God Bae I Mekem Wan Samting we Yumi No Save Bilivim
God i rere long ol pikinini blong Hem mo Jos blong Hem long taem ia.
I no longtaem afta we oli kasem Vale blong Sol Lek, ol Lata-dei Sent oli stat blong bildim wan tabu tempol blong olgeta. Oli filim se oli faenem ples blong oli save wosipim God long pis mo oli fri long ol hadtaem.
Be, taem we fandesen blong tempol we kolosap i finis, wan ami blong ol soldia blong Yunaeted Stet oli fos blong putum wan niu gavna.
From se ol lida blong Jos oli no save se ol ami ia oli nogud olsem wanem, Brigham Yang i givim oda long ol Sent blong oli muvaot mo berem fandesen blong tempol ia.
Mi save se sam memba blong Jos oli stap tingting se from wanem ol hadwok blong olgeta blong bildim kingdom blong God oli stap spolem oltaem.
Afta, denja i bin pas, mo oli digimaot mo jekem fandesen blong tempol. Afta long hemia nao i mekem ol paeonia oli faenemaot se sam long ol ston oli bin brok, mekem se i no save holemtaet fandesen ia.
From samting ia, Brigham i mekem olgeta i fiksim fandesen ia mekem se bae hem i save holem taet granit ia,1 we i strong inaf blong sapotem ol wol blong naesfala Sol Lek Tempol.2 Laswan, ol Sent oli save singsing hym ia “Tijing blong Jisas Oli Stamba blong Yumi”3 mo save se tabu tempol blong olgeta oli bildim long wan strong fandesen we bae i stap long plante jeneresen.
Stori ia i stap tijim yumi olsem wanem nao God i yusum ol hadtaem blong mekem ol wok blong Hem.
Wan Wol Sik
Sapos hem i luk semmak long wanem we yumi stap fesem tedei, hem i from i stap hapen.
Mi no ting se bae i gat wan man we i harem voes blong mi, o ridim ol toktok blong mi,i no stap fesem wol sik ia.
Long olgeta we oli lusum wan memba blong famli mo ol fren, mifala i krae sore wetem yufala. Mifala i plis long Papa long Heven blong Hem i givim yufala kamfot mo mekem yufala i harem gud.
Ol longtaem samting we vaeres ia bae i mekem long yumi i bitim blong spolem nomo helt blong bodi. Fulap famli oli lusum mane, oli stat blong hanggri, oli no sua, oli no andastanem wanem i stap. Mifala i laekem ol efot blong yufala blong stopem sik ia blong i go raon. Mifala i glad long kwaet sakrifaes blong yufala mo efot we i hae blong olgeta we oli putum laef blong olgeta long denja blong helpem, hilim, mo sapotem olgeta pipol we oli stap long nid. Hat blong mifala i fulap wetem tangkyu from gud fasin mo sore blong yufala.
Mifala i prea strong se God bae i openem skae mo fulumap laef blong yufala wetem ol blesing blong God we i no save finis.
Yumi Ol Sid
I gat fulap we yumi no save abaot vaeres ia. Be i gat wan samting we mi save long hem, hem i we vaeres ia i no mekem Papa long Heven i sek long hem. Hem i no nid blong pulum plante ami blong enjel, singaotem ol imejensi miting, o pusum han long dipatmen blong krietem ol wol blong stretem wan sapraes nid.
Mesej blong mi blong tedei, hem i we, iven long taem blong wol sik ia we yumi no wantem, God i bin mekem rere ol pipol blong Hem mo Jos blong Hem from taem ia.
Bae yumi gotru wetem strong tingting long hemia, yes. Be bae yumi mekem moa bitim blong kakae tut blong yumi, holemtaet, mo wet blong ol samting oli kambak nomol. Bae yumi i muv i go fored, bae yumi kam gud moa.
Long wan wei ia, yumi ol sid. Mo blong ol sid oli kasem tru paoa we oli save kam olsem, oli mas berem olgeta bifo oli gro. Hem i witnes blong mi se long taem we yumi filim se oli berem yumi long ol hadtaem blong laef o tudak i raonem yumi, lav blong God mo ol blesing blong gospel blong Jisas Kraes we i kambak bae i karem ol samting i kam we yumi no save bilivim se bae i gro.
Ol Blesing Oli Kam Aot long Hadtaem
Evri dispensesen oli fesem ol tes mo hadtaem.
