“Ug ang Ginoo Mitawag sa Iyang Mga Katawhan og Zion”
Ni Sharon Eubank
Unang Magtatambag sa Kinatibuk-ang Kapangulohan sa Relief Society
Hinaut nga atong matuman ang propetikanhong mando sa pagtukod og Zion—nga mahiusa sa kasingkasing ug sa hunahuna, magpuyo sa pagkamatarung, ug maningkamot nga walay kabus taliwala kanato.
Mga paghulagway pinaagi ni Dan Burr
Kon ang mga tawo mobisita sa Church Humanitarian Center sa Siyudad sa Salt Lake, kanunay nako silang hangyoon sa pagbasa og kusog sa pamahayag ni Joseph Smith nga gibitay diha sa lobby: “Ang [usa ka miyembro sa Simbahan] magpakaon sa gigutom, mosinina sa hubo, mosangkap sa biyuda, mopahid sa luha sa ilo [walay ginikanan], mohupay sa masakiton, maanaa [man] dinhi sa simbahan, o bisan asa, o bisan sa walay simbahan, bisan asa siya makakaplag kanila.”1
Ang pamahayag gihimo dihang ang Simbahan napuno sa utang, ang mga lider mipahimutang sa mga kinabig ngadto sa bag-ong nasud, ug ang Templo sa Nauvoo gitukod pa. Sa unsang paagi kaha nakonsiderar ni Propeta Joseph Smith ang pagsangkap sa mga kabus dinhi niini nga Simbahan, unsaon na lang ang uban? Apan bisan kadtong anaa sa pait kaayong mga kahimtang, nakasabut si Joseph nga ang pag-amuma niadtong nanginahanglan mao gayud kanunay ang tutukan sa katawhan sa pakigsaad sa Ginoo.
Usa ka Panan-awon sa Zion
Usa sa unang mga tahas nga gihimo ni Joseph human sa pag-organisar sa Simbahan niadtong Abril 1830 mao ang dinasig nga paghubad sa Biblia. Gikahibulong ko kini sa kanunay. Niining mahinungdanon kaayo nga panahon sa kasaysayan sa Simbahan, nganong gibalik man niya sa paghubad ang Genesis? Nga kana nga basahon nailhan na man kaayong daan. Apan ang gihimong paghubad sa katapusan nahimong basahon ni Moises diha sa Perlas nga Labing Bililhon, inubanan sa bililhong mga detalye sa mahinungdanong doktrinal nga importansya sa moderno nga Simbahan.
Kini nga mga kapitulo mipadayag sa mga kasinatian ni Moises ug ni Enoch, diin sa ubang mga paagi susama ra kaayo sa kaugalingong kasinatian ni Joseph. Ang matag propeta gitawag sa Ginoo sa paghimo og talagsaong buhat. Ang Ginoo mipakita sa matag usa kanila sa Iyang mga gilalang aron mas maklaro nila sa pagtan-aw ang ilang bahin sa plano (tan-awa sa Doktrina ug mga Pakigsaad 76; Moises 1; 7). Ang usa ka summary sa ilang pinakamahinungdanong tahas nagpahayag sama sa mosunod: Pundukon ang Israel isip usa ka balaang nasud, tukuron ang Zion, ug mangandam sa pagsugat ni Jesukristo.
Apan unsaon sa pagtuman ang ingon niini nga butang? “Si Enoch mihatag og mubo nga tubag: “Ug ang Ginoo mitawag sa iyang mga katawhan og Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila” (Moises 7:18).
Ang mahinungdanong bahin sa misyon sa ulahing mga adlaw sa Simbahan mao ang pagwagtang sa kakabus diha sa atong mga komunidad ug sa atong mga kasingkasing; sa pag-establisar og hiniusa nga Zion; ug sa pag-andam sa katawhan sa pagbalik ni Jesukristo, ang Anak sa Dios.
Pagsangkap pinaagi sa Pamaagi sa Ginoo
Trilyon ka dolyares ang gigasto sa mga gobyerno ug sa mga organisasyon sa milabayng mga siglo alang sa pagwagtang sa kakabus. Apan sa tanang maayo nga mga intensyon sa maong buhat, ang dako kaayong bahin niini wala molampus ug usik lang. Ngano? Tungod kay sa dili tinuyo mimugna kini og kinaiya nga magsalig na lang nga dili na molihok imbis maningkamot.
