3 ka mga Leksyon sa Kinabuhi gikan sa Moroni
Gikan sa sinugdanan hangtud sa katapusan, ang Basahon ni Mormon usa ka nagpadayon nga pag-uswag sa gamhanang mahangturon nga mga kamatuoran, talagsaong mga saad ug mga leksyon ug makapadasig nga mga ehemplo sa hugot nga pagtuo diha ni Jesukristo. Ug ang pinakanindot nga bahin mao nga kining tanan tinuod!
Apan kon kita nagsingabot na sa katapusan ug nakaabut na sa mga kapitulo ni Moroni, siya sigurado nga adunay pipila ka labing gamhanan nga mga kamatuoran ug makapausab nga leksyon alang kanato! Gitapos ni Moroni ang Basahon ni Mormon sa iyang talagsaon nga pagpamatuod ug sa iyang personal nga imbitasyon sa pagduol ngadto ni Kristo ug magtinguha nga masayud sa kamatuoran sa atong kaugalingon mismo. Apan taliwala niadtong gamhanan nga mga pamahayag, ania ang dugang nga tulo ka mga leksyon nga makapausab sa kinabuhi nga atong makat-unan gikan sa iyang katapusang mga kapitulo niining talagsaon nga basahon.
1. Tan-aw Lapas sa Katapusan
Adunay usa ka makatagbaw nga pagbati nga moabut sa katapusan sa usa ka malisud apan magantihon nga proyekto: pagbutang sa katapusang piraso sa jigsaw puzzle o sa pagsumiter sa labing nindot nga proyekto sa eskwelahan.
Si Moroni naghunahuna nga nahuman na siya sa iyang kontribusyon sa Basahon ni Mormon human marekord ang pagkapukan sa Jaredite nga nasud nga makita diha sa basahon ni Ether. Nagsugod siya sa, “Karon ako, si Moroni, human makatapos sa pagmubo sa asoy sa mga katawhan ni Jared, ako nagtuo nga dili na mosulat og dugang pa, apan ako karon wala pa mamatay” (Moroni 1:1).
Ang kamatuoran nga siya buhi pa tingali miabut nga mura og usa ka surprisa kay sa inyong gituohan. Total, naglatagaw siyang nag-inusara, nga anaa ang mga kaaway sa matag habig.
Aduna pa siyay panahon nga mabuhat unsay iyang buhaton. Ug sa 10 lamang ka kapitulo, gipahimuslan kini ni Moroni. Ang pipila sa mga kamatuoran nga iyang gilakip mao ang mga pamaagi sa pag-orden og mga teacher ug mga priest; mga instruksyon alang sa sakramento (lakip ang mga pag-ampo); mga pagtulun-an kon unsaon sa pagpahigayon og mga miting sa Simbahan; usa ka gamhanan nga pakigpulong sa iyang amahan bahin sa hugot nga pagtuo, paglaum, ug gugma nga putli; ug ang sagrado nga saad nga makita diha sa Moroni 10:3–5 nga nagtudlo sa matag usa kanato kon unsaon sa pagdawat og personal nga pagpadayag mahitungod sa katinuod sa Basahon ni Mormon. Wow!
Kadtong 10 ka kapitulo wala gani niya planoha sa pagsulat, gidugang ni Moroni ang mga malisod nga mga kamatuoran alang sa umaabut nga mga magbabasa sa Basahon ni Mormon.
Kitang tanan makakat-on gikan sa iyang ehemplo. Sa sunod higayon nga makakaplag kamo og dyutayng panahon nga nahabilin kay sa gilauman, o kon inyong nabati nga kamo nagtrabaho og maayo ug labing siguro angay nga nahuman na unta, angay lang ba nga mag-ampo ug mamalandong sa pagdiskobre kon aduna pa bay diyutay nga imong matampo?
Total, ang tibuok kalibutan napanalanginan tungod sa gihimo ni Moroni.
2. Hinumdumi ang Kahon nga Bato
Kon nakahukom kamo sa pagpatubo sa inyong paborito nga punoan sa kahoy sa inyong tugkaran, kinahanglan kamo nga mopakita og dugang pa nga pailub. Bisan kon mao kini ang husto nga panahon sa tuig ug anaa ang maayong mga panahon sa pagpatubo, lagmit modagngat pa gihapon og pipila ka tuig gikan sa pagpu-po sa unang bunga sa inyong paningkamot.
Apan mahimo gyud gihapon, dili ba? Total, maayong mga butang moabut niadtong kinsa mohulat. Ug bisan kon kamo nananom og laing matang sa kahoy kana dili moabut sa hingpit nga pagkagulang sulod sa daghang mga siglo (sama sa usa ka kahoy nga oliba), makabaton pa kamo og katagbawan nga mahibalo nga ang inyong mga anak ug apo makabenepisyo.
Walay usa ninyo nakabuhat sa gibuhat ni Moroni, bisan pa man. Ang buhat sa kinabuhi sa iyang amahan, nga nahimong buhat ni Moroni human namatay ang iyang amahan, dili pa gayud makapamunga. Dili pa sa 10 ka tuig. Dili pa sa liboan ka tuig. Si Mormon misulat, “Kini nga mga butang gisulat ngadto sa salin sa balay ni Jacob … ug sila pagatagoan ngadto sa Ginoo nga sila motungha diha sa iyang kaugalingon nga tukma nga panahon” (Mormon 5:12).
Si Moroni wala masayud kon kanus-a ang eksaktong higayon nga kining buhat motungha, apan tingali siya adunay maayong ideya nga kini dugay pa. Siya nakakita og panan-awon sa atong panahon ug nanagna sa piho nga mga kondisyon nga moabut (tan-awa sa Mormon 8:35).
