Digital Lamang: Mga Young Adult
Dili Ka Makapadali sa Paghinulsol
Aron mahimong mas maayo, kinahanglan akong usbon ang akong pamaagi sa paghinulsol.
“Amen.”
Magpabilin ako nga magduko samtang nagpaambit sa sakramento. Mag-ampo ako, magsulti ngadto sa Langitnong Amahan sa mga butang nga akong nabuhat nga sayop sa miaging semana, ang mga paagi nga mahimo unta nako nga mas maayo. Magsaad nga ako mag-usab. Maghunahuna ako sa Manluluwas. Moambit ako sa sakramento. Mobuhat dayon ako niining mga butanga sa sunod semana; balik-balikon ra ang unsay na-andan.
Sulod sa dugay nga panahon, mao kana ang akong gihunahuna nga mao ang sakramento: paghunahuna sa Manluluwas, paghinulsol, ug pagsaad nga karon nga semana mahimo nga lahi.
Wala kaayo ako makaamgo nga kini nga proseso wala magtabang kanako nga mouswag. Matag semana sa tinuod dili kaayo lahi gikan sa usa nga milabay. Ang akong personal nga pag-ampo sa gihapon balik-balik ug dili kanunay. Sa gihapon ngil-ad nga mga hunahuna akong gipunting ngadto sa mga tawo kinsa dagko og tingog nga mag-istoryahanay sa tren mabuntag. Nagtan-aw gihapon ako og dugay sa TV sa akong pagpahulay human sa trabaho. Kini nga mga kinaiya ingon og dili mausab, ug bisan tuod og dili maayo ang akong pagbati mahitungod niini, dili ako sigurado kon unsa pay buhaton nga mawala kini. Dunay butang nga tataw nga kulang. Wala lamang gyud ako mahibalo kon unsa.
Ang Tubag
Atol sa kinatibuk-ang komperensya akong nakaplagan kanang nawala nga tipik. Si Presidente Dallin H. Oaks, ang Unang Magtatambag sa Unang Kapangulohan, mitudlo: “Lain nga tinubdan sa espirituhanong pagbayaw ug pagtubo mao ang padayon nga buhat sa paghinulsol, bisan daw sa gagmay nga mga kalapasan… Ang maong paghinulsol kinahanglang mag-una sa atong sinemana nga pag-ambit sa sakramento.”1
Sa kalit, kini klaro kon ngano nga ako adunay problema: naghinulsol lamang ako ma-Dominggo. Pinaagi lamang sa pagpamalandong sa akong mga sala sulod sa pipila ka minutos sa sakramento, akong gitugutan ang akong kaugalingon nga mahimong walay pagtagad sulod sa tibuok semana, sa katapusan nagpugong sa posibilidad nga kausaban.
Ang pagtulun-an ni Presidente Oaks mitabang kanako sa pag-ila og tulo ka paagi nga akong ikaapil kining nawala nga tipik ngadto sa akong proseso sa paghinulsol.
Unsa ang Makonsiderar nga Sala
Ang Pag-ula ni Jesukristo alang sa tanan, bisan ang bati nga mga naandang lihok o temporal nga mga kasamok—una sa tanan ang bisan unsa nga mahimong nagpugong kanato gikan sa pagkahimong mas sama Kaniya. Ang Manluluwas nakasabut nga bisan ang labing gamay nga mga butang sa kadugayan makapalayo kanato gikan sa Iyang dalan, busa Siya gusto nga motabang kanato sa pagbuntog niadto nga mga butang usab. Aron sa pagtugot Kaniya sa pagbuhat niana, ako nakahukom nga magsugod sa paghunahuna mahitungod niadto nga mga butang sa lahi nga paagi—sama sa mga butang nga nagpugong kanako gikan sa pagpaduol ngadto sa Manluluwas.
Ang pagbuhat niini mitabang kanako sa pagkakita sa akong mga kasaypanan sa mas klaro nga paagi ug nakatabang kanako sa pagdawat niini nga mas seryoso. Gibati nako ang mas dako nga kadinalian sa pagwagtang niini inubanan sa usa ka bag-ong kamasaligon nga nagagikan sa pagkasayud nga si Kristo makatabang kanako niini. Kini nagpasabut nga kon ako gusto nga mopapha niini nga mga kinaiya, dili igo ang pag-ampo mahitungod niini makausa sa matag semana. Ako kinahanglan nga mokonsulta sa Ginoo matag adlaw.
Modapit sa Tabang sa Manluluwas
Ang matag adlaw nga paghinulsol nagtugot kanato sa pagtuki sa tinud-anay sa atong pag-uswag samtang kita nagreport og balik ngadto sa Langitnong Amahan. Kita mas makakita kon asa dapit ang atong mga kahuyang ug mangayo Kaniya og piho nga tabang samtang nagtinguha og kapasayloan. Pinaagi sa pag-atubang niadtong gagmay nga mga butang nga makapalayo kanako sa Manluluwas sa matag adlaw, ang akong mga pag-ampo nausab, ug ingon man ang akong mga lihok. Kay sa mopahiluna ngadto sa akong naandan nga buluhaton samtang nagpadayon ang semana, kanunay akong mobati sa tinguha nga molambo. Akong gibati ang Espiritu nga nag-impluwensya sa akong mga desisyon. Ako adunay dugang pa nga gahum sa kabubut-on nga “pilion ang mas lisud nga eksakto,”2 nga ako nasayud nga moabut pinaagi sa makaayo nga gahum sa Pag-ula ni Kristo.
Bisan og ako adunay maayong mga intensyon sa pagsulay sa pag-atubang sa akong mga sala nga nag inusara, dako gyod ang kalainan sa dihang misalig ako sa Dios sa tibuok semana. Sa akong pagbuhat niini, akong gibati nga Siya duol ra nako samtang ako naningkamot sa pag-usab; ako wala na mobati ingon nga Siya naghulat lamang sa katapusan sa usa ka taas kaayo nga tunel.
Usa ka Bag-o nga Pagtan-aw sa Sakramento
Sama sa gipasabut ni Presidente Oaks, ang sakramento wala mag-apil sa paghinulsol—kini usa ka sinemana nga lakang sa usa ka balik-balik nga liyok sa buhat. Kini usa ka panahon alang kanato sa pagtimbang-timbang sa atong semana, pagpahayag sa pasalamat ngadto sa Manluluwas, ug sa pagpasalig og usab sa pagbuhat og mas maayo. Samtang ako naghinulsol kada adlaw, ang sakramento may bag-ong kahulugan alang kanako. Ako dili na kinahanglan nga motingub sa tibuok proseso sa paghinulsol ngadto sa 10 ka minutos. Hinoon, sa tinuod ako naghunahuna mahitungod sa sakripisyo ni Kristo ug nahingangha sa Iyang walay katapusang gugma ug kalooy. Samtang ako nag-ambit sa pan ug tubig, sa tinuod akong gibati nga nalimpyohan ug andam nga molambo og gamay sa sunod semana.
Ang paghinulsol sulod sa semana naghatag kanato og kahigayunan sa pagpasalamat sa sakramento tungod sa milagro nga kini mao. Ang pagsabut nga ang paghinulsol usa ka inadlaw nga proseso naghatag kanako og gahum sa pag-atubang sa akong mga kasaypanan uban ang kaisug ug kamasaligon. Wala na nako batia sama og ako nag-inusara sa akong mga problema. Kay sa mobati nga nabug-atan ug nawad-an og kadasig niadtong mga gutloa, ako makahimo sa pagkuha og balik sa paglaum ug hingpit nga kalipay nga akong nasinati sa bunyag.