Ang pamaagi sa Ginoo mao nga palig-unon kining duha, tighatag ug tigdawat, aron ang mga tawo himoong mga tinugyanan sa ilang mga kaugalingon, ug sa paghimaya sa mga kabus “nga ang mga adunahan ipaubos” (Doktrina ug mga Pakigsaad 104: 16). Usahay tawagon nato kini nga pagbarug sa kinaugalingong paningkamot, apan kini nagpasabut gayud sa pagdawat sa balaang gahum diha sulod sa matag indibidwal sa pagsulbad sa iyang kaugalingon nga mga problema uban sa tabang sa Dios, nga maghimo nga sila usab makaserbisyo sa uban.
Mga Ehemplo nga Daan ug Bag-o
Gihimo ni Joseph Smith ang malipayong pagserbisyo ngadto sa uban sa pamaagi sa Ginoo. Si James Leach ug ang iyang bayaw nga lalaki, human sa daghang adlaw nga pagpangita og trabaho nga walay kalampusan didto sa Nauvoo, determinado nga mangayo og tabang sa Propeta. Nahinumdom si James:
“Miingon ko, ‘Mr. Smith, kon mahimo intawon, aduna ka bay trabaho nga imong ikahatag kanamong duha, aron aduna kami magamit sa among panginahanglan?’ Mitan-aw siya kanamo uban sa usa ka malipayong panagway, ug uban sa maong pagbati sa pagkamabination, miingon, ‘Unya, mga higala, unsa man ang inyong kamaohan? … Makahimo ba mo og kanal?’ Mitubag ako nga buhaton namo ang labing maayo nga among mabuhat niana.
“… Sa dihang nahuman kini akong giadto ug gisultihan siya nga nahuman na kini. Iyang giadto ug gitan-aw kini ug miingon, ‘… Kon ako ang nagbuhat niini sa akong kaugalingon dili kini nako mabuhat nga ingon ini ka nindot. Karon dali kuyog nako.’ Gidala kami niya og balik ngadto sa iyang tindahan, ug misugo kanamo sa pagpili sa labing nindot nga hamon o piraso sa karneng baboy alang sa among kaugalingon. Ingon og manggiulawon, ako miingon nga mas gusto namo nga siya ang mohatag kanamo. Busa iyang gipili ang duha sa labing dako ug labing maayo nga piraso sa karne ug usa ka sako sa harina alang sa matag usa kanamo, ug nangutana kanamo kon kini igo na. Gisultihan namo siya nga kami andam nga motrabaho og dugang pa alang niini, apan siya miingon, ‘Kon kamo natagbaw, mga higala, ako usab.’
“Kami mipasalamat og maayo kaniya, ug mipauli sa panimalay nga nalipay sa kalumo sa kasingkasing sa Propeta sa atong Dios.”2
Ang usa ka modernong ehemplo sa susamang delikadong pagbalanse sa kamanggihatagon ug sa pagbarug sa kinaugalingong paningkamot nahitabo niadtong 2013 dihang gihapay sa Bagyong Haiyan ang sentro sa Pilipinas, nga miguba o midaot og kapin sa milyon ka panimalay. Imbis manghatag lang og tabang sa walay pagpinig, nga posibling moresulta nga magsalig na lang ug dili na molihok, gigamit sa Simbahan ang baruganan sa pagbarug sa kinaugalingong paningkamot aron makatabang sa naapektohang mga residente sa pagpalambo og mga kahanas nga gikinahanglan aron makabarug og balik. Gipamalit ang mga materyales para sa balay, ug ang lokal nga mga lider sa Simbahan nakigsabut og mga tawong makatudlo sa pagpanday. Ang mga residente nga nagkinahanglan og balay gihatagan og mga gamit, mga materyal, ug pagbansay, samtang sila ang nagpanday aron matukod ang kaugalingon nilang mga kapasilungan. Mitabang usab sila sa ilang mga silingan aron makahimo usab sa samang butang.
