Kakaean te Tabo ni Katantan man Angibuakan te Maiu
Iesu Kristo ao Ana Mwakuri ni Kamaiu bon te tabo ni katantan are ti bane ni kainanoia, n aki tabe ma te angibuaka are a bwakariira inanon maiura.
Ngkoa i nukan te 90 tabun, ngke I mena n te kaoreti, I kaina te Kaua ni Kambwana n te Tabo n Tiriai n Santiago i Chile. N tain au beku ikekei, I mamaeka n autin te tabo n tiriai bwa I kaina te uatei n te tairiki. Ni babanen te ririki, I tuangaki bwa N a riai ni mena n autin te tabo n tiriai tebongina imwain tain te Kaririki ibukina bwa ni katoa tai e na bon bae ni iai tabeua kangaanga aika a na karina n riki. I kubanako, bwa I kaeka, “E bon koaua”
Eng, I uringnga n ara tai n tataninga ngai ma raou ni mwakuri ngke, n te nukanibong, e a moana n nako kain te karebwrebwe n te kawa i Santiago. Ti inga ni irabwati ni katekeraoira ibukin te ririki ae e boou. N te tai ae e aki maan e tang beron te tabo n tiriai, ni kaotia bwa iai te kangaanga ae e karina n riki. Ti bootii ara bwai ni mwakuri ao n tokara te kaa n tiriai. Iaon kawaira nakon te bwai are e riki, ngke ti buti irarikiia aomata aika mwaiti ake a bukamarua te ririki ae e boou, I noria bwa a bane n aki raraoma ao n tabeaianga. A bane n rau ao ni kukurei n angin te tiama n te tairiki anne. Ma n te tabo teuana ni kaan, aomata ake ti kawaekoa nakoia ni buokiia a bon reke n te kangaanga ae korakora.
Te taneiai aio e buokai ni kamataataai bwa e ngae ngke a nakoraoi bwaai inanon maiura, e na roko te tai ni maiura n tatabemaniira nako are ti na kaitara ma taian kakaewenako ao aika a karina ao angibuaka are e na uotiira nakon tokin ara konaa ni kaitarai. Maiun rabwata, iango, utu, ao kakaewenako n ara tabo ni mwakuri; angibuaka n te aba; ao tabeua bwaai ibukin te maiu ke te mate bon tabeua mai ibuakon katooto n te angibuaka ake ti na kaitarai n te maiu aei.
Ngkana ti kaitara ma angibuaka aikai, ti aki toki n rinanon namakin n te bwaranano ke te maaku. E taku Beretitenti Russell M. Nelson, “Te onhimakli bon bwain aorakian te maaku”—te onimaki iroun ara Uea Iesu Kristo (“E Na Noraki am Onimaki,” Liahona, Meei 2014, 29). I a tia n norii taian angibuaka ake a rotii maiua aomata, I a tia n ataia bwa n aki tabe bwa aekakira te angibuaka are e roko iaora—bwa tao iai katokana ke tao bon iai te tai are e na toki iai—bon tii teuana te tabo ni katantan, ao bon ti tebo ni kabane nakon taian angibuaka n aekakina nako. Te tabo ni katantan ae katauraoaki iroun Tamara are i Karawa aei bon ara Uea Iesu Kristo ao Ana Mwakuri ni Kamaiu.
Bon akea temanna ae e na aki rotaki n angibuaka aikai. Ereman, te burabeti n Ana Boki Moomon, e reireinira ni kangai: “Uringa bwa iaon te bwaa are ara Tia Kaboomwi, are Kristo, natin te Atua, are kam na riai ni katea iai aami; bwa ngkana te riaboro e kanakoa te ang mairouna ae korakora, eng, ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki totoki, ibukin te bwai are ko kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka” (Ereman 5:12).
Unimwaane Robert D. Hales, are iai oin ana taneiai n rinanon te angibuaka, e taku: “Te karawawataaki e tabangaki; arora ni kaitaraa te karawawata e bon nakoira n tatabemaniira nako. Te karawawataaki e kona n rootiira teuana ni kawai aika uoua. E kona n reke bwa te kakorakora ao te kaitiakaki ae ti rinanona n raonaki ma te onimaki, ke e kona ni riki bwa kamaunakira inanon maiura ngkana akea ara onimaki n ana mwakuri ni kamaiu te Uea” (“Nanokawakim E na Onikaki nakon te Kimwareirei,” Ensign, Nob. 1983, 66).
