Stap Wet long Lod
Fet i minim blong stap trastem God long ol gud taem mo ol nogud taem, iven sapos i tekem sam safaring kasem taem yumi luk han blong Hem i kamaot blong gud blong yumi.
Ol brata mo sista we mi lavem tumas. Yumi evriwan i wantem tumas—mo ating mi i bitim yufala—blong harem las toktok blong profet we yumi lavem tumas, Presiden Russell M. Nelson. Hem i bin wan gudgudfala konfrens, be hem i nambatu taem we KOVID 19 sik ia i jenisim nomol miting blong yumi. Yumi taed tumas long sik ia, yumi filim se bae yumi pulpulum hea blong yumi. I luk se, sam long ol Brata Lida blong mi oli mekem hemia finis. Plis, yufala i mas save se mifala i stap prea oltaem blong olgeta we sik ia i tajem olgeta, speseli eniwan we i bin lusum wan we hem i lavem. Evriwan i agri se hemia i go we i go, i longtaem tumas nao.
?Bae yumi wet kasem wetaem blong oli tekemaot ol had samting we oli kam long yumi? ?Olsem wanem blong stap strong tru long ol tes blong yumi wanwan mo stap wet, wet, mo wet mo help i sloslo blong kam? ?From wanem ol samting i slo taem we ol hadtaem i moa bitim wanem we yumi save tekem?
Taem yumi stap askem ol kaen kwestin olsem, yumi save, sapos yumi traem, harem krae blong wan nara man i kamaot long wan kolkol ples, wan tudak rum long kalabus long taem blong wan ol moa kolkol winta we oli rekodem long ples ia.
“?O God, ?yu yu stap wea? Yumi harem we i kamaot long haed ples long Libeti Kalabus. ?Wehem nao bigfala tapolen we i kavremap ples we yu stap haed long hem? ?Kasem wetaem nao bae yu holembak han blong yu?”1 ?Kasem wetaem, O Lod, kasem wetaem?
So, yumi, yumi no faswan mo yumi no laswan we bae i askem ol kaen kwestin olsem taem we bigfala harem nogud i pusum yumi daon, o soa long hat i stap, i stap nomo. Mi no stap tokbaot ol wol sik, o ol kalabus, be yufala, famli blong yufala, neba blong yufala we oli fesem ol kaen jalenj ia. Mi tokbaot we plante long yufala i wantem tumas blong mared, be i no hapen, o yufala i mared mo wantem mekem rilesensip ia i selestial moa. Mi tokbaot olgeta we oli mas fesem wan sik we i kamaot we oli no wantem—maet wan sik we i no gat meresin—o wan we i fesem faet wetem wan sik we i stap long blad we i no gat meresin from. Mi tokbaot faet we i gogohed wetem ol helt jalenj long saed blong filing mo tingting we i hevi long sol blong plante we oli safa wetem, mo i hevi long hat blong olgeta we oli lavem mo safa wetem olgeta. Mi tokbaot olgeta we oli pua, we Sevya i talem se yumi no mas fogetem olgeta, mo mi tokbaot yu, we yu wet se wan pikinini i kambak, i nomata wanem yia hem i gat, from se hem i jusum wan rod we i defren long hemia we yu stap prea se bae hem i tekem.
Moa long hemia, mi luksave se iven i gat wan longfala lis blong ol samting we yumiwan i stap wet from, hemia i no tokbaot nomo bigfala wari long saed blong ekonomi, politik, mo sosol laef we i stap fesem yumi evriwan. Papa we i stap long Heven i wantem luk klia se yumi lukluk long ol pablik problem ia, mo tu, ol problem blong yumiwan, be bae i gat ol taem insaed long laef blong yumi, we iven hadwok mo strong prea blong yumi long saed blong spirit, bae i no givim ol win ia we yumi wantem tumas, i nomata se i long saed blong ol bigfala problem blong wol, o ol smol problem blong yumi. So, taem yumi stap wok mo wet tugeta blong ol ansa blong sam prea oli kam, mi givim promes blong mi, olsem wan aposol, se oli harem prea, mo oli stap ansarem prea, nomata se i no hapen long taem mo long wei we yumi wantem. Be, oltaem, ansa i kam long taem mo long wei we wan papa we i luksave evri samting, mo i no save finis, mo i gat sore, i stap ansarem olgeta. Ol brata mo sista we mi lavem, plis andastanem se Hem we i neva slip o foldaon long slip,2 i kea long hapines mo fasin we ol pikinini blong Hem oli kam wan god, mo hemia i bitim eni nara samting we bae man long heven i gat blong mekem. Hem, Hem i lav we i klin gud, i Man ia we i gat glori, mo nem blong hem i Papa we I Gat Sore.
Bae yu talem: “Spos i olsem, ?from wanem lav mo sore blong Hem i no openem Ol Red Si blong mifalawan, mo i no letem mifala i wokbaot tru long ol trabol blong mifala long drae graon? ?Yufala i no ting se Hem i sapos blong sendem ol pijin blong solwota blong namba 21 senturi oli kam blong solemdaon evri nogud grasopa blong namba 21 senturi?
