគំរូអ្វីខ្លះនៅក្នុងព្រះគម្ពីរអំពីវិវរណៈ ?
ដំណើររឿងក្នុងព្រះគម្ពីរជាច្រើនពិពណ៌នាអំពីព្រះមានព្រះបន្ទូលទៅកាន់ប្រជាជនរបស់ទ្រង់ ៖
-
ព្រះបានប្រាប់ណូអេពីរបៀបថែរក្សាគ្រួសារលោកឲ្យមានសុវត្ថិភាព ( សូមមើល លោកុប្បត្តិ ៦:១៧–១៨ ) ។
-
ព្រះវរបិតាសួគ៌ និងព្រះយេស៊ូវគ្រីស្ទ បានលួងលោមសិស្សរបស់ទ្រង់ម្នាក់ឈ្មោះ ស្ទេផាន ( សូមមើល កិច្ចការ ៧:៥៥ ) ។
-
វិវរណៈបានជួយនីហ្វៃឲ្យរក្សាព្រះបញ្ញត្តិ ( សូមមើល នីហ្វៃទី១ ៤:៦ ) ។
-
ខណៈដែលព្រះគម្ពីរផ្សេងៗទៀតចេញមកពីកំណត់ត្រាទាំងឡាយពីបុរាណ នោះព្រះគម្ពីរ គោលលទ្ធិ និងសេចក្តីសញ្ញា ត្រូវបានចងក្រងឡើងអំពីវិវរណៈក្នុងសម័យទំនើប ។ ឆ្នាំនេះ យើងមានឱកាសពិសេសនៃការសិក្សាព្រះគម្ពីរមួយ ដែលពោរពេញដោយព្រះបន្ទូលរបស់ព្រះអម្ចាស់ផ្ទាល់ៗតែម្ដង ។