Kaukakin Karawa ibukin te Buoka
Ti na katikui ara onimaki ao ni kamwakuriia inanon Iesu Kristo!
Ai tikauara n akea kabotauana te tetere aei! Kam rabwa Laudy ao Enzo aika kam tangiraki. Kam tei ibukiia kairake n ataeinaine ao ataeinimwaane aika tikauarerei inanon te Ekaretia n te kabanea n tamaroa.
Tariu ao mwaneu aika kam tangiraki, ti a tia n ongoraekin ae mwaiti n te bong aei ibukin Kaokakin te Ekaretia—te Ekaretia raoi are e kateia ara Tia Kamaiu, ae Iesu Kristo, n ana tai ni beku n te aonnaba ngkoa. E moanaki Kaokakin Bwaai 200 te ririki n nako are e bwakara raoi te Spring ngke Te Atua te Tama ao Natina ae Iesu Kristo, a kaoti nakon Iotebwa Timiti.
Tebwina te ririki imwin te mii ni burabeti ae akea n aiarona, te Burabeti Iotebwa Timiti ao niman riki aomata a weteaki bwa taan katea ana Ekaretia ae kaokaki.
Man botakiia te kurubu ae karako n Eberi 6, 1830, ao e riki te botaki ae kabutaa te aonnaba ae raka iaon 16 te mirion kaina. Te raoiroi e karekea te Ekaretia aei n te aonnaba ni kabuta ni kauarerekean te kainnano ao karekean te mwengaraoi ibukiia aomata e bon rababanako kinakina. Ma bukina raoi bwa e na buokiia mwaane, aine, ao ataei n iriira te Uea ae Iesu Kristo, kawakin ana tua, ao n tau nakon te kabanea ni korakora ni kakabwaia—te maiu n akea tokina ma te Atua ao ake a tangiraki irouia.1
Ni kauringaan te tai ae kakawaki are bon karokoana inanon n te 1820, e rangi ni kakawaki nakoia kain te aro ngkai ti karinea Iotebwa Timiti bwa ana burabeti te Atua, bon tiaki ana aro Iotebwa Timiti aio ke ana aro Moomon. Aio bon ana Ekaretia Iesu Kristo. E katonua raoi te ara are e na aranaki iai ana Ekaretia “Bwa anne aran au ekaretia ni boong aika kaitira, ae Ana Ekaretia Iesu Kristo ibukiia aika Itiaki ni Boong aika Kaitira.”2
I a tia n taekinna mai mwaina ibukin te kawai ni kaetieti ae kainanoaki n aron taekinan aran te Ekaretia.3 Man te tai anne, a mwaiti bwaai ake a tia ni karaoaki ni kakoroaki bukin kaetan aei. I bon rangi ni kimwareirei nakon President M Russel Ballard ao aia Koorom Abotoro ake Tengaun ma Uoman ni kabaneia, ake a tia ni karaoa ae mwaiti ni kaira te mwakuri aei ma ake iai rekerekeia ma te iango ae na katanoata n te tairiki aei.
Mataniwi nako n te Ekaretia, taabo ni mwakuri, kambwana nako ao mirion kain te ekaretia-ao tabeman riki--a kabongana raoi ngkai aran te Ekaretia. Teiia nako ana bwai te Ekaretia aika a tia ni kariakaki e a tia n katamaroaaki. Ana website ngkai te Ekaretia bon ChurchofJesusChrist.org ChurchofJesusChrist.org. Email Atureti, araia domain, media channels a tia ni kanakoraoaki. Ara kuaea ae tatangiraki e ataaki ngkai bwa te “Tabaenako Kuaea n te Tembora Tikuea.
Ti waaki nakon mwakuri aika kamimi aikai ibukina bwa ngkana ti buuta aran te Tia Kamaiu man aran Ana Ekaretia, ti bon kanakoa Ngaia n tiaki nannora ae boton ara nebonebo ao maiura. Ngke ti katoka aran te Tia Kamaiu iaora n te bwbetito, ti motinnano bwa ti na kakoaua, n ara taeka, n ara iango ao ara mwakuri, bwa Iesu bon te Kristo.4
“I berita nakoimi mai mwaaina bwa ngkana ti karaoa ara kabanea n tamaroa ni kaoka aran ana Ekaretia te Uea ae eti raoi, E na kabwaroa Mwaakana ao ana kakabwaia nakoaoia Aika Itiaki, n te aro ae ti tuai n nooria mai mwaina.”5 I kaboua te berita anne n te bong aei.
Ni buokira bwa ti na ururinga man kona ni kina Ana Ekaretia Iesu Kristo Ibukiia Aika Itiaki Ni Boong aika Kaitira bwa Ana Ekaretia te Uea ti kukurei ni kaotia nakoimi te kanikina are e na kanikinaea iai nnen Iesu Kristo are i nuuka inanon Ana Ekaretia.
Te kanikinaa aei e ikota naba iai aran te Ekaretia are e mena n atibun te maninganinga. Iesu Kristo bon bouan te maninganinga.6
I nukan te kanikinaa bon katotongan ana boua ae karaki ae te mabora Thorvaldsen ae te Christus. E kaota te Uea ae a tia ni manga uti, ae maiu are arora baina ni inga ma koraki nikabane ake a kan nakoina.
Nanona raoi, bon Iesu Kristo are tei i aan te kateitei. Te kateitei e kauringiira te Tia Tia Kamaiu ae mangauti ni otinako man ruanimate n te katenibong imwin taurakina n te kaibangaki.
Te kanikinaa aei e riai n rangi n namakinaki iroia aika mwaiti, ngkai ti a tia ni kaman kinaa te Uangkerio ae a tia ni kaokaki ma te Kristo ae maiu, ae a tia ni manga uti.