Ni karekean te kukurei are e anga Iesu Kristo ao Ana Mwakuri ni Kamaiu, ti riai ni karekea ara onimaki Irouna—te onimaki are e na anganiira te kona n tokanikai iaon taian maraki ake akea tiaia, n ana taratara te aonaaba. E a tia ni berita bwa E na kabebetei uotara ngkana ti Nakoina ni baike ti karaoi.
“Bane mai nakoiu,” E taku, “ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou, bwa I nimamanei ao i nanorinano, ao e na reke i roumi iai motikan rawaia tamneimi.
“Ba e aoraoi amou ao e bebete uotau” (Mataio 11:28–30; Taraa naba Motiaea 24:14–15).
E taekinaki bwa “temana are iai ana onimaki, akea te kabwarabwara ae e na karaoaki. Temanna are akea ana onimaki, akea te kabwarabwara ae riai.” (Te rongorongo aio e kaineti nakon Thomas Aquinas ma bon tabeua kibuntaeka ni baike e reirei iaona) Ma, a bon memere ara atatai ni bwaai ake a riki iaon te aonaaba aei, ao n angiin te tai ti aki karekea kaekaan te titiraki ae bukin tera. Bukin teraa e riki aei? Bukin tera e riki aei nakoiu? Tera ae I riai n reiakina? Ngkana aki reke kaekaan titiraki iroura, ana kaeka ara Tia Kamaiu are e anga nakon te Burabeti Iotebwa Timiti n te Karabuti i Liberty a kaineti naba nakoira:
“Natiu, e na mena te rau n tamneim; am kangaanga ao karawawatakim a na riki ma tii n te tai ae uarereke;
“Ao ngkanne, ngkana ko teimatoa n rinanona n te aro ae raoiroi, te Atua e na karietako i eta” (Reirei ao Berita aika Tabu 121:7–8).
E ngae ngke a rawata aomata aika iai aia kakoaua iroun Iesu Kristo, te titiraki ae kakawaki bwa tao ti kakoaua Irouna ao tao ti kakoauai baike E reireiniira ao n tuangiira bwa ti na karaoi. Tao temanna e na iango, “Tera te bwai ae e ataia Iesu Kristo n te bwai ae e riki nakoiu? E kanga n ataia bwa tera ae I kainanoia bwa I aonga ni kukurei?” Ni koauana, bon ara Tia Kamaiu ao te Tia Tei Ibukira are e taetae ni burabeti ibukina Itaia ngke e kangai:
“E riribaki ao e kakiaki irouia aomata; te aomata ae nananokawaki, ao e ata naba te rawawata. …
“E anai rawawatara, ao e uououti nanokawakira. …
“Ma e ewaraki ibukin ara bure, e kamanatuaki ibukin ara buakaka: e mena iaona te boaki are e reke iai ara raoi; ao ti kamaiuaki n oreana” (Itaia 53:3–5).
E reireiniira naba te Abotoro Betero iaon te Tia Kamaiu, n taku, “Ao E uoti ara bure n rabatana i aon te kai, bwa ti, na mate nakon ara bure ni kitan, ao ti na kabane maiura ibukin te raoiroi; ao kam kamaiuaki n oreana” (1 Betero 2:24).
E ngae ngke e a kaan tain kamatean Betero, ana taeka a aki kaota te maaku ke bwaai aika bubuaka bwa ana riki, ma e tii, reirei nakoia Aika Itiaki bwa ana “kimwareirei,” e ngae ngke a mena “ni bwai ni kataami aika a bati aroia.” E kauringiira Betero bwa ti na uringa ae “kataan [ara] onimaki, … ao e bon kataaki naba n te ai,” e na kairi nakon “karaoiroami ma neboami ma karineami ni manga kaotakin Iesu Kristo” ao nakon “maiun tamnei[ra]” (1 Betero 1:6–7, 9).
E reitinako:
“Noria, kam na tai mimi n te bwai ni kammaraki ae nang kataingkami, ngke kanga e ituingkami te bwai teuana ae kamimi:
“Ma kam na kimwareirei, ngkai kam buokanibai ni marakin Kristo, bwa, ngkana e kaotki neboakina, kam na kimwareirei naba ma te kimwareirei ae bati” (1 Betero 4:12–13).
