Pagpundok sa Israel pinaagi sa Pagpangalagad

Ang pagpangalagad usa ka oportunidad sa pagsunod sa tambag sa propeta sa pagpundok sa Israel.

Imahe

people with missionaries at a picnic

Si Presidente Russell M. Nelson nagdapit kanato sa pagtabang sa pagpundok sa Israel—“ang labing importante karong nahitabo dinhi sa yuta.”¹

Alang niadtong kinsa gusto nga mahimong kabahin niini nga buhat sa pagpundok sa Israel, ang pagpangalagad mahimong usa ka talagsaon nga oportunidad. Tungod kay ang buhat sa Ginoo sa kaluwasan tanan usa ra ka buhat, ang pagpangalagad usa ka dinasig nga paagi sa pagbag-o sa kinabuhi sa mga tawo. Bisan kon kita nangalagad ngadto sa less active nga mga miyembro o nagdapit kanila sa pagtabang kanato samtang kita nagserbisyo niadtong gawas sa atong tinuohan, ang pagpangalagad naghatag og mga oportunidad sa pagpundok sa Israel.

Pagtambayayong sa Usag Usa nga mga Alantuson

“Ang atong karnero tingali nasakit, nawala, o gani tuyo nga nahisalaag; isip ilang magbalantay, mahimo kitang usa sa nag-unang makakita sa ilang panginahanglan. Kita makapaminaw ug makahigugma nga walay paghukom ug motanyag og paglaum ug tabang uban sa mapanid-anong giya sa Espiritu Santo.” —Bonnie H. Cordon²

“Hilum nakong gi-obserbahan ang babaye nga naglingkod tupad kanako sa akong biyahe pauli sa panimalay sa 7:00 sa buntag. Siya mi-order og ilimnong makahubog sa wala pa molupad ang eroplano, ug sa dihang siya nangutana kanako kon ako minyo, ang akong negatibong mga paghukom kabahin niya misugod sa pagdaghan.

“‘Oo, ako adunay upat ka anak ug upat ka apo,’ mitubag ako uban sa garbo.

“Misulti dayon siya kanako og usa ka butang nga nakapausab sa tanan. Ang iyang bana namatay sa miaging adlaw human ma-coma sulod sa lima ka adlaw. Bisan tuod siya usa ka emerhensya nga doktor, wala siya makahimo sa pagluwas kaniya human siya nakuyapan samtang nagbakasyon.

“Ako naulaw sa akong dali nga mga paghukom sayop kaayo. Unsay akong isulti ngadto kaniya? Samtang gikalma ko ang akong kaugalingon, gibati ko ang Langitnong Amahan nga mibu-bu sa Iyang Espiritu aron ako makapangalagad niini nga babaye ug makapaambit og pipila ka bililhong mga kamatuoran sa ebanghelyo.

“Akong nahibaloan nga bisan tuod siya wala magtambungan og bisan unsa nga simbahan, siya mituo ni Jesukristo ug mibasa sa Biblia. Sa dihang nangutana ako kon siya nasayud ba mahitungod sa Ang Simbahan ni Jesukristo sa mga Santos sa Ulahing mga Adlaw, siya mitubag nga nahibalo siya og gamay kaayo. Ako mipakigbahin kaniya og kinatibuk-ang komperensya nga mensahe ni Elder Richard G. Scott (1928–2015) nga giulohan og, ‘Ang Mahangturong mga Panalangin sa Kaminyoon,’ ug dayon mipamatuod kabahin sa mahangturong mga pamilya ug sa unsang paagi ang Langitnong Amahan nakaila ug nahigugma sa matag usa kanato sa tinagsa-tagsa. Akong nahibaloan nga siya padulong ngadto sa Hawaii, USA, diin siya nagdako, ug ako miawhag kaniya sa pagbisita sa Templo sa Laie Hawaii.