Inok mo ol pipol blong hem oli laef long wan taem we i gat fulap fasin nogud, ol wo, mo blad i ron. “Be Lod i kam mo stap wetem ol pipol blong Hem.” Hem i bin gat wan samting we oli no bilivim we i stap long maen blong Hem long saed blong olgeta. Hem i bin help blong stanemap Saeon—wan pipol “blong wan hat mo wan maen” we oli “bin stap laef long wan gud mo stret fasin.”4
Yangfala Josef, pikinini boe blong Jekob, oli sakem hem i go long wan hol, oli salem hem blong hem i kam wan slef, oli giaman long hem, mo oli ronwe long hem.5 Josef i mas askem hemwan se God i fogetem hem finis o no. Be God i gat wan samting blong Josef, we oli no save bilivim . Hem i yusum taem blong tes ia blong mekem Josef i kam moa strong long fasin blong hem mo i putum hem long wan ples we bae hem i save sevem ol famli blong hem.6
Tingbaot Josef Smit, Profet we i prisena long Libeti Kalabus, long hao nao hem i prea strong blong ol sent oli nomo harem nogud. Hem i mas askem hemwan se olsem wanem nao bae oli save stanemap Saeon long wan kaen taem olsem. Be Lod i toktok long hem wetem pis, mo wetem wan naesfala revelesen we i kam wetem we i karem pis i kam long ol Sent—mo i gohed blong karem pis kam long yu mo mi.7
?Hamas taem long ol fas yia blong Jos Ia blong Jisas Kraes blong Ol Lata-dei Sent we ol Sent oli lusum hop mo stap askem olgetawan sapos God i fogetem olgeta o no? Be tru long ol fasin blong agens, ol denja mo ol toktok blong kilimded olgeta evriwan,Lod God blong Isrel i gat wan samting we i stap long maen blong Hem blong ol smol sipsip blong Hem. Wan samting we oli no save bilivim.
?Wanem moa yumi lanem long ol eksampol ia—mo handred long ol narafalawan we oli stap long skripja?
Faswan: Ol man we oli stret mo gud oli no givim fri pas long olgeta blong oli no pas tru long vale blong tudak. Yumi evriwan i mas wokabaot tru long ol hadtaem ia, from hem i taem long taem blong ol hadtaem nao we yumi lanem ol prinsipol we i save mekem ol fasin blong yumi oli kam strong moa mo mekem yumi save kam moa kolosap long God.
Nambatu: Papa blong yumi long Heven i save se yumi safa, mo from se yumi ol pikinini blong Hem; bae Hem i no ronwe long yumi.8
Tingabaot Hem we i gat lav mo sore, Sevya ia, we i spendem ful laef blong Hem blong givhan long olgeta we i sik, we oli stap olgetawan, we oli gat tu tingting mo lusum hop.9 ?Yu ting se Hem i no tingbaot yu tedei?
Ol dia fren blong mi, ol brata mo sista we mi lavem tumas, God bae i lukaotem yumi mo bae i lidim yu long ol taem we yu no save wanem bae i hapen mo ol taem blong fraet. Hem i save yu. Hem i harem ol krae blong yu. Hem i fetful mo yu save dipen long Hem. Hem bae i mekem promes blong Hem i kamtru.
God i gat wan samting we yu no save bilivim long maen blong Hem, blong yuwan mo wetem Jos—wan gudfala wok mo wan sapraes.
Tangkyu, Papa God, Yu givim Profet
Ol gudfala dei blong yumi i stap long fored blong yumi no biaen long yumi. !Hemia from wanem God i givim long yumi revelesen blong tedei ! Sapos revelesen i nogat, laef bae i olsem we yu stap flae nomo long wan ples, we yu stap wet nomo blong klaod i klia blong yumi save lan wetem sefti. Ol stamba tingting blong Lod oli moa impoten bitim hemia. !From hemia i Jos Ia blong Kraes we i stap laef, mo from se Hem i daerektem ol profet blong Hem, yumi stap muv i go fored mo antap, long ol ples we yumi neva bin go long hem bifo, ol hae ples we yumi no save bilivim!
Nao, hemia i no minim se bae yumi no eksperiensem ol samting i muvmuv long taem we yu stap flae long long wol ia. I no minim se bae yumi sek se i gat tul blong wok i no wok, se i gat problem long enjin, o weta i nogud tumas. Ating, bae ol samting ia bae oli go moa nogud bifo oli kam gud.
Olsem wan pilot blong plen blong faet mo kapten blong plen, mi lanem se bae mi no save jusum ol hadtaem we bae mi fesem taem mi flae long plen, be mi save jusum olsem wanem mi rere mo hao mi tekem aksen long kaen taem olsem. Wanem i nid blong hapen long kaen taem olsem, i blong gat tras long wan hed we i klia mo i kwaet.
?Olsem wanem nao yumi mekem hemia?
Bae yumi luksave ol trutok mo gobak long ol stamba, besik prinsipol blong gospel, long wanem we i impoten moa. Yu mekem praevet stret mo gud fasin blong yu i kam moa strong—olsem prea mo skripja stadi mo obei ol komanmen blong God. Yu save mekem ol desisen folem ol praktis we oli bin mekem finis.
Lukluk nomo long ol samting we yu save mekem, mo i no long ol samting we yu no save mekem.
Yu mas holemtaet fet blong yu. Mo yu lisin long ol toktok blong Lod mo blong ol profet blong Hem we bae oli soem rod long yu mo lidim yu i go long sef ples.
