Elder Moisés Villanueva

Hitu ’Ahuru Huimana fa’atere rahi

10 ana’e matahiti tōna i tāua taime ra, e’ita rā e mo’ehia ia Elder Moisés Villanueva i te mana’o tei tupu i roto iāna, ’a ha’api’i ai te mau misiōnare iāna ’e i tōna ’utuāfare i te ’evanelia i Oaxaca, Mehico.

’Ua parau ’oia « tē ha’amana’o nei au i te Vārua tā rāua i vaiiho mai, te hau tā’u i fāri’i i roto i tō’u ’ā’au ».

I te bāpetizora’ahia o Moisés ’e tōna nā taea’e ’e tuahine e maha, tōna māmā—e metua ’ōtahi ’ōna e fa’a’amu ra ia Moisés ’e tōna nau taea’e ’e tuahine e hitu i roto i te hō’ē orara’a fifi—tei ho’i fa’ahou mai i roto i te ’Ēkālesia.

I muri a’e, ’a fa’aineine ai o Moisés, 18 matahiti, nō tāna misiōni, ’ua tāmau noa tōna ’utuāfare i te fa’aruru i te mau fifi o te pae tino. ’Ua tapitapi ri’i tōna mana’o nō te reva, ’e ’ua parau ’oia i tōna metua vahine ē, tē hina’aro ra ’oia e fa’aea i te fare nō te tauturu iāna.

«Mai te mea ē, e hina’aro mau ’oe e tauturu iā’u » te reo o tōna māmā i ni’a iāna, « ’a haere e tāvini i te Fatu ».

Ma te tūturi i pīha’i iho i tōna ro’i i te hope’a o te mahana mātāmua i roto i te misiōni nō Hermosillo Mehico, ’ua feruri o Moisés ē, ’ua māuruuru te Fatu nō tāna fa’aotira’a. ’Ua fa’ariro ’oia i tāna misiōni ’ei tumu nō te tupura’a i te rahi o tōna ’itera’a pāpū nō te ’evanelia i fa’aho’i-fa’ahou-hia mai.

« Nā te Fa’aora o Iesu Mesia e arata’i nei i teie ’Ēkālesia », te parau ïa a Elder Villanueva. « ’Ua ’ite ’oia ia tātou tāta’itahi nā roto i tō tātou i’oa. ’Ua ’ite ’oia i tō tātou mau hina’aro, tā tātou mau tītaura’a, ’e tā tātou mau māna’ona’ora’a. ’Ua ’ite ato’a ’oia i tō tātou mau pūai ’e tae noa atu i te mau hina’aro o tō tātou ’ā’au ».

’Ua fānauhia o Moisés Villanueva López i te 13 nō Tītema 1966, i Oaxaca, Oaxaca, Mehico, nā Rubén Villanueva Platas ’e o Delfina López Domínguez. ’Ua fa’aipoipo ’oia ia Leticia Ávalos Lozano i roto i te hiero nō Mexico Mexico City i te 30 nō Tiunu 1995. E toru tamari’i tā rāua.

’Ua roa’a ia Elder Villanueva te parau tū’ite licence i roto i te fa’aterera’a i te ’ohipa putu faufa’a i te fare ha’api’ira’a tuatoru nō Southeast Regional University i te matahiti 1997 ’e hō’ē maitrise i roto i te ha’amaita’ira’a i te ’ohipa putu faufa’a i te fare ha’api’ira’a nō Tecnológico de Monterrey i te matahiti 2011. ’Ua rave ’oia i te ’ohipa ’ei ra’atira fa’atere nō te Sertexa, e taiete utara’a.

I te taime ’a pi’ihia ai ’oia, tē tāvini ra o Elder Villanueva ’ei Hitu ’Ahuru ārea i Mehico. ’Ua tāvini ato’a ’oia ’ei peresideni nō te misiōni nō Arcadia Kalifonia, ’e ’ei melo ’āpo’ora’a teitei, ’ei tauturu i roto i te hō’ē peresidenira’a titi, ’ei ’episekōpo, ’e ’ei ti’a fa’atere nō te ’ohipa ha’apararera’a parau.