Mga Alituntunin ng Ministering

Ministering sa Pamamagitan ng Self-Reliance

Ang pagtulong sa iba na maging self-reliant ay paglalaan at pagmiministeryo sa paraan ng Panginoon.

woman cutting stained glass pieces

Ang mga nilalaman sa isyung ito ay ginawa bago pa magkaroon ng pandemya ng COVID-19. Ang ilang detalye ay maaaring hindi na angkop sa kasalukuyan. Mangyaring iakma ang mga mungkahi kung kinakailangan ayon sa kasalukuyang mga gabay mula sa Simbahan at pamahalaan.

Marami sa ating mga kapamilya, kaibigan, at kapitbahay ang interesadong lalong maging self-reliant. Gamit ang inisyatibong self-reliance ng Simbahan, ang mga miyembro ng Simbahan ay nakakahanap ng mga pagkakataong maglingkod, mangalaga, at magministeryo habang pinagpapala nila ang iba sa mga alituntuning nagdudulot ng “mas malaking pag-asa, kapayapaan, at pag-unlad.”¹

“Dito Ako Nabibilang”

Ni Chrissy Kepler, Arizona, USA

Naghirap ako pagkatapos kong madiborsyo, na nagsisikap na makapagtrabahong muli matapos mamalagi sa tahanan bilang isang ina sa loob ng walong taon. Nahirapan din ako sa espirituwal, na naghahanap ng katotohanan at pananampalataya, bagama’t hindi pa ako nakapasok sa isang kapilya mula noong tinedyer ako.

Isang araw ng Linggo naglalaba ako sa bahay ng ate kong si Priscilla, na aktibong miyembro ng Simbahan. Habang naroon ako, niyaya ako ni Priscilla na sumamang magsimba sa kanyang pamilya—ang unang paanyaya sa akin sa loob ng mahigit 15 taon.

Nag-atubili ako noong una, pero noong gabi bago iyon, nagsumamo ako sa Diyos na ipakita sa akin kung paano maging mas malapit sa Kanya. Matapos madama na dapat akong magsimba, naisip ko, “Bakit hindi ka dumalo para personal mong maranasan kung ano ang pakiramdam ng magsimba?”

Habang nasa sacrament meeting kami, napansin ko ang isang flyer sa Sunday bulletin na nagpapahayag ng isang kurso sa self-reliance sa personal finances. Hindi ako handang bumalik sa simbahan, pero nagkainteres ako sa 12-linggong kurso. Sa panghihikayat ng aking ate at bayaw, nagpalista ako, na umaasang matutuhan lamang kung paano gumawa ng badyet at mabayaran ang utang. Gayunman, ang mga klase ay naghatid sa akin ng espirituwal na pagbabago.

Nagulat ako sa mga espirituwal na mensahe sa unang dalawang linggo ng klase, pero sa ikatlong linggo, napuspos ako ng damdamin ng pagpapatibay na dito ako nabibilang at may naririnig akong bago pero pamilyar na mga katotohanan. Nilisan ko ang klase at nakipagkita ako kaagad kay Priscilla. Habang lumuluha, tinanong ko siya, “Paano ko patuloy na madarama ito sa buhay ko?” Kinausap niya ang mga missionary para simulan akong turuan.

Nagpunta ang mga miyembro ng klase ko sa self-reliance sa mga pagtuturo sa akin ng mga missionary at sinuportahan ako. Nagkaroon sila ng walang-hanggang impluwensya sa aking espirituwalidad at tinulungan nila akong magkaroon ng patotoo sa ebanghelyo at sa mga makabagong propeta.

Sa oras na ginugol ko para tapusin ang kurso, gumawa ako ng ilang temporal at espirituwal na pagbabago. Nagsimula ako ng bagong trabaho sa isang magandang kumpanya, at binayaran ko ang ilang utang.

Pero ang mas malalalim at mas matatamis na pagpapalang nagmula sa kurso ay kinabilangan ng pagkakaroon ng magagandang pagkakaibigan, pagkakaroon ng isang magandang ugnayan sa isang nakahihikayat na bishop, pagkakaroon ng isang patotoo tungkol sa ikapu, at pagtanggap ng aking temple recommend, ma-endow, at makitang mabinyagan ang dalawang panganay kong anak.

Patuloy pa rin ako sa aking landas tungo sa pagiging self-reliant, pero sa nalalabi kong pagsisikap, itatangi ko ang mga aral na natutuhan ko at ang mga naging kaibigan ko.

Anyayahan, Dumalo, Palakasin

Para matulungan ang mga Banal sa mga Huling Araw na maging self-reliant—kapwa sa pinansyal at sa espirituwal—sinimulan ng Simbahan ang inisyatibong self-reliance nito noong 2014. Pagkatapos ng pambungad na debosyonal, pumipili ang mga dadalo mula sa apat na iba’t ibang 12-linggong kurso.

Dahil ang mga self-reliance group ay kumikilos bilang isang council, nag-aalok ang mga ito ng napakagandang pagkakataong magministeryo sa pinansyal, edukasyonal, propesyonal, at espirituwal na mga pangangailangan ng iba. Ang mga miyembro ng grupo ay natututo, sumasangguni, at sumusuporta sa isa’t isa. Nagbabahagi rin sila ng mga ideya at nananagot sa isa’t isa.