“Nagbulag kami sa airport sa Siyudad sa Salt Lake, Utah. Ako mapasalamaton kaayo nga ang Ginoo nakagamit kanako, bisan pa sa akong mga sayop, sa pagtabang sa usa ka sister nga nagkinahanglan og gugma ug kahupayan.”

John Tippetts, Utah, USA

Mga Baruganan nga Hunahunaon

“Negatibong mga paghukom”

Ang dali nga pagpanghukom makapugong kanato sa pagkakita sa balaang potensyal (tan-awa sa Mateo 7:1).

“Nagbu-bu sa Iyang Espiritu”

Salig sa saad sa Dios nga ihatag kanato kon unsay isulti diha mismo nga higayona (tan-awa sa Doktrina ug mga Pakigsaad 100:5–6).

“Nakat-on”

Pangutana kon unsa ang gituohan sa uban, pamati uban ang kalooy, ug tagda ang ilang mga pagtuo nga may dignidad.

“Ipamatuod”

Pangita og mga oportunidad sa pagpakigbahin og pagpamatuod kon sa unsang paagi ang Ginoo nagtrabaho diha sa inyong kinabuhi (tan-awa sa Mosiah 24:14).

“I-awhag”

Dapita sila sa pagbuhat sa kamatuoran aron ang Espiritu Santo makapamatuod ngadto kanila (tan-awa sa Juan 7:17; Moroni 10:5).

Imahe

women walking together

Pagluwas sa Mibalik nga mga Miyembro

“Uban sa gugma isip ang hinungdan, mga milagro mahitabo, ug makakita kita og mga paagi sa pagdala sa atong “nawala” nga mga kaigsoonan ngadto sa tibuok nga pagdawat sa ebanghelyo ni Jesukristo.” —Jean B. Bingham³

“Ako nahimo nga dili aktibo sulod sa dili mominos og unom ka tuig sa dihang ang akong bana ug ako mibalhin sa usa ka bag-ong lungsod. Ang akong bag-ong presidente sa Relief Society mibisita kanako, nangutana kon makapadala ba siya og usa ka sister nga mobisita kanako. Uban sa kahadlok, miuyon ko. Kini nga sister mibisita kanako matag bulan, bisan pa sa iyang allergy sa mga iro—ug ako adunay usa ka iro nga mahigugmaon kaayo! Nagpadayon sulod sa duha ka tuig ang iyang pagpangalagad, ug kini adunay dakong epekto ngari kanako.

“Bisan tuod og ang iyang mga pagbisita sa kasagaran pulos sosyal, usahay siya mangutana kanako og mga pangutana nga migiya kanamo ngadto sa espiritwal nga mga panag-istoryahanay. Kini mihimo kanako og gamay nga pagkadili komportable, apan kini miaghat kanako sa paghukom kon mopadayon ba sa ebanghelyo o magpabilin kon hain ako. Kini nga desisyon usa ka pakigbisog alang kanako, apan mipili ako sa pagpakig-istorya sa mga sister nga misyonaryo.

“Sa adlaw nga miadto ako sa pagtambong sa miting sa sakramento sa unang higayon sulod sa unom ka tuig, ako nahadlok nga mosulod. Sa dihang ako misulod na sa simbahan, ang akong tigpangalagad nga sister nagpaabut kanako, ug siya milakaw uban kanako ngadto sa chapel. Pagkahuman, giubanan ako niya ngadto sa akong sakyanan, nangutana kanako kon unsay iyang mabuhat aron sa pagtabang kanako sa labing maayo samtang nagtubo nga mas nagkaduol ako ngadto sa Manluluwas.

“Ang panahon ug ang gugma sa akong tigpangalagad nga sister mitabang sa paggiya kanako balik ngadto sa pagkaaktibo, ug akong gihuptan ang iyang mga paningkamot isip usa sa labing mahinungdanon nga gasa nga nahatag sukad ngari kanako. Ako mapasalamaton kaayo nga siya diha sa akong kiliran sa panahon sa akong panaw balik ngadto sa Simbahan sa Manluluwas.”

