Unimwaane Moisés Villanueva
Mataniwi ni Kabuta n te Itingaun
Ai bon tibwa 10 ana ririki n te tai anne, ma Unimwaane Moisés Villanueva e bon aki kona ni mwaninga aron ana namakin ngke ngaia ma ana utu a reirenaki te euangkerio irouia mitinare i Oaxaca, Mexico.
“I uringa te Tamnei are a katukua, te rau are I namakinna inanou,” e taku.
Ngke e bwabetitoaki Moisés ma aman tarina ma mwaanena, tinana—ae akea buuna ae kaikawa Moisés ao tarina ao mwaanena aika itiman n aro aika moan te kangaanga—a moanna n okira te Ekaretia ao ni kakaonimaki.
Imwiina, ngkai Moisés ae 18 ana ririki e katauraoi ibukin ana mwakuri ni mitinare, a teimatoa ana utu ni kaitara ma kangaanga n te maiu n rabwata. E nanououa n ana babaire ibukin nakona ao n tuanga tinana bwa e tangiria ni kan tiku n te mweenga bwa e na buokiia.
“Ngkana ko tangiria ni kan buokai,” tinana e tuangnga, “nako ao mwakuri ibukin te Uea.”
Ni katorobubua irarikin ana kainiwene n tain te kainiin n ana moan bong i Mexico Hermosillo Mition, e namakinna Moisés bwa e kukurei te Uea irouna n ana babaire. E kamoamoa ana mition n rikiraken ana koaua ibukin te euangkerio ae e a tia ni kaokaki.
“Te Ekaretia aei e kairaki iroun ara Tia Kamaiu Iesu Kristo,” e taku Unimwaane Villanueva. “E kinaira n tatabemaniira n arara. E atai kainnanora, ara kangaanga, ao tabeaiangara. E atai naba korakorara ao riki baike a tangiria nanora.”
Moisés Villanueva López e bungiaki n Ritembwa 13, 1966, i Oaxaca, Oaxaca, Mexico, irouia Rubén Villanueva Platas ao Delfina López Domínguez. E mareaki ma Leticia Ávalos Lozano i Mexico City Mexico Tembora n Tuun 30, 1995. Iai natiia aika teniman.
Unimwaane Villanueva e reke ana baetura tikurii n tararuan bitineti mai Southeast Regional Iuniweteri n 1997 ao ana mwaatita tikuri ni bitaki aika boou ni karikirakean te bitineti mai Tecnológico de Monterrey n 2011. Angiin ana tai e mwakuri bwa te tibi aobitia ni kakoroi moti ibukin Sertexa, te kambana ibukin bao ni mwamwananga.
Inanon ana tai ni karaoa weteana, Unimwaane Villanueva e beku bwa te Itingaun n Aono i Mexico. E a tia naba ni beku bwa te beretitenti i California Arcadia Mition ao n riki bwa te kauntira ae rietaata, te kauntira n te beretitentii n te titeiki, bitiobi, ao te tarekita n te bwaburiki abeeati.