Pagpili sa Kahangturan

Ni Evita Alabodi

Nasayud ako nga karon mao ang panahon alang kanako sa pagpili kon ako magpabilin ba o dili sa akong mga hiyas.

Sa dihang ako nakadungog nga nakadaog ako og binayloay nga walay bayad nga pagtuon [exchange scholarship] ngadto sa Argentina nga kanunay nakong gipangandoy, ako dili gayud makahunahuna nga kini ang sinugdanan sa usa ka dako nga kausaban sa akong kinabuhi.

Miabut ako sa Rosario, Argentina, diin ako mipuyo uban sa usa ka pamilya nga mga miyembro sa Ang Simbahan ni Jesukristo sa mga Santos sa Ulahing mga Adlaw. Ug sa ingon misugod ang usa ka tuig sa espiritwal nga mga panimpalad, pakig-istorya sa mga misyonaryo ug sa pagtambong sa seminary ug institute. Ako gusto nga masayud sa tanan, ug gibati nako nga unsay akong nakat-unan mahitungod sa ebanghelyo mipanalangin kanako sa daghan nga mga paagi.

Sa wala madugay nakaangkon ako og lig-on nga pagpamatuod sa katinuod sa mga doktrina nga gitudlo kanako: hugot nga pagtuo, gugma, pailub, gugma nga putli, pagsalig ug pagsunod sa mga sugo sa Ginoo, diin Siya naghatag kanato aron sa pagpanalipod kanato gikan sa kasakit.

Dili siya gusto kanato nga makasinati og kasakit nga walay katuyoan. Siya nahigugma kanato pag-ayo, ug Siya gusto nga mopamatuod niini pag-ayo. Apan usahay, resulta sa atong kaugalingong mga pagpili, kita wala motugot, kita nagpalayo gikan Kaniya, ug sa ingon kini anaa na sa atong kaugalingong mga kamot. Kita kinahanglan gayud dayon nga mohimo sa unang lakang padulong sa pag-angkon og balik sa kalinaw diha sa atong mga kasingkasing. Kini usa ka butang nga akong nasinati sa akong kaugalingon.

Human sa mga bulan sa pagkat-on, mga leksyon sa misyonaryo, ug mga klase, akong nasinati ang kalisdanan sa usa sa labing sakit nga matang niini—kalisdanan nga nagsukmat kanimo sa mga nanglabay nga mga pagbati, nagtintal kanimo sa paghimo og sayop nga mga desisyon sa pagkakaron, ug nagsulay sa pagguba sa umaabut nga kanunay nimong gidamgo. Akong nakat-unan nga ang kasakit usahay (ug sa daghang mga higayon) nagagikan sa usa ka tinubdan nga wala nimo damha.

Ang pagkatakus ug pagkamahiyason sa mga hunahuna ug sa mga buhat ingon og sa kanunay kabahin kon si kinsa ako, diha kutob niana. Nasayud ako nga ang mga butang nga hapit ko nang buhaton dili matarung, nga ang mga tawo nga sa makausa akong gisaligan hapit na magbuhat og mga butang nga supak sa pagtulun-an nga ako nahibalo nga tinuod, ug nga ako sa tinuoray nagsugod na sa paghimo og distansya tali kanako ug sa akong Langitnong Amahan. Nasayud ako nga karon ang panahon nga ako nagkinahanglang mopili kon ako mopadayon ba niini o magpabilin nga mosunod sa mga hiyas nga akong gitahud sa kanunay. Busa kinahanglan nga ako mangita niana nga kalig-on sulod kanako nga nagsulti kanako nga ako dili sayon makaguba niini nga mga damgo. Dili ako makaguba sa akong paglaum sa usa ka mahangturong pamilya ug sa usa ka mahigugmaong bana. Usa ka butang sa akong kinabuhi nga sayop, ug ako nasayud nga kini kinahanglan nga usbon.

