Ang Atong Susama nga Panglimbasug aron Mobati Kita nga Nahisakop

Imahe

young adults with welcoming arms

Litrato gikan sa Getty Images

Ikaw nakasulay ba nga misulod og usa ka kwarto ug mibati nga ang tanang mata nagtan-aw diha nimo? O mas labaw pa—mibati nga walay bisan usa nga nakamatikod nimo? Ako mibati. Kadtong mga sitwasyuna sakit, kay sulod kanato kitang tanan nangandoy nga mahisakop.

Ang ebanghelyo ni Jesukristo mohiusa kanato. Apan usahay ang atong lain-laing mga kahimtang maghimong lisud aron kita mobati nga nahisakop. Taliwala sa daghang mga indibidwal nga mga miyembro sa Simbahan, adunay mga bag-ong kinabig kinsa tingali naningkamot nga makakita sa ilang agianan. Diha sa pahina 44, akong gipaambit kon sa unsang paagi nausab ang akong panglantaw bahin sa pagkahisakop sa Simbahan ug pagtuman sa mga gilauman sa Ginoo kanato.

May daghan pa usab nga sama kang Jodi ug sa iyang bana, kansang mga panglimbasug nga dili makapanganak o ubang mga pagsulay makahimo kanilang mobati nga sila wala mahisakop. Basaha ang istorya diha sa pahina 46.

Sa digital lamang nga mga artikulo, si Rachelle mipaambit kon sa unsang paagi ang maabi-abihong mga miyembro mihimo sa tanang kalainan dihang mibalik siya sa pagsimba. Si Eric mitudlo nga kitang tanan gikinahanglan sa lawas ni Kristo, ug si Aspen mipaambit unsaon sa pagkahisakop ug paghimo og maayo sa simbahan isip usa ka manggiulawon kaayo nga tawo.

Ang Simbahan puno sa mga tawo kinsa mibati nga daw wala sila mahisakop. Tingali usa ikaw kanila. Apan kitang tanan makahimo sa atong bahin sa paghimo sa matag miyembro nga mobati nga gihangop. Tungod kay ang pagkahisakop dili man mahitungod sa kahimtang—mahitungod kini kon si kinsa gayud ikaw ug kon si kinsa ang gipaningkamutan nimo nga maparehas. Isip mga anak sa Dios, tanan kita nahisakop sa Simbahan ni Kristo.

Matinuoron,

Brian S. King

Tambag …

Gikan sa mga young adult mahitungod sa pagkahisakop

“OK ra nga mobati nga daw ikaw wala mahisakop, apan hinumdumi nga kitang tanan lahi ug mao kanay hinungdan nganong kita angayan.”

—Estefany Sofia Correa Unas, Alberta, Canada

“Kinahanglan nga naa ka didto alang sa eksaktong katuyoan. Kon tua ka didto nga nagsunod kang Kristo, nan wala nay laing importante.”

—Paula Sáenz, Buenos Aires, Argentina

“Tungod kay nagtubo ko nga may igsoong mga lalaki kinsa mga ehemplo gayud sa pagkalahi (ang duha autistic nga dili makasulti), makasabut ako niadtong hilabihan ang pagkalahi ug makighigala ko niadtong tingali wala matagad. Ang tanan makakat-on og butang gikan ni bisan kinsa, bisan kinsa ka man ug unsa nga ang-ang sa kinabuhi ang imong kahimtang. Ikaw adunay ikatampo, ug ang Dios nahigugma kanimo sama sa Iyang paghigugma sa tanan, butang nga importante kaayo.”

—Stephanie E. Jensen, Washington, USA

“Ang akong pagkakabig sa Simbahan nakahimo nga ako makapasalamat sa gagmayng mga butang uban sa mga higala. Agi’g balos ako nahimo nga higala sa usa ka investigator aron modapit kaniya, mosuporta, ug motagamtam sa pakig-uban sa bag-o nga higala. Posibling ikaw lang ang suporta nga ilang gikinahanglan. Alang nako, nakatabang kini nga magpadayon ko sa pagpili sa eksakto nga dalan.

“Busa himoa nga ikaw kana nga higala. Basin pa diay; sila ang higala nga imong gikinahanglan.”

—Hikairoa Mohi, Waikato, New Zealand

Gikan sa mga lider sa Simbahan

“Ambot lang kon may nahimamat ba kong tawo kinsa dili ganahang mahisakop sa butang nga mopabati kanila nga mahinungdanon, nga mopabati kanila nga sila may bili.

“Kon ang mga tawo maghunahuna, ‘Duna bay dapit para nako?’ tingali kana usa sa daghang rason nga nagpaluyo niana. Ug karon mangutana sila sa ilang kaugalingon, ‘Nahiangay ba ako? Nahisakop ba ako dinhi? Nagkinahanglan ba gayud sila nako?’ Ug mosigurado ako sa pag-ingon, ‘Oo.’

“Naghunahuna ko sa pasumbingay ni Pablo, nga akong ganahan kaayo, mahitungod sa Simbahan nga kini lawas ni Kristo. Ug miingon siya nga kita gibunyagan ngadto niana nga lawas, ug miingon siya nga usa kini ka lawas. Daghang miyembro, apan usa ra ka lawas. …

“Kon ang usa ka tawo mobati nga nag-inusara; dili ko molimod sa katinuod niana nga pagbati ug kon nganong natural lang nga mobati og sama niana. Apan matag usa kanato, kon kana nga pagbati moabut kanato, kinahanglang mohunong ug maghunahuna nga, ‘si Jesukristo nagpakamatay para nako. Gihunahuna ni Jesukristo nga ako takus sa Iyang dugo. Ug Siya nahigugma kanako, Siya adunay mga gilauman kanako, ug makahimo Siya og kalainan sa akong kinabuhi. Ang Iyang grasya makausab kanako. Ug tingali kining tawo nga akong katapad, nga mibaliwala kanako o gani gustong molikay kanako, tingali wala siya mahigugma nako sama sa gibuhat ni Kristo. Apan dili kana makausab sa reyalidad sa unsay gibati ni Kristo ngari kanako ug sa akong mahimo diha kang Kristo.’”

Elder D. Todd Christofferson sa Korum sa Napulog Duha ka mga Apostoles, “Aduna bay usa ka Dapit alang Kanako?” (Mga serye sa video sa Unity in Diversity), ChurchofJesusChrist.org.