Ipagdasal kung sinong mga kapamilya, kaibigan, o kapitbahay ang maaari mong anyayahan sa isang kurso ng self-reliance, at samahan silang dumalo. Tandaan na ang mga alituntunin ng self-reliance ay maaaring magpala sa lahat ng anak ng Diyos, miyembro man sila ng Simbahan o hindi.

people sitting in meetings

“Nilisan Ko ang Bawat Klase na Nadaramang May Nagmamahal sa Akin”

Nang bisitahin niya ang Temple Square sa Salt Lake City, Utah, kasama ang kanyang 10-taong-gulang na anak na si Vincent noong Disyembre 2016, itinuring ni Katie Funk ang kanyang sarili na “komportableng agnostiko.” Tumalikod siya sa Simbahan sa edad na 16, naging dalagang-ina sa edad na 17, nagsimulang magpatato sa katawan, at nahilig sa pag-inom ng kape. Ngunit sa pagbisitang iyon sa Temple Square, nadama ni Vincent ang Espiritu Santo at itinanong sa kanyang ina kung maaari siyang magpaturo sa mga missionary.

Sa kabila ng kanyang dalawang trabaho, 80-oras na pagtatrabaho sa isang linggo, pinag-aralan ni Katie ang ebanghelyo na kasabay ni Vincent, sinaliksik ang mga sagot sa mga tanong ni Vincent sa pagitan ng pagbisita ng mga missionary. Pagsapit ng tag-init ng 2017, nagsimula siyang dumalo sa mga miting ng Simbahan, kung saan nalaman niya ang tungkol sa mga kurso ng self-reliance sa Simbahan.

“Natanto ko na ito ay isang bagay na makakatulong sa akin,” wika niya. “Hindi ko na siguro kakailanganing magdalawang trabaho o umasa sa mga magulang ko habang nabubuhay ako.”

Tinawag ni Katie ang kanyang kurso na “pambihirang pagpapalakas sa temporal at espirituwal,” hindi lamang dahil sa natutuhan niya kundi dahil din sa pagtanggap at pagmiministeryo sa kanya ng kanyang self-reliance group.

Paano Ka Makakatulong

man in workshop

Narito ang ilang ideya mula kay Katie kung paano natin magagawang isang pagkakataon ang inisyatibong self-reliance ng Simbahan na magministeryo kapwa sa espirituwal at sa temporal:

• “Alam kong madalas ninyong marinig ito, pero huwag husgahan ang halaga ng sinuman ayon sa hitsura nila. Ang katunayan na nakadalo ako sa kursong iyon at hindi ko nadama na hinusgahan ako ng ibang tao ay malaking bagay.”

• “Magbigay ng suporta at panghihikayat. Sinuportahan ako ng grupo ko sa isang paraan na nilisan ko ang bawat klase na nadaramang may nagmamahal sa akin.”

• Ibahagi ang iyong karanasan. Ang katapatan at pagiging bukas namin sa isa’t isa ay nagpaganda sa aming pakiramdam. Hindi mo alam kung sino ang makikinabang sa ibinabahagi mo.”

• “Magsalita ka. Sinasabi ko kung paanong gumanda ang buhay ko dahil nagbabayad ako ng ikapu at nagsisimba. Dinadala ko sa trabaho ang aking aklat na Personal na Pera para Maging Self-Reliant bilang isang behavioral therapist. Kapag angkop, ibinabahagi ko ang ilan sa mga alituntunin nito sa ibang tao.”

• “Kumuha ng isang kurso sa self-reliance para sa sarili mo, pero abangan ang mga taong maaaring mangailangan ng tulong mo. Kinailangan kong lumiban sa halos kalahati ng klase dahil nagbago ang iskedyul ko sa trabaho, pero patuloy akong kinontak at sinuportahan ng mga kagrupo ko. Kamangha-manghang madama na kabilang pa rin ako kahit hindi ako makadalo.”

Tala

1. “Mensahe mula sa Unang Panguluhan,” sa Personal na Pera para Maging Self-Reliant (2016), i.

Ministering sa Pamamagitan ng Self-Reliance

“Ang pag-asa sa sarili ay pag-angkin ng responsibilidad sa sarili nating espirituwal at temporal na kapakanan at sa mga yaong ipinagkatiwala ng Ama sa Langit sa ating pangangalaga. Sa pag-asa sa sarili lang natin tunay na matutularan ang Tagapagligtas sa paglilingkod at pagpapala sa iba.

Elder Robert D. Hales (1932–2017) ng Korum ng Labindalawang Apostol, “Isang Pananaw ng Ebanghelyo sa Pagkakawanggawa: Pagkilos ayon sa Pananampalataya,” sa Mga Pangunahing Tuntunin sa Pagkakawanggawa at Pag-asa sa Sarili (buklet, 2009), 1–2; idinagdag ang pagbibigay-diin.

Ibahagi ang Inyong mga Karanasan

Para maipadala sa amin ang inyong mga karanasan sa inyong pagmiministeryo sa iba o pagmiministeryo sa inyo ng iba, magpunta sa liahona.ChurchofJesusChrist.org at mag-klik sa “Submit an Article or Feedback.”

Background texture mula sa Getty Images

Personal na Pera para Maging Self-Reliant

Edukasyon para sa Mas Magandang Trabaho para Maging Self-Reliant

Maghanap ng Mas Magandang Trabaho para Maging Self-Reliant

Pagsisimula at Pagpapalago ng Aking Negosyo para Maging Self-Reliant

Ang mga manwal na ito ay kumakatawan sa apat na kurso ng Simbahan sa self-reliance. Para sa iba pang impormasyon, magtanong sa inyong bishop o bumisita sa srs.ChurchofJesusChrist.org.