Bisop L. Todd Budge
Seken Kaonsela long Prisaeding Bisoprik
Afta we hem i givim seves blong 18 manis olsem wan Jeneral Atoriti Seventi, oli sastenem Bisop L. Todd Budge olsem Seken Kaonsela long Prisaeding Bisoprik. Hem i tekem ples blong Bisop Dean M. Davies, we oli bin singaotem hem olsem Jeneral Atoriti Seventi.
Bisop Budge i graduet long Brigham Yang Yunivesiti long 1984, wetem wan digri long ekonomi. Hem i bin wok blong Bain & Company Japan; Citibank, N.A.; mo GE Capital long Japan mo Atlanta, Jojia, YSA. Hem i kam presiden mo jif eksekutiv ofisa blong Tokyo Star Bank Limited long 2003, mo wok olsem bank jeaman blong bod stat long 2008 go kasem 2011. Mo tu, hem i bin stap olsem wan memba blong bod blong ol daerekta blong Hawaiian Airlines.
Long wan taem long laef blong hem, taem we Bisop Budge i lukluk se bae hem i jenisim kaen wok we hem i stap mekem, hem i kasem sam gudfala advaes. Wan man i talem long hem: “i gat nid blong ol pipol wetem tru mo stret fasin long bisnis,” mo i ademap se kaen rod blong wok ia bae i save givim hem fulap janis blong givim kaonsel mo helpem ol pipol.
Wok blong Bisop Budge i rili givim hem sam janis blong save lidim tingting blong mekem gud samting insaed long bisnis wol, mo tu, hem i openem ol doa blong serem gospel long Japan, wan ples we hem i bin stap olsem wan misinari bifo, long Japan Fukuoka Misin. Afta long hemia, hem i bin stap olsem presiden blong Japan Tokio Misin.
“Gud nius blong gospel” hem i tijim, “i no promes blong wan laef we i fri long harem nogud mo hadtaem, be wan laef we i fulap long stamba tingting mo mining—wan laef we ol bigfala harem nogud mo ol hadtaem blong yumi, ‘glad blong Kraes i kavremap olgeta.’ [Alma 31:38].”1
Lawrence Todd Budge i bin bon long 29 Disemba 1959, long Pitsbeg, Kalifonia, YSA. Hem i mitim Lori Capener long ol fas yia blong skul long Brigham Yang Yunivesiti. Tufala i mared long 1981 long Logan Yuta Tempol. Tufala i papa mo mama blong sikis pikinini.
Bifo long koling blong hem olsem wan Jeneral Atoriti Seventi, Bisop Budge i bin stap olsem wan Eria Seventi, stek presiden, stek eksekutiv sekretari, stek Yang Man presiden, bisop, mo presiden blong kworom blong ol elda.