Ansa long ol kwestin ia, hem i “Yes, God i save mekem merikel naoia nomo, be naoia o afta, bae yumi lanem se ol taem blong wokbaot blong yumi long wol ia, bae Hem, mo Hemwan nomo bae i lidim.” Hem i lukaotem kalenda blong wanwan long yumi evriwan. Long evri disebol man we i kasem hiling kwiktaem nomo taem hem i stap wet blong go insaed long Pul blong Betseda,3 nao i gat wan narawan we bae i spendem 40 yia long draeples blong wet blong go insaed long graon blong promes.4 Long evri Nifae mo Lihae we wan raon blong faea blong fet blong olgeta i protektem olgeta,5 bae i gat wan Abinadae we bae i bon gud long strong faea from fet blong hem.6 Mo yumi tingbaot se semfala Elaeja ia we, olsem nomo, i singaotem faea blong heven i kam blong testifae agensem ol pris blong Bal,7 semfala Elaeja ia nomo i bin gotru long wan taem we i no bin gat ren blong plante yia, mo, blong wan sot taem, i bin stap kakae smol kaekae we han blong pijin i save holem.8 Long tingting blong mi, mi no ting se bae yumi save singaotem hemia i wan “hapi mil.”
?Poen? Poen, i we, fet i minim blong stap trastem God long ol gud taem mo ol nogud taem, iven sapos i tekem sam safaring kasem taem yumi luk han blong Hem i kamaot blong gud blong yumi.9 Hemia i had blong mekem long wol blong yumi tedei, taem we plante oli kam blong bilivim se gud samting we i moa hae long laef ia, i blong stap longwe long evri safaring, se i no gat wan i mas wari smol long eni samting.10 Be, bilif ia, bambae i neva lidim yumi “kam bigwan olsem Kraes … we i bigman tru.”11
Mi talem sore long Elda Neal A. Maxwell blong jenisim smol samting long wan toktok blong hem, mo mi tu, mi wantem talem se “laef blong wan, i no save fulap long fet, mo i no gat smol tingting i fasfas wetem.” Bae i no wok nomo blong “glis i go mo no wari long laef,” mo stap dring laman jus mo talem se: “Lod, givim mi evri bes klin fasin, be meksua se yu no givim krae sore, no harem nogud, no sobodi, no agens. Plis no letem eniwan i no laekem mi, o i salem mi, mo antap long evriwan, yu no letem mi mi filim se Yu Yu lego mi, o olgeta mi lavem oli lego mi. Be plis, Lod, Yu lukaot gud se bae mi no fesem evri eksperiens ia we oli bin mekem Yu Yu kam tabu. Mo afta, taem we ol narawan oli finis blong glis long ol raf rod, plis Yu Yu letem mi mi kam, mo stap wetem Yu Lod, mo bae mi save tokflas se, yumi, yumi semmak nomo, mo semtaem bae mi flot gud i stap long naesfala klaod ia we i Kristin fasin.”12
Ol brata mo sista blong mi, Kristin fasin i mekem man i harem gud, be plante taem, laef ia i no isi. Rod ia blong kam tabu mo stap hapi, long wol ia mo afta, hem i wan longfala rod mo i save gat ston long hem. Hem i tekem taem mo strong tingting blong wokbaot long hem. Be i tru, praes blong mekem olsem i wan bigfalawan. Trutok ia, oli tijim i klia mo wetem strong tingting insaed long namba 32 japta blong Alma, insaed long Buk blong Momon. Hae pris ia i stap tijim se sapos toktok blong God, yumi planem insaed long hat blong yumi olsem wan sid nomo, mo sapos yumi kea gud blong wotarem, karemaot rabis gras long hem, mo leftemap tingting blong sid ia, bambae long fiuja i karem ol frut “we praes blong hem i gudgudfala, we hem i moa swit bitim evri samting we i swit,” mo taem yumi kakae, bae i mekem se bambae yumi nomo tosta o hanggri.13
Oli tijim plante lesen insaed long gudfala japta ia, be long medel blong evriwan, i toktok ia we i talem se, sid ia, oli mas wotarem mo yumi mas wet se i kam raep, “mo stap wet wetem wan ae blong fet from frut ia.”14 Alma i talem se taem blong pikimap frut bae i kam “i no longtaem.”15 Bae yumi no sapraes se hem i endem gudfala instraksen blong hem taem hem i ripitim tri taem se yumi mas hadwok, mo wet longtaem taem yumi stap fidim hat blong yumi wetem toktok blong God, mo “stap wet,”mo “gotru long hadtaem wetem strong tingting,” taem hem i talem se “tri ia i givim frut long yufala.”16
KOVID mo kansa, tu tingting mo fasfas tingting, trabol long mane mo tes blong famli. ?Wetaem bae ol trabol ia oli go lus? Ansa hem i: “i no longtaem.”17 Mo sapos hemia i wan sot taem o wan longfala taem, bae i no blong yumi talem, be i tru long gladhat blong God, ol blesing bae oli kam long olgeta we oli hang strong long gospel blong Jisas Kraes. Problem ia, Hem i stretem insaed long wan praevet garen, long wan pablik hil long Jerusalem longtaem finis i pas.
Naoia, taem bae yumi harem profet we yumi lavem tumas i endem konfrens ia, bae yumi tingbaot, olsem Russell Nelson i soemaot truaot long laef blong hem, se olgeta we oli “lukluk long Hae God bae God i stap givim paoa long olgeta [blong] oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be … [oli] no save taed, mo oli save wokbaot i go longwe … , be oli no save kam slak.”18 Mi prea se, “i no longtaem”—naoia o afta—bae ol blesing ia oli kam long evriwan long yufala we i askem help from harem nogud blong yufala mo askem blong kam fri long krae sore blong yufala. Mi witnes long lav ia blong God mo long Restoresen blong tabu gospel blong Hem, we i ansa blong evri problem we yumi fesem. Long tabu nem blong Lod, Jisas Kraes. Amen.