Ang ngalan wala gibutyag, British Columbia, Canada

Mga Baruganan nga Hunahunaon

“Mibisita kanako matag bulan, bisan pa sa iyang allergy sa mga iro”

Unsaon nimo sa pagpakita nga ikaw nagpakabana niadtong imong gipangalagaran sa uban pang mga butang? (tan-awa sa Doktrina ug mga Pakigsaad 121:44).

“Mga Pangutana”

Ang pagpangutana sa husto nga mga pangutana makatabang sa pag-awhag og pagtimbang-timbang sa kaugalingon. Hinumdumi nga ang atong pagpangalagad adunay katuyoan nga molapas pa sa pagkasosyal.⁴

“Naghulat kanako”

Kinahanglan ang tanan mobati nga giabi-abi (tan-awa sa 3 Nephi 18:32).

“Diha sa akong kiliran sa panahon sa akong pagpanaw og balik”

Ang atong suporta makahimo og importanting kalainan ngadto niadtong kinsa nagpanuko sa pagbalik ngadto sa Manluluwas ug mamaayo (tan-awa sa Mga Hebreohanon 12:12–13).

Pagpangalagad ug Pagpundok

“Sa bisan unsang mga paagi nga ingon og sagad o naandan nimo, ipaambit sa mga tawo ngano nga si Jesukristo ug ang Iyang Simbahan importante nganha kanimo. …

“… Inyong tahas mao ang pagpakigbahin kon unsa ang anaa sa inyong kasingkasing ug ang pagpuyo sumala sa inyong mga gituohan.” —Elder Dieter F. Uchtdorf⁵

Ang pagpangalagad ug ang pagpakigbahin sa ebanghelyo mag-uban. Ania ang pipila ka mga paagi nga kita makapundok sa atong mga higala ug mga silingan samtang kita nangalagad—o mangalagad samtang nagpundok kita sa atong mga higala ug mga silingan:

Pagserbisyo og dungan. Pangita og mga oportunidad sa pagdapit og usa ka higala o silingan kinsa dili miyembro sa pag-apil kaninyo sa pagpangalagad ngadto sa mga panginahanglan sa usa ka tawo. Hangyoa sila sa pagtabang kanimo sa pag-andam og pagkaon alang sa usa ka bag-ong inahan, pagtrabaho diha sa nataran alang sa usa ka tigulang nga silingan, o sa paglimpyo sa balay sa usa ka tawo kinsa may sakit.
Pagtudlo og dungan. Hunahunaa ang pagdapit og usa ka higala o silingan kinsa dili kanunay nga motambong sa pagpasiugda og usa ka leksyon sa misyonaryo diha sa ilang panimalay alang sa usa ka tawo nga makigkita sa mga misyonaryo, sa pagsuporta kanimo sa pagpasiugda og leksyon diha sa imong panimalay, o sa pagkuyog kanimo sa usa ka leksyon ngadto sa laing panimalay.
Tabang. Agig dugang sa pagpangalagad niadtong kinsa gi-assigned kaninyo, kamo usab makatabang sa uban kon kamo makakita sa panginahanglan. Itanyag ang pagpasakay kanila ngadto sa mga miting sa simbahan. Dapita ang ilang mga anak ngadto sa mga kalihokan sa kabatan-onan o sa Primary. Unsa ang ubang mga paagi nga kamo makapangalagad ug makapapundok?
Gamita ang mga kapanguhaan nga gihatag sa Simbahan. Ang Simbahan nagtanyag og daghan nga mga kapanguhaan alang sa mga miyembro aron sa pagtabang kanila sa pagpakigbahin sa ebanghelyo. Makatan-aw ka ngadto sa “Misyonaryo” nga seksyon sa Gospel Library nga app, makatan-aw sa mga video nga “Come and See” (sa ChurchofJesusChrist.org/go/12011), ug bisitaha ang ComeUntoChrist.org alang sa mga ideya kon unsaon pagpundok sa Israel diha sa atong mga komunidad.