Elder Jeremy R. Jaggi

Hitu ’Ahuru Huimana fa’atere rahi

I te ’āpīra’a o Elder Jeremy R. Jaggi, ’ua ro’ohia tōna teina tuahine, o Kristen, e hitu matahiti, i te hō’ē pātēria tei ha’avi’ivi’i i tōna roro. ’Ua parau te mau taote ē, e’ita ’oia e ora.

’Ua tūturi te taure’are’a Jeremy i pīha’i iho i tōna ro’i i roto i tō rātou fare, i Roto Miti, Utaha, Marite, ’e ’ua tāparu i te Fatu nō te ’ite ē, nō te aha ’oia e pohe ai i te ’āpī-roa-ra’a. ’Ua fāri’i rā tōna tuahine i te hō’ē ha’amaita’ira’a autahu’ara’a ’e ’ua ora.

’Ua riro teie ’ohipa ’ei rāve’a nō Jeremy 17 matahiti, ’ia « fa’atū’ati iāna i te Atua », tei tura’i iāna ’ia tai’o pāpū i te Buka a Moromona nō te taime mātāmua. I muri a’e, ’ua tāvini ’oia ’ei misiōnare rave tāmau i roto i te misiōni nō Ohio Cleveland.

E rave rahi matahiti i muri a’e, ’ua tūturi fa’ahou o Jeremy i roto i te hō’ē pure ’ā’au tae mau, ’a fa’aineine ai tāna vahine o Amy, i te fānau i te toru o tā rāua tamari’i. ’Ua parau ’oia, « i taua taime ra, ’ua fāri’i au i te hō’ē hau rahi—e hau o te nehenehe noa e fa’ata’a, mai te rima o te Metua i te ao ra i te pū’ohura’a mai iā’u i te māhanahana o te Vārua Maita’i ».

’Ua arata’i taua hau ra iāna i roto i te ārea taime poto o te orara’a o te ’aiū, ’e i roto i te mau ’āva’e ’oto i muri mai, nā roto i te hō’ē atu maruara’a tamari’i. « E tāmatahia tātou pā’āto’a ’ia au i tā tātou iho tāmatara’a » tāna ïa parau, « terā rā, ’e mea ’oa’oa ana’e ïa’ [Iakobo 1:2] i te mea ē, ’ua hōro’a mai te Fa’aora i te hō’ē rāve’a ia tātou nō te fāri’i i te hau ’e te ’oa’oa ».

’Ua fānauhia o Jeremy Robert Jaggi i Roto Miti, Utaha, Marite, i te 23 nō Māti 1973, nā Robert Stanley Jaggi ’e o Judy Anne Roos. ’Ua fa’aipoipo ’oia ia Amy Anne Stewart i roto i te hiero nō Roto Miti i te 12 nō Tiunu 1995. E metua rāua nō e pae tamari’i.

’Ua roa’a tā Elder Jaggi parau tu’ite baccalauréat nō te huru ’e te ea o te ta’ata, nō te fare ha’api’ira’a tuatoru nō Utaha, ’e te maitrise nō te fa’atere ’ohipa nō te fare ha’api’ira’a tuatoru nō Pepperdine. I te taime ’a pi’ihia ai ’oia, tē fa’atere ra ’oia i te mau ho’ora’a retioni a Alkermes, ’e te fa’atere ato’a ra i te ho’ora’a fenua a te taiete fa’ahotura’a faufa’a HCA.

’Ua tāvini o Elder Jaggi ’ei Hitu ’Ahuru ārea, ’ei peresideni nō te misiōni nō Ogden, Utaha, ’ei tauturu pāpa’i parau fa’atere nō te titi, ’ei ’episekōpo, ’ei peresideni nō te pupu peresibutero, ’ei ’orometua séminaire, ’ei tauturu i roto i te hō’ē peresidenira’a feiā ’āpī tamāroa nō te pāroita, ’ei ’orometua fa’aineine misiōnare nō te titi, ’e ’ei fa’atere misiōni nō te pāroita.