Ang Pagsisikap Nating Lahat na Maramdamang Kabilang Tayo

Larawan

young adults with welcoming arms

Larawan mula sa Getty Images

Naranasan mo na ba na pagpasok mo sa isang silid, lahat ay biglang napatingin sa iyo? O mas matindi pa—parang walang nakapansin sa iyo? Naranasan ko na iyon. Maaaring makasakit sa damdamin ang mga sitwasyong iyon dahil hangad nating lahat na tanggapin tayo.

Tayo ay pinagbubuklod ng ebanghelyo ni Jesucristo. Ngunit kung minsan, mahirap maramdamang kabilang tayo dahil sa iba-ibang kalagayan natin sa buhay. Sa maraming indibiduwal na miyembro ng Simbahan, may mga bagong miyembro na maaaring nagsisikap na maramdamang kabilang sila. Sa pahina 44, ibinahagi ko kung paano nagbago ang aking pananaw tungkol sa pagtanggap ng iba at pagtupad sa mga inaasahan ng Panginoon.

Marami ring katulad ni Jodi at ng kanyang asawa, na may problema sa hindi pagkakaroon ng anak o iba pang mga pagsubok na maaaring maging dahilan para madama nila na tila hindi sila kabilang. Basahin ang kanyang kuwento sa pahina 46.

Sa mga artikulong digital lamang, ibinahagi ni Rachelle kung paano nakagawa ng kaibhan ang malugod na pagtanggap sa kanya ng mga miyembro nang bumalik siya sa simbahan. Itinuro ni Eric na tayong lahat ay kailangan sa katawan ni Cristo, at ibinahagi ni Aspen kung paano magiging kabilang at magtatagumpay sa simbahan bilang isang napakamahiyaing tao.

Ang Simbahan ay puno ng mga tao na nakadaramang hindi sila kabilang. Maaaring isa ka sa kanila. Ngunit maaari tayong lahat na makatulong sa ating sariling paraan para maipadama sa lahat ng miyembro na malugod silang tinatanggap. Dahil ang pagiging kabilang ay hindi batay sa kalagayan—ito ay batay sa kung sino ka talaga at kung sino ang sinisikap mong tularan. Bilang mga anak ng Diyos, lahat tayo ay kabilang sa Simbahan ni Cristo.

Tapat na sumasainyo,

Brian S. King

Mga Payo …

Mula sa mga young adult tungkol sa pagiging kabilang

“Ayos lang na maramdaman mong hindi ka kabilang, pero tandaan na lahat tayo ay natatangi kaya dapat nating tanggapin ang pagkakaiba ng isa’t isa.”

—Estefany Sofia Correa Unas, Alberta, Canada

“Dapat naroon ka dahil sa mga tamang dahilan. Kung naroon ka para sumunod kay Cristo, wala nang ibang mahalaga pa.”

—Paula Sáenz, Buenos Aires, Argentina

“Dahil lumaki ako kasama ang mga kapatid kong lalaki na matinding halimbawa ng pagiging iba (pareho silang may autism at hindi makapagsalita), naiintindihan ko ang mga taong talagang naiiba at kinakaibigan ko ang mga taong maaaring hindi napapansin. Lahat ng tao ay maaaring matuto sa iba pang mga tao, sino ka man o anuman ang kalagayan mo sa buhay ngayon. May maiaambag ka, at mahal ka ng Diyos tulad ng pagmamahal Niya sa lahat ng iba pa, mahal na mahal.”

—Stephanie E. Jensen, Washington, USA

“Dahil bagong kasapi ako sa Simbahan pinapahalagahan ko ang mga bagay na maaaring itinuturing ng maraming tao na hindi gaanong mahalaga tungkol sa mga kaibigan. Dahil doon, naging kaibigan ako para sa isang investigator upang mag-anyaya, sumuporta, at magsaya kasama ang isang bagong kakilala. Maaaring ikaw ang taong kailangan nila na susuporta sa kanila. Para sa akin, tinulungan nila akong patuloy na piliin ang tamang landas.

“Kaya maging matulunging kaibigan tulad niyon. Malay mo; baka sila ang mga kaibigang kailangan mo.”

—Hikairoa Mohi, Waikato, New Zealand

Mula sa mga lider ng Simbahan

““Wala pa akong nakikilalang sinuman na ayaw mapabilang sa isang bagay na nagpadama sa kanilang kapaki-pakinabang at mahalaga sila.

“Kapag iniisip ng mga tao, ‘Mayroon bang puwang para sa akin?’ maaaring maraming dahilan sa likod niyon. At ngayon, itinatanong nila sa kanilang sarili, ‘Tanggap ba ako rito? Nabibilang ba ako rito? Talaga bang kailangan nila ako?’ At nais kong sabihin, ‘Oo.’

“Naiisip ko ang metapora ni Pablo, na gustung-gusto ko, na nagsasabing ang Simbahan ang katawan ni Cristo. Sinabi niya na nabinyagan tayo sa katawang iyon, at sinabi niya na ito ay isang katawan. Maraming miyembro, ngunit isang katawan. …

“Kapag nadarama ng isang tao na nakahiwalay siya, hindi ko ikinakaila na talagang posibleng madama iyon at kung bakit natural lang na ganoon ang madama. Ngunit sa tuwing madarama natin iyon, bawat isa sa atin ay kailangang tumigil sandali at magnilay-nilay, ‘Si Jesucristo ay namatay para sa akin. Inisip ni Jesucristo na karapat-dapat ako sa pagsasakripisyo Niya ng Kanyang buhay. At mahal Niya ako, may hangarin Siya para sa akin, at makagagawa Siya ng kaibhan sa aking buhay. Maaari akong mabago ng Kanyang biyaya. At marahil ang taong ito na nakaupo sa tabi ko, na hindi ako pinapansin o gusto pa ngang lumayo sa akin, ay hindi ako mahal tulad ng pagmamahal ni Cristo. Gayunman, hindi niyon nababago kung ano ang nadarama ni Cristo para sa akin at ang maaari kong maisakatuparan dahil kay Cristo.’”

Elder D. Todd Christofferson ng Korum ng Labindalawang Apostol, “Is There a Place for Me?” (Unity in Diversity video series), ChurchofJesusChrist.org.