Sa Digital Lamang
Sa unsang paagi ang Basahon ni Mormon Mitabang Kanako sa Paglahutay sa Pagpahilayo gikan sa mga Tawo
Akong nabasa ang Basahon ni Mormon sa makadaghang higayon, apan niining higayuna akong mas naamguhan ang hingpit nga gahum nga mahatag niining basahon sa atong kinabuhi.
Akong nabasa ang mga kapitulo ni Moroni sa Basahon ni Mormon sa makadaghan, apan niining tuiga nabati nako nga duol kaayo ngadto kaniya. Sa katapusan, nahibulag siya gikan sa tanan niya nga mga minahal. Lagmit nagmagul-anon siya kaayo atol sa iyang katapusang mga adlaw. Apan bisan taliwala sa pag-inusara, nahinumdom siya kon unsay gitudlo sa iyang amahan kaniya mahitungod sa pagbaton og usa ka buluhaton (tan-awa sa Moroni 9:6). Mao kadto nga samtang nag-atubang og walay kasiguroang kaugmaon nga giminubo niya ang mga rekord sa mga katawhan nga Jaredite ug gilakipan sa dinasig nga mga mensahe alang kanato kabahin sa hugot nga pagtuo, paglaum, ug gugma nga putli.
Nadasig ko sa kaisug ni Moroni tungod sa daghang pagsulay nga gisagubang sa kalibutan niining tuiga, lakip sa COVID-19 nga pandemya. Daghan kanato sa tibuok kalibutan napugos ngadto sa pagpalayo sa katilingban niining tuiga, ang pipila kanato nagkinahanglang ibulag ang atong kaugalingon gikan sa mga tawo nga atong gimahal. Kinahanglan usab ko nga mohimo nianang malisud nga desisyon.
Usa ako ka doktor sa bata, ug anaa sa front line ang akong trabaho aron sa paghatag sa mga bata sa dinalian ug emerhensya nga pag-atiman didto sa Maranhão, Brazil. Atol niining pandemya, mihimo ko sa lisud nga desisyon sa paglikay sa pisikal nga pakigduol uban sa akong minahal nga bana, dos anyos nga anak nga babaye, ugangang babaye, ug mga pag-umangkon (kinsa nagpuyo ang tanan diha sa akong panimalay), lakip sa tanan nga uban nakong pamilya ug mga higala sa laing dapit. Akong gipahilayo ang akong kaugalingon aron malikayan ang posible nga pagtakod sa sakit.
Ang pagpahilayo sa katilingban malisud tungod kay ang akong pamilya suod kaayo. Matag Dominggo magpundok kami alang sa paniudto. Aduna usab kami regular nga mga gabii sa pamilya. Sa wala madugay akong nadiskobrehan nga kon wala sila, mibati ko og kaguol ug pag-inusara. Hinoon, nakahukom ko nga mogahin og dakong panahon sa pagbasa sa Basahon ni Mormon aron sa pagdapit sa Espiritu ngari sa akong kinabuhi. Akong nakat-unan nga ang pagbaton sa Espiritu Santo isip akong makanunayon nga kauban makatabang nako nga mo-focus sa pagpasalamat ug kaayo, nagpakita kanako kon unsaon sa pagserbisyo sa uban, ug gipalibutan ako sa gugma sa Manluluwas atol sa malisud nga mga panahon.
Usahay maghunahuna ko kon unsa kaha ka makahupay alang kang Moroni sa pagbasa sa mga pulong sa iyang amahan, si Mormon, human siya mamatay. Gisulayan nako sa paggamit ang iyang mga pulong ngari kanako: “Pagmatinud-anon diha kang Kristo [anak ko]; … hinaut unta nga si Kristo mobayaw kanimo” (Moroni 9:25). Akong nakat-unan nga Siya mobuhat kanunay! Ang Manluluwas makahatag kanato og gahum nga labaw pa kay sa tanang mga problema nga atong atubangon niining gubot nga kalibutan ug motabang kanato nga magpadayon sa paglaum.
Maingon man kalisud niining tuiga, mapasalamaton kaayo ko niining kasinatian nga nakapalig-on sa akong pagpamatuod ni Jesukristo ug mitudlo kanako sa pagbutang sa akong hingpit nga pagsalig diha Kaniya sama sa gibuhat ni Moroni. Samtang nagbasa ko sa istorya kabahin ni Jesukristo sa Amerika, nakaamgo ko nga sa wala pa ang Iyang pag-abut, ang yuta sa mga Nephite nakasinati og nagpadayon nga talagsaon ug maanindot nga mga kausaban (tan-awa sa 3 Nephi 11:1). Sigurado, sa dili pa mobalik ang Manluluwas, kita makahimo sa atong kaugalingon nga mga kausaban, mangandam sa atong kaugalingon sa pagsugat Kaniya pag-usab. Nasayud ko nga ang tanang mga hagit nga nasinati natong tanan makahatag kanato og oportunidad nga makatabang kanato sa pagsugat Kaniya.
Nasayud ko nga si Jesukristo akong Manluluwas. Siya mao ang kahayag nga akong gikinahanglan aron mogiya kanako kon ang dalan walay kasiguroan. Ako nasayud nga ang Basahon ni Mormon mao ang usa ka tugon kabahin Niya. Ang mga kamatuoran nga makita diha nianang basahon makatabang gayud kanato nga makabalik ngadto Kaniya ug makabaton og kalig-on ug kaisug ug hugot nga pagtuo sa panahon sa krisis. Nasayud ko nga kini nakatabang alang kanako.