Sa katapusan, ang matag partisipante nakadawat og sertipiko sa bokasyonal [vocational certificate] nagpamatuod sa bag-o nilang nakat-unan nga mga kahanas ug naghimo nilang kwalipikado sa mahinungdanong mga oportunidad sa panarbaho. Kini nga kombinasyon sa tabang inubanan sa aktwal nga pagbansay wala lamang magtukod og mga kapasilungan—nagtukod kini og kapabilidad. Nakahimo kini og mas labaw pa kay sa pagpabarug og balik sa balay—napabarug og balik sa mga tawo ang pagsalig sa ilang kaugalingon.3
Ang Ginagmayng Kontribusyon Importante
Wala kinahanglana nga adunahan ka aron makatabang. Usa ka batan-ong lalaki misulat mahitungod sa iyang kasinatian uban ni Joseph Smith: “Didto ko sa balay ni Joseph … ug daghang tawo ang naglingkod sa koral. Si Joseph migawas ug nakigsulti namong tanan. Ug sa wala madugay usa ka lalaki ang mibarug ug miingon nga usa ka looy nga igsoong lalaki nga nagpuyo layo sa lungsod nasunugan sa iyang balay sa milabayng gabii. Hapit tanang lalaki miingon nalooy sila sa tawo. Mikuot si Joseph sa iyang bulsa, mikuha og lima ka dolyar ug miingon, ‘nalooy ko niini nga brother ngadto sa kantidad nga lima ka dolyar; kamong tanan pila man ang kantidad sa inyong gibati nga kalooy?’”4
Bag-o lang nakahimamat ko og usa ka 10 anyos nga batang lalaki gikan sa usa ka hilit nga komunidad kinsa migasto sa iyang kaugalingong gamay nga kantidad sa kwarta nga ipalit og voucher para ibakuna sa polyo sa usa ka bata. Ang batang lalaki nakabasa mahitungod sa mga bata nga naparalisar tungod sa polyo, ug dili siya gustong duna pay uban nga mag-antus gikan niini nga sakit. Natingala ko sa gibuhat niya nga pagtuon sa iyang kamanggihunahunaon mahitungod sa iyang gamay nga kontribusyon.
Klaro nga ang matag usa kanato adunay ikahatag, bisan unsa pay atong kahimtang, ug ang tinuod nga kahulugan sa atong kontribusyon dili masukod pinaagi lamang sa bili sa kwarta.
Ang Gahum sa Nagkahiusang Kasingkasing
Kon seryoso kita mahitungod sa atong mga pakigsaad, ang matag usa kanato makapaningkamot aron mahiusa sa kasingkasing ug hunahuna, sa pagpuyo diha sa pagkamatarung, ug aron walay mga kabus taliwala kanato. Mobugkos kini sa atong mga kasingkasing ug makatabang sa pagpakunhod sa dili patas nga mga kahimtang sa kalibutan. Apan adunay mas dako nga gahum kon ang katawhan sa pakigsaad mohiusa sa ilang mga paningkamot: mga pamilya, mga korum, Relief Society, mga klase sa Young Women, ug ang mga stake makaplano sa pagtubag sa mga panginahanglan sa ilang mga komunidad nga dako kaayo og epekto.
Ang tawhanon nga organisasyon sa Simbahan, ang Latter-day Saint Charities, naghiusa sa daghang ginagmay nga paningkamot aron makatabang sa mga tawo nga may diha-dihang panginahanglan sa tibuok kalibutan.5 Ang mga miyembro sa Simbahan walay puas nga mihatag sa ilang panahon, kwarta, ug kabatid. Kadaghanan niining mga kontribusyon ginagmay ra: gagmay nga kwartang donasyon o pipila ka oras nga pagboluntaryo. Nahimo kining usa ka modernong pagkasusama sa diyot [sinsilyo] sa usa ka biyuda (tan-awa sa Marcos 12:41–44); kining daw ingon og gamay nga mga kontribusyon nagpakita sa kalibutan kon unsay mahimo sa mga biyuda ug mga mag-uuma ug sa 10-anyos nga batang lalaki dihang gihiusa nila ang ilang mga kapanguhaan ug dayon mihangyo sa Ginoo nga mao ang mopatubo (tan-awa sa 1 Mga Taga-Corinto 3:6).
Dako na kaayo ang atong kalamboan sukad sa unang mga adlaw sa Simbahan sa mga kahimtang sa pagtukod og Zion, apan may daghan pang buhaton. Hinaut nga mopanalangin ang Dios sa matag usa kanato sa pagpangita niadtong mga nanginahanglan aron mas mogaan ang ilang mga palas-anon ug molig-on ang ilang kapasidad. Ug hinaut nga Siya usab mopanalangin sa Iyang Simbahan aron mahan-ay ug mapalambo ang tinagsa-tagsang paningkamot sa matag miyembro ug sa ingon niana matuman ang propetikanhong sugo sa pagtukod og Zion—nga mahimong usa sa kasingkasing ug sa hunahuna, magpuyo diha sa pagkamatarung, ug maningkamot nga walay mga kabus taliwala kanato—hangtud sa pagbalik sa Manluluwas.