Kini ang atong nasayran nga sigurado: si Moroni wala naghimo niini alang sa kaayohan sa iyang pamilya o mga higala o gani sa mga kaila. Pipila sa labing makatandog nga mga pulong nga sukad nahisulat, miingon si Moroni: “ako nag-inusara. Ang akong amahan namatay diha sa away, ug ang akong tanan nga mga kabanay, ug ako wala nay mga higala ni dapit nga kapaingnan; ug hangtud kanus-a ang Ginoo motugot nga ako mabuhi ako wala masayud” (Mormon 8:5).
Siya nawad-an sa tanan niya nga pamilya. Tanan niyang mga higala. Iyang tibuok sibilisasyon! Ug sa dihang nahuman na siya sa iyang rekord, naghimo siya og usa ka kahon nga bato sa pagsilyo sa sagrado nga rekord nga dili makita ang kahayag sa adlaw alang sa mga gatusan ka tuig.
Ang Pagpuyo nga matarung makamugna og positibong mga kausaban sa kalibutan. Usahay kadtong ginagmayng mga buhat modangat pa og daghang henerasyon sa dili pa ang hingpit nga epekto. Apan si Moroni nagtudlo kanato nga kanunay kitang makasalig sa tayming sa Dios. Kinahanglan lang kita mohimo sa atong bahin.
3. Maghupot og usa ka Mahangturon nga Panglantaw
Magpakatinuod kita: ang mga pagsulay moabut, ang kinabuhi dili patas, ug usahay, ang tanang butang makapasakit lang. Ang kinabuhi lisud kon naghunahuna kita nga sa katapusan nakalahutay kita sa usa ka pagsulay, hangtud lain na usab nga hut-ong sa pagsulay ang moabut.
Mahimong nagsagubang kita og kabalaka o depresyon, pagkawala sa minahal, o sa uban nga mga hagit, usahay ang pagpabilin sa pagtuo ug paglaum ingon og malisud. Niining malisud nga mga higayon sayon ra nga maghunahuna, “Unsang hitaboa nga ang mga butang nagkagrabe na man?”
Nan, alang kang Moroni, kana usa ka tinuod nga pahayag. Ang mga butang tingali wala nay mas grabe pa alang kaniya sa hinapos sa iyang kinabuhi. Atol sa malisud nga panahon, kon ang pamati mura na og wala nay rason sa pagpadayon o magpabilin sa paglaum, makatan-aw kita niining ehemplo sa dili matandog nga pagtuo diha sa atubangan sa daghan kaayong kalaglagan.
Ang uban motawag sa kinabuhi ni Moroni nga usa ka makalilisang. Bisan kon siya nagmatinud-anon, nawad-an siya sa tanan nga iyang gimahal. Siya mao ang katapusang nahabilin sa iyang tibuok sibilisasyon. Kinahanglan niyang humanon ang rekord sa iyang amahan tungod kay si Mormon gipatay sa wala pa siya nakaangkon og higayon sa paghuman. Ug si Moroni nga gipangita sa mga Lamanite ug nagtago tago alang sa iyang kinabuhi sa dihang siya misulat sa iyang basahon sa kasulatan.
Mahunahuna ba ninyo kon unsa ka makalilisang ug kawalay paglaum kadto nga sitwasyon? Kon adunay tawo nga nakasinati og mga pagsulay sama ni Moroni, tingali matintal sila sa pagbiya sa ilang pagtuo, sa paglimud kang Kristo, ug sa pagbasol sa Langitnong Amahan alang sa ilang makalilisang nga mga kahimtang. Apan wala buhata ni Moroni.
Hinoon, nagpadayon si Moroni hangtud sa katapusan (tan-awa sa Moroni 1:3). Iyang gihuptan ang usa ka mahangturong panglantaw sa pagtabang kaniya sa pag-atubang sa iyang mga hagit. Nasayud siya unsay tinuod ug nasayud nga bisan unsa ang nahitabo ngadto kaniya, basta nagbaton siya og pagtuo diha sa Manluluwas ug misalig sa Langitnong Amahan, ang tanang mga panalangin nga iyang gisaad matuman usa ka adlaw, ug siya maluwas pinaagi sa gahum ni Jesukristo ug sa mga panalangin sa Iyang Pag-ula (tan-awa sa Moroni 10).
Karon, mao kana ang usa ka gamhanan nga pagpamatuod.
Kon ang mga butang ingon og grabe na kaayo, makakuha kita og kahupayan diha sa mahangturon nga panglantaw ug pag-ugmad og hugot nga pagtuo sama kang Moroni. Kon ato kining buhaton, kita gisaaran nga kita “makahimo sa tanan nga mga butang nga maayo ngadto kang [JKristo]” (Moroni 10:23). Mahimo kita nga masayod nga ang Langitnong Amaan maga-uban kanato. Makasalig kita nga ang Iyang plano sa kalipay makahatag og paagi alang kanato aron mabuntog ang matag usa ka kalisdanan nga atong atubangon sa mortalidad. Ug atong mapalibutan ang atong kaugalingon sa kahayag, kalipay, ug mga panalangin sa gipahiuli nga ebanghelyo ni Jesukristo.
Inubanan sa mahangturong panglantaw, kita sa kanunay makabaton og rason nga molaum. Ug kita makasalig nga usa ka adlaw kitang tanan makaingon nga, “Unsang hitaboa nga ang mga butang nagkaayo na man?”