Te Kakabwaia Bon Ti Ngaia Ae I Kona N Anga
Jonathan Mafra Sena de Santana
Santa Catarina, Brazil
Kamataata n te tamnei iroun Allen Garns
E bane au reirei n te kuura n rooia n ana tai raoi ni moan rekenibong natiu te aine. Kainnabau ao ngai ti ingainga ni bukamarua au angabeeba, ana rekenibong natira, ao tibwanga aika boou ake a roko nakoira, ma e aki koro nanon are ti iangoia.
I kunea bwa akea au mwakuri tabeua te tai imwin karekean au beeba ao e matoataoa reken au mwakuri. Imwin anne, a kaoti kaangaanga ma te kataumwane. Karaoan te bukamaru ae uarereke ibukin te rekenibong e bon kaangaanga.
Imwin te marooro ae bati ma kainnabau, ti butimwaea tibwangara aei. E bon aki bebete irou ngkai te tama ngai n akean au kona n kabooa naba te bwaintangira ae uarereke ibukin natiu ao n nora kainnabau ae tangiraki n aki kukurei.
I aki oota bwa tera ae riki. I tataro ao ni butiia Tamara are i Karawa bwa e na buokai n oota n Ana kantaninga ibukiu. Ngkekei naba, n aron te bwana nakon au iango, I ongo taeka aikai: “Iai iroum bwai aika a raka riki kakaawakia nakon bwain te aonaba aio. Iai iroum te nakoanibonga. Tera te bwaintangira ae tamaroa riki irarikin ana kakabwaia te nakoanibonga are ko kona n angan natim?”
A ranran matau ngke I iangoia bwa kakaawakira te nakoanibonga irou. E onrake nanou n te kakaitau ngke I noria bwa te nakoanibonga bon te mwaaka are e kona n kabaeiia au utu n ae akea tokina.
I tibwaua au namakin ma kainnabau. I tuangnga bwa anganakin natira ana kakabwaia te nakoanibonga bon ti ngaia are I kona n anga. Ti uaia n motikia bwa aio e na uota nakoina te kukurei ao te rau, ao e rangi n tau anne.
N bongin ana rekenibong natira, raoraora, ara koraki, ao kaain rarikira a uota te keeke ao te bwai ni katamaroa aika uarereke. Ti kakaitau ni bukamarua te bong ae onoti aei ma naake ti tangiriia. N te tairiki anne, I katokai baiu iaon atun natiu ao n anganna ana kakabwaia te nakoanibonga. I kakabwaia ma baike e kairai Tamnein te Uea bwa N na taekin.
Ti teimatoa n rinanon te tai ae bibitaki man kakaewenako ibukin akean te mwakuri ao te mwane. Ma ribuakon te nanokawaki ao te aki kukurei, te rau ao te raunnano a roko nakoira rinanon ara Tia Kamaiu, Iesu Kristo. Akea au nanokokoraki bwa kaainakin Ana Ekaretia Iesu Kristo Ibukiia Aika Itiaki ni Boong aika Kaitira ma te kona n karekea ana kakabwaia te nakoanibonga bon te kakabwaia. Bon ti arei are I kona n anga n ana rekenibong natiu, ma e riaon ae tau.