E reirei Beretitenti Russell M. Nelson bwa “Aika Itiaki a kona ni kukurei iaan kaangaanga ni kabane ake a mena inanona.… “Ngkana e kaineti maiura iaon ana babaire ni kamaiu te Atua … ao Iesu Kristo ao Ana euangkerio, ti kona n namakina te kimwareirei n aki tabe ma bwai aika a riki—ke ake a aki riki—inanon maiura. Te kimwareirei e roko mai Irouna ao ibukina ngkai bon Ngaia. Bon ngaia oin te kimwareirei” (“Joy and Spiritual Survival,” Riaona, Nobembwa 2016, 82).
E koaua, e bon bebete taekinan bwaai aikai ngkana ti tuai rinanon angibuaka aikai nakon are ti bon mena inanona ao ni maiuakin n tain te angibuaka. Ma ngkai tariu ao maneu ngkami, Au kantaninga bwa kam namakina ae I rang tangiria n tibwaia ma ngkami kakawakin ataakina bwa Iesu Kristo ao Ana Mwakuri ni Kamaiu bon te tabo ni katantan are ti bane ni kainanoia, n aki tabe ma te angibuaka are a bwakariira inanon maiura.
I reiakinna bwa ngaira ni kabane bon natin te Atua, ao E tangirira, bwa ao ti aki tiku n tii ngaira. I kaoingkami n nakomai ao nooria bwa E kona ni kabebetei uotami ao n riki bwa te tabo ni katantan are ko ukoukoria. Nakomai ao buokiia tabeman ni kunea te tabo ni katantan are a kaman kakariariaa. Nakomai ao tiiku ma ngaira n te tabo ni katantan aei, are e na buokiko n totokoi angibuakan te maiu. Akea te nanokokoraki inanou bwa ngkana ko nakomai, ko na noria, ko na ibuobuoki, ao ko na tiku.
Te burabeti Aramwa e taekina aei nakon natina te mwaane: “I ataia bwa ane e onimakina te Atua ao a na bon boutokaaki n rawawataia, ma aia kaangaanga, ma karawawatakiia, ao a na tabekakirake n te kabanea ni bong” (Aramwa 36:3).
E taku te Tia Kamaiu bon Ngaia :
“E riai nanomi ni kabebeteaki … ; bwa rabwata ni kabane a mena i nanon baiu; tiiku n rau ao n ataia bwa Ngai te Atua. …
“Ngaia are, tai maaku e ngae ngkana kam na mate; bwa n te aonaba aei kukureimi e aki bwanin, ma irou kukureimi e bwanin” (Reirei ao Berita aika Tabu 101:16, 36).
Te anene n taromauri “E Na Rau, Nanou,” are e a tia n ringa nanou n taai aika mwaiti, iai inanona te rongorongo ni karaunano nakon te nano. Taekana e koreaki n aron aio:
E na rau, nanou: Te tai ni kamaiu e a waekoa n roko
Ngkana ti a maeka ma te Uea n naki toki,
Ngkana e a maunanako te un, te nanokawaki, ao te maaku,
Mwanuokini rawawata, te tangira ae itiaki te kimwareirei e kaokaki.
E na rau, nanou: Ngkana bitaki ao ranimata aikoa riki,
Ti bane ni kamaiuaki ao kakabwaia ti na bane ni kaitibo n te taina. (Anene n Taromauri, nambwa. 129).
Ngkai ti kaitara ma angibuakan te maiu, I ataia bwa ngkana ti karaoa ara kabanea n tamaroa n ara kekeiaki ao n onimaki iaon Iesu Kristo ao Ana Mwakuri ni Kamaiu bwa ara tabo ni katantan, ti na kakabwaiaaki ma te kabebeteaki, te mwengaraoi, te korakora, te taubaang, te rau are ti ukoukoria, ma te koaua inanora bwa n tokin ara tai n te aonaaba aei, ti na ongo ana taeka te Mwatita: “E raoiroi, te toro ae ko raoiroi ae ko kakaonimaki: … ko na rin inanon kimwareirein am uea” (Mataio 25:21). N aran Iesu Kristo, amen.