Kana nga pagbati, uban sa linghod nga pagpamatuod misugod sa pagkalig-on diha sa akong kasingkasing, ug ang tinuod nga mga anghel sa akong kinabuhi kinsa anaa kanunay sa pagtabang kanako, miluwas kanako gikan sa pagkahisalaag ug milig-on pag-ayo kanako pag-usab nga ako makapili sa pagbalik ngadto sa Ginoo sa tukma nga panahon. Ug ako nasayud nga Siya kanunay nga anaa, nagpanalangin kanako sa akong mga paningkamot sa pagpaminaw sa Iyang tingog ug sa pagpabilin nga takus sa mahangturong mga panalangin.

Kon maghunahuna ako karon niadto nga panahon nga akong nasinati, naghunahuna ako sa kaisug nga wala mobiya, kaisug nga kanunay mipakita sa akong mga hiyas, ug sa hugot nga pagtuo nga ako anaa ug sa gihapon aduna.

Bisan ang panahon sa paghinulsol nga misunod usa ka panahon sa kasakit, sa pag-ila sa sayop nga mga pagbati ug mga higayon, ug sa pagpaubos, ako mapasalamaton kaayo alang niini—ug sa kanunay ako mapasalamaton. Mapasalamaton alang sa tinuod nga, sa husto nga panahon, akong gibati nga ang akong Langitnong Amahan mipasaylo kanako, nga Siya nagpadayon sa paghigugma kanako, ug nga Siya mopasaylo sa kanunay.

Ang bahin niana nga labing malisud kanako mao ang pagkat-on sa pagpasaylo sa akong kaugalingon. Nahinumduman nako unsa ang akong gibati, dili takus ug walay katahum, ni sa gawas o sa sulod. Apan ang akong Manluluwas anaa sa kanunay, naghatag kanako og kalig-on ug kadasig. Siya mibutang sa husto nga mga tawo sa akong dalan kinsa mitabang kanako aron makakat-on gani og daghan pa mahitungod sa Simbahan, sukad nga ako mibalik sa Belgium. Gihigugma nila ako sa pagkakinsa ako ug mitabang kanako sa paghigugma sa akong kaugalingon og balik ug sa pag-ila nga kini nga kasinatian dili kinahanglan nga usa ka sakit nga akong dad-on sa akong kinabuhi sa hangtud. Akong nakita nga ako adunay oportunidad sa pagpili, sa pagsinati kon unsa na kalig-on ang akong pagpamatuod pinaagi sa pagpanalipod sa akong mga hiyas. Karon akong nakita nga tungod kay ako naningkamot sa pagpalig-on sa akong pagpamatuod pinaagi niini nga kasinatian, ako mahimong usa ka panalangin diha sa mga kinabuhi sa daghan kaayong mga tawo, sa duol o sa layo.

Ayaw kahadlok. Ayaw gayud paghunong, ug sa kanunay panalipdi ang imong mga hiyas. Kanunay hinumdumi kon unsa kaanindot ug unsa ka panalangin kini ang pagpakigbahin niana nga gugma alang sa Manluluwas ug sa pagbaton sa Iyang gugma nga putli isip usa ka pundasyon nga makatukod og relasyon ug usa ka umaabut nga pamilya. Kon kamo magpili nga magmasulundon ug magpili sa Langitnong Amahan sa tanang mga butang, sa madugay o sa madali, ang mahangturong mga panalangin moabut. Ayaw kaguol kon kamo dili makakita niini karon, apan salig nga kada adlaw, dugang og gamay pa, makita ninyo ang impluwensya sa Ginoo diha sa inyong mga kinabuhi. Ang tingpamulak magsugod diha sa atong mga kasingkasing ug ang mahangturon nga mga bulak mosugod sa pagpamulak.

Nabunyagan ako kaniadtong Marso 16, 2019, sa akong ward sa Belgium, ug ako malipayon kaayo nga mihimo niining unang lakang padulong sa akong dalan ngadto sa kahangturan. Oo, ako makasugat pa og dugang nga mga hagit diha sa akong kinabuhi—kitang tanan makasugat—apan uban sa akong pagpamatuod nga anaa sa akong kasingkasing, ako andam sa pag-atubang niini, tungod kay ako nasayud kon kang Kinsa ako mopili.