“Taraia Bwa Tera Ae Kona ni Karaoia te Onimaki Ae Uarereke?”
Godfrey J. Ellis
Washington, USA
Kamataata n te tamnei © Gary Alphonso, i2iart.com
Tabeua te tai n nako, kainabau ao Ngai ti kairiia uoman natira mwaane nako Buranti ni kawari taabo ake I a tia ni mitinare iaona n ae bwanin au tai iai. Ti kawari mwaanga n te Ekaretia ae I a tia ni mwakuri iai ao ni kukurei ma membwa ake I a tia n reireiniia. Ti kawari naba taabo aika iai ngkoa rongorongoia.
Teuana te tabo bon nikiran kateitei n te Château de Châlucet ake a urubekebeke. Te auti ae te baereti ae bubura man maan e buakanaki ao n urubekeaki n ae korakora inanon tienture n nako. A rikirake aroka ni katobibia te kateitei ae uruaki aei, ao te kawai n nako ikekei e irariki ao n rangi ni kabwatete. E kaangaanga aron tamwarakera, ma e materaoi korakorara n tamwarakeia ngke tia roko iai.
Natiira mwaane a tangira te tamwarake rikaaki nakon te tabo ae aranaki n te taina bwa te n ne ni kaikain ao ni manga tamwarake ni waerake iaon oon te baereti ake a tiku n rietaata. E a tia te baereti n anai nanoia n aron are e a tia n anaa nanou 24 te ririki imwaina.
Ngke ti mena ikekei, angibuakan te tiamwa e kaoti mai kiraroa. E waekoa n roko nakoira te angibuaka. E kaona karawa naang aika roo ao te oota, n raonaki ma rebwen te baa ae korakora.
Ti waekoa n ruo man te kawai ni waerake ao ni waekoa ni biri nakon te ka ngke e waekoa n roko te angibuaka. N te tai ae waekoa, ao e a moanna ni bwaka te karau n ae korakora ao ni kamwaimwaira ao te kawai are e bareka e bitaki nakon te bokaboka. Ti raraoma bwa mwiina a tibanako waera ao ni bwaka rikaaki n te kawa are e kabwatete, ma ni kiri atiibu.
Ti nori tabeua taabo ni kamanomano ibuakon kaai i mataniwiin te kawai. Ti ikotaki iaon te tabo ni katantan ao n aki ataia bwa a na maanra te tai ae ti na tataninga iai n oki nako naano.
“Ti a karaoa ara tataro,” e taku natira te mwaane ae te kabanea ni uarereke.
E tuatua bwa e na karaoia ao e tataro bwa e na toki te karau bwa ti aonga n ruo rikaaki man te mwanono n akea te kabuanibwai. E taraira ao e taku, “Ngkai te bwai ae ti kainnanoia bon te onimaki ae tau.”
I kabwarabwara bwa e ngae ngke e korakora ara onimaki, tataro n tainako aki kona ni kaekaaki n te kawai are ti tangiria.
“Tiaki,” e taku, “e na toki te karau inanon 10 te miniti!”
Imwiin tao 10 te miniti, e toki te karau.
“Ngaia anne, ti a nako!” e taku.
“Ngkana ti nako ngkai, ao e na manga bwaka te karau ao ti na bae, ” e taku natira te mwaane ae ikawai riki.
“E na bon aki!” e kaeka natira te kabanea ni uarereke. “Ti a nako!”
Ti karaoa kawaira rinanon te kawai ae mau riki, ni kamwaingi buakonikai ao mwaanga inanon kawaira. N okira nakon te kaa, ti karaoa te tataro ni kakaitau. N te tai ae waekoa ao e a manga bwaka te karau.
“Taraia bwa tera ae kona ni karaoia te onimaki ae uarereke?” e taku natira te mmwaane ma te nanorinano.
E reireiniira reirei ni kabane aika tamaroa n te bong anne.