Elder Matthew S. Holland

Hitu ’Ahuru Huimana fa’atere rahi

’Ua mātaro o Matthew S. Holland i te mau Huimana fa’atere rahi ’aore rā, i te mau ’āmuira’a rahi.

E rave rahi feiā mo’a i te mau mahana hope’a nei tei ’ite iāna ’ei tamaiti nā Elder Jeffrey R. Holland nō te Tino ’Ahuru Ma Piti ’āpōsetolo. E ha’amana’o paha te tahi pae iāna ’ei taure’are’a 17 matahiti tei paraparau i roto i te tuha’a purera’a autahu’ara’a nō te ’āmuira’a rahi nō ’Ēperēra 1983.

« ’Ua riro ïa ’ei ha’amaita’ira’a nehenehe roa, i te tā’āto’ara’a o tō’u orara’a, ’ia ’ite i te huru orara’a o tō’u pāpā ’e tō’u māmā, te mau mea tā rāua i fafau, ’e te mau mea tei anihia ia rāua ’ia rave », te parau ïa a Elder Holland, ’o tē fa’atere nei i te misiōni nō Raleigh Carolina Apato’erau.

« Terā rā, nā roto i taua mau mea i ’itehia e māua, ’ua rahi tō māua ’ite nō ni’a i teie pi’ira’a nō te feruri ē, ’ua ineine maita’i māua nō te reira » tāna ïa parau. « Aua’e rā, ’ua ha’api’i ato’a māua ē, e ha’amaita’i te Fatu i te feiā tāna e pi’i, ’e tē rave nei māua i te fa’aro’o ’e te māhanahana rahi i roto i te reira ».

Tē ha’amana’o nei o Elder Holland ē, e mea taiā ’ia paraparau i roto i te ’āmuira’a rahi. Te fa’aineinera’a i te hō’ē a’ora’a tei tae mai « te rēni nā ni’a iho i te rēni, te a’o nā ni’a iho i te a’o » (2 Nephi 28:30) ’ua riro mai ïa « ’ei ha’amaita’ira’a ’oi’oi ’e te pāpū nō te ’ite ē, ’ia fāri’i ana’e ’outou i te mau ’ohipa nō ō mai i te Fatu ra, e tauturu ’oia ia ’outou, ’e e hōro’a mai ho’i i te mau mana’o ’e te mau ferurira’a i te mau mea e tītauhia ’ia fa’a’ite ».

’Ua fānauhia o Matthew Scott Holland i te 7 nō Tiunu 1966, i Provo, Utah, Marite, te tamaiti a Jeffrey R. ’e a Patricia Holland. ’Ua fa’aipoipo ’oia ia Paige Bateman i te 20 nō Mē 1996, i roto i te hiero nō St. George Utaha. E metua rāua nō e maha tamari’i.

E toru parau tū’ite tā Elder Holland i roto i te ha’api’ira’a poritita—te licence nō te ’ohipa ’aravihi, nō te fare ha’api’ira’a tuatoru Brigham Young i te matahiti 1991, hō’ē maitrise ’e hō’ē doctorat nō te ’ohipa ’aravihi nō te fare ha’api’ira’a tuatoru nō Duke i te matahiti 1997 ’e 2001.

’A rave ai ’oia i te ’ohipa i BYU (2001–2009), ’ei ’orometua ’āpiti nō te ha’api’ira’a poritita, ’ua pi’ihia ’oia ’ei peresideni nō fare ha’api’ira’a teitei nō Utah Valley i te matahiti 2009, e ’ua tāvini i reira e tae noa atu i tōna pi’ira’ahia ’ei peresideni misiōni i te matahiti 2018.

’Ua tāvini ’oia ’ei ’episekōpo, ’ei melo ’āpo’ora’a teitei, ’ei tauturu i roto i te hō’ē ’episekōpora’a, ’ei tauturu ha’amāramarama nō te feiā ’āpī tamāroa nō te pāroita, ’ei fa’atere misiōni nō te pāroita, ’ei ’orometua ha’api’ira’a sābati, ’e ’ei misiōnare rave tāmau i roto i te misiōni nō Scotland Edinburgh.