Bradley R. Wilcox

Tauturu piti i roto i te peresidenira’a rahi nō te Feiā ’Āpī Tamāroa

’A haere ai ’oia i roto i te hō’ē ’āmuira’a feiā ’āpī i Kalifonia, ’ua fārerei Bradley (Brad) R. Wilcox i te hō’ē feiā ’āpī tamāroa ’aita i hina’aro e haere mai i reira. ’Ua haere atu ’oia i pīha’i iho i taua taure’are’a ra i raro a’e i te hō’ē tumu rā’au marumaru, ’e ’ua ha’amata a’era rāua i te paraparau i te parau auroa nā te feiā ’āpī—te fa’aterera’a nā ni’a i te ’iri fa’atere.

’Ua ani te taea’e Wilcox i te taure’are’a ’ia fa’a’ite mai iāna i te tahi mau fa’aterera’a nā ni’a i te skateboard. Nō tōna fa’ahiahia rahi, ’ua ani ’oia i teie taure’are’a ’ia rave i te tahi fa’a’ite’itera’a skateboard i roto i te rurura’a Nō te Pūai o te Feiā ’Āpī (JSF) i taua pu’e tau māhanahana ra. ’Ua pāto’i ri’i teie taure’are’a, terā rā, i te pae hope’a ’ua fāri’i ’oia. I roto i taua rurura’a ra JSF, ’ua fāri’i ’oia i te hō’ē ’ohipa tei taui i tōna orara’a, ’e ’ua roa’a tōna ’itera’a pāpū nō te ’evanelia.

« ’Ua haere mai ’oia i te JSF nā ni’a i te hō’ē ’iri fa’atere, terā rā, ’ua ho’i ’oia mai te hō’ē misiōnare » te parau ïa a te taea’e Wicox.

« I te roara’a o tō’u orara’a, ’ua pārahi au i pīha’i iho i te mau tamari’i ’e te feiā ’āpī » ’ua parau te taea’e Wicox, « ’e e mea here roa nā’u te feiā ’āpī ».

’Ua fānauhia o Bradley Ray Wilcox i Provo, Utaha, USA, i te 25 nō Tītema 1959, nā Ray T. Wilcox ’e o Val C. Wilcox. ’Ua pa’ari ’oia i Provo ta’a ’ē atu i te tahi tau matahiti i Etiopia i tōna tamari’iri’ira’a.

I muri a’e i tōna tāvinira’a i te hō’ē misiōni rave tāmau i roto i te misiōni nō Viña del Mar i Tirēni, ’ua fa’aipoipohia te taea’e Wilcox ia Deborah Gunnell i roto i te hiero nō Provo Utaha i te 7 nō ’Ātopa 1982. E metua rāua nō e maha tamari’i.

’Ua roa’a te parau tū’ite licence ’e te maîtrise a te taea’e Wilcox i te fare ha’api’ira’a tuatoru nō Brigham Young ’e tāna doctorat nō te ha’api’ira’a, i te fare ha’api’ira’a tuatoru nō Wyoming. ’Ua fa’ahanahanahia te taea’e Wilcox e rave rahi parau ha’amāuruurura’a nō tāna ’ohipa i roto i te ha’api’ira’a, ’ua hōro’a i te taime, hau atu e 30 matahiti i roto i te fa’anahora’a JSF i BYU, ’e ’ua ’oa’oa ’oia i te rirora’a ’ei ’orometua nō te hepetoma o te ha’api’ira’a nō te fare ha’api’ira’a.

’Ua ora nā te taea’e Wilcox ’e tōna ’utuāfare i Niu Terani ’e i Paniora ’a fa’atere ai ’oia i te mau fa’anahora’a ha’api’ira’a a BYU nā te fenua ’e’ē. ’Ua pāpa’i ’oia e rave rahi buka, ’e i teie taime, e ’orometua ’oia i roto i te Fa’aterera’a nō te pāpa’ira’a mo’a tahito i BYU.

’Ua tāvini te taea’e Wilcox ’ei peresideni nō te misiōni nō Santiago East i Tirēni ’e ’ei melo nō te fa’aterera’a rahi o te ha’api’ira’a sābati, ’ei tauturu i roto i te hō’ē peresidenira’a titi, ’e ’ei ’episekōpo nō te hō’ē pāroita nā te feiā ’āpī pa’ari ’ōtahi. I te taime ’a pi’ihia ai ’oia, tē tāvini ra ’oia ’ei melo ’āpo’ora’a teitei ’e ’ei peresideni Feiā ’Āpī Tamāroa nō te titi.