Te kanikinaa e na kabonganaaki ngkai bwa te tia kaoti koroboki, rongorongo, ao bwaai aika riki inanon te Ekaretia aika a tia ni kariakaki7 E kauringiira nikabane bwa aio bon ana Ekaretia te Tia Kamaiu ao bwaai nikabae ti karaoi ngaira kain ana Ekaretia ana boboto iaon Iesu Kristo ao Ana Euangkerio.
Ngkai, tariu ao mwaneu, ningabong bon Tabatin te Baanni, are e reirei ni wiikatekeia Unimwaane Gong. Ngkanne ti na rinnako inanon te wiiki ae onoti are toki ma te Itita. Ngkai ngaira taan ririmwin Iesu Kristo, te maiu n te bong aei are e buti iai te Corona Virus e a tia ni karika te aki rau ni kabwanina te aonnaba, ti na aki tii taetae ibukin Kristo ke n kabwarabwara ibukin Kristo ke ni kabongana te kanikina ae tei ibukin Kristo.
Ti na katikui ara onimaki ao ni kamwakuriia inanon Iesu Kristo!
N aron ae kam ataia, kaain te Ekaretia a aki mamatam teuana te bong ni katoa namwakaina.
Tuan te aki mamatam boni mangkoa. E Kaman tia ni kakaraoaki irouia aomata aika ninikoria inanon te Baibwara inanon boong ake ngkoa. Moote, Tavita, Etira, Neemia, Etita, Itaia, Taniera, Ioera, ao a bati riki ake a aki mamatam ao a kabwarabwara ibukin te aki mamatam.8 Rinanon ana koroboki Itaia, te Uea e taku: “Tiaki bon aio te aki mamatam ae I tangiria? ae te kabwara ana bwai ni kabaebae te buakaka, ma te kabwara kabaean te amo, ma te kanakoia akana a karawawataki bwa a na inaomata?”9
Te abotoro Bauro e boaia Aomata Aika Itiaki i Korinto ni kangai “anga ngkami nakon te aki mamatam ao te tataro.”10 Bon Te Tia Kamaiu ae taekinna bwa iai bwaai aika aki “otinako ma ti man te tataro ao te akimamatam.”11
I tibwa taekinna n ae nako n te witeo bwa “ngkai ngai te taokita ao te tia korokoro, iai korakoran katikan nanou irouia taan rabwakau n te kuakua, scientists, ao tabeman ake a mwkuri n akea aia tai n kauarerekea butin te Coran Virus 19”12
Ngkai ngai te beretitenti n Ana Ekaretia Iesu Kristo Ibukiia Aika Itiaki ni Boonga aika Kaitira ao ana Abotoro Iesu Kristo, I ataia te Atua “iai irouna te mwaaka ni kabanea, te wanawana , ma te atatai nikabanea; E atai bwaai nikabane, ao bon te Aomata ae nanoanga, nakon te kamaiuaki, nakoia ake a rairii nanoia ao ni kakoaua arana.”13
Ngaia are, inanon taai ni kurakai, ngkana e roko te aoraki n te karinan ae a korakora butinakona, te bwai ae ti na bon riai ni karaoia, bon wetean Tamara are I karawa ao Natina, te Tia Katoki-aoraki ae bane arona-bwa a na kaotii mwakaia ni kakabwaia kain te aonnaba.
N au rongorongo ae oti n te video, I kaoi aomata nikabane bwa a na raoniira n te akimamatam n te Tabati, Maati 29, 2020. A mwaiti mai buakomi a tia n noora te video aei ao raoniira n te akimamatam. Tabeman tao a tuai. Ti bon kainnanoa naba ngkai te buoka mai karawa.
Ngkana e bong ngkai, tariu ao mwaneu aika tangiraki, n aiaron natin Motiaea mwaane,a kabatia te akimamatam ao te tataro,14 ao mwakoron ara maungatabu ni kabuta n 2020, I kaoa riki te aonnaba nakon te akimamatam riki teuana. Ibukiia nake e raoiroi marurungiia, ti na akimamatam, tataro ao katiteuanaaki riki n ara onimaki. Ti na onnon ma te tataro ibukin te kabebeteaki man te buti n aoraki ae kabuta te aonnaba.
I kaoiia ni kabane, ni ikotaki ma nake tiaki raora n ara onimaki, bwa ti na akimamatam ao n tataro n te Kanimabong ae Raoiroi, n Eberi 10, bwa e na taobaraaki te buti-n-aoraki ngkai, ana kamanoaki taan tararua, e na kakorakoraaki kaubwain te aonnaba, ao te maiu e na okira arona.
Tina kanga ni akimamatam? Uoua te tai n amwarake ke te maan ae 24 te aoa e bon kakaraoaki. Ma ko na bon iangoia bwa tera ae ko baireia bwa am anganano, ngkana ko uringa ana katoki n anganano te Tia Kamaiu ibukim. Ti bia reitiira n onnon ibukin te kamaiuaki nakon te aonnaba ni kabanea.
Te Kanimabong ae Raoiroi e na riki bwa te bong ae moanibaan te raoiroi bwa aong Tamara are I karawa ao Natina n.ongo iroura!
Tariu ao mwaneu aika tangiraki, I kaota au tangira ae korakora ibukimii, ni kaairaki ma au koaua n mwakuri ae mimitong ae ti bane ni irekereke iai. Aio bon Ana Ekaretia Iesu Kristo ibukiia Aika Itiaki ni Boong aika Kaitira. Bon Ngaia ae kairiira ni baai ni kabane ake ti karaoi. I bon ataia E na bon kaeka nakon aia onnon Ana aomata. I kakoaua n aran Iesu Kristo ae tabu, amen.