Tingbaot Hemia, hemia i Jos Ia blong Jisas Kraes—Hem i stap long stia.
Tingbaot long plante revelesen o jenis we oli bin hapen long ol las ten yia nomo. Blong talem sam nomo:
-
Sakramen, oli talem strong se blong hem i stap olsem stamba samting long Sabat wosip blong yumi.
-
Kam Folem Mi oli givim olsem wan tul blong yusum long hom we Jos i sapotem, blong mekem wanwan man, woman mo famli i kam strong moa.
-
Yumi statem wan moa hae mo tabu wei, blong givhan long evriwan.
-
Yus blong teknoloji blong serem gospel mo mekem wok blong Lod i go raon long Jos.
Iven ol jeneral konfrens sesen bae i no save hapen sapos i no ol teknoloji ia.
Ol brata mo sista. Wetem Kraes long stia, bae ol samting bae oli no oraet nomo; be bae yumi no save bilivim.
Wok blong Tekem Isrel I kam Tugeta I Stap Go Fored
Fastaem bae yumi ting se wol sik bae i stopem yumi blong mekem wok blong Lod. Eksampol, wei blong stap serem gospel we i stap hapen oltaem i no save hapen. Be, wol sik ia i soemaot wan niu mo gudfala wei blong go aot mo helpem olgeta we oli ones long hat blong olgeta. Wok blong karem Isrel i kam tugeta i stap kam antap wetem ful paoa mo ful tingting. Handred mo taosen stori oli save pruvum hemia.
Wan gud fren we i stap long Nowei i raet long Hariet mo mi abaot namba blong baptaes i kam antap. “Long ol narafala ples we Jos i smol,” hem i raet, “!ol sut blong tri bae oli kam ol branj, mo ol branj bae oli kam ol wod!!”
Long Latvia, wan woman we i faenem Jos taem hem i klik long wan advataesmen long intanet mo i glad tumas blong lanem moa abaot gospel blong Jisas Kraes mekem se hem i stap wan aoa bifo apoenmen blong hem, mo bifo ol misinari i endem fas lesen blong olgeta, hem i askem wan deit blong i save baptaes.
Long Is blong Yurop, wan woman i kasem wan kol long ol sista misinari mo i talem: !Ol Sista!, ?from wanem yufala i ring bifo? !Mi bin stap ia wet!”
Plante long ol misinari blong mifala oli bisi bitim bifo. Plante oli tijim moa pipol bitim bifo Namba blong koneksen bitwin ol memba mo ol misinari i kam antap moa.
Long pas, ating yumi fas tumas long ol tradisen fasin blong yumi, be sik ia i openem ae blong yumi. Ating yumi bin stap mekem bilding wetem sanbij be granit i rere blong wok wetem finis. Wetem ol samting ia, yumi lanem hao blong yusum ol defren wei, we i tekem teknoloji, blong invaetem pipol—long wan nomol wei—blong kam mo luk, kam mo help, mo kam mo stap.
Wok blong Hem, Wei blong Hem
Hemia i wok blong Lod. Hem i invaetem yumi blong faenem ol wei blong mekem wok blong hem, bae oli defren long olgeta wei blong bifo.
Hemia i hapen long Saemon Pita mo ol narafala disaepol we oli go huk long Lagun blong Taebirias.
“Long naet ya oli no pulum sam fis nating.
“Nao taem delaet i brok … Jisas i [kam], i stap stanap long so. …
“Nao hem i talem long olgeta se, Ale, yufala sakem net long [nara]saed blong bot. Bambae yufala i save pulum sam.”
Ale, oli sakem net i godaon, nao oli no save pulum bakegen, from we i fulap we i fulap gud long ol fis.”10
God i gohed blong soemaot han blong Hem we i gat olgeta paoa. Dei we bae i kam taem yumi luklukbak mo save se long taem ia blong hadtaem, God i bin stap helpem yumi blong faenem wan bes wei—wei blong Hem—blong bildim kingdom blong Hem antap long wan strong fandesen.
Mi talem witnes blong mi se hemia i wok blong God mo bae Hem i gohed blong mekem fulap samting we yumi no bilivim long medel blong ol pikinini blong Hem, ol pipol blong Hem. God i holem yumi long han blong Hem wetem plante kea mo sore.
Mi testifae se Presiden Russel M. Nelson i profet blong dei blong yumi.
Olsem wan aposol blong Lod, mi invaetem mo blesem yu se, “bae yumi mekem wetem glad hat, evri samting we i stap long paoa blong yumi; mo afta, bae yumi stanap kwaet, wetem bigfala tras evriwan, blong luk fasin blong God blong sevem man, mo blong Lod i soemaot han blong hem.”11 Mo mi promes se Lod bae i mekem ol samting we yufala i no save bilivim blong i kam long ol stret mo gud wok blong yufala. Long nem blong Jisas Kraes, amen.