Tekem Kros blong Yu
Blong stap tekem kros long yumiwan, mo stap folem Sevya, i minim blong stap gohed wetem fet long rod ia blong Lod, mo i no blong stap draon insaed long ol fasin blong wol ia.
Ol dia brata mo sista. Yumi bin kasem ol gudfala tijing we oli kam long ol lida blong yumi long ol las tu dei ia. Mi testifae long yufala se sapos yumi traehad blong praktisim ol insperesen tijing ia blong tedei long laef blong yumi, bae Lod, tru long gladhat blong Hem, bae i helpem wanwan long yumi blong tekem kros blong yumi mo ol samting oli nomo hevi.1
Taem oli bin stap kolosap long Sisaria Filipae, Sevya i bin talemaot long ol disaepol blong Hem se bae Hem i safa long han blong ol elda, ol jif pris, mo ol man blong raetem loa long Jerusalem. Hem tij stret abaot ded mo Laef bakegen long ded blong Hem.2 Long tetaem ia, ol disaepol blong Hem oli no andastanem fulwan tabu misin blong Hem long wol ia. Pita hemwan, taem hem i harem wanem Sevya i bin talem, i Sevya i go long saed, i tok strong i se: “Masta, God i mas blokem samting ia, Samting ia i no save kamtru olsem.”3
Blong helpem ol disaepol blong Hem blong andastanem se blong givim evri samting long wok blong Hem, i minim tu blong folem tingting mo safa, Sevya i talem wetem sore:
“Man we i wantem kam biaen long mi, hem i mas blokem ol samting we hem nomo i wantem, nao i mas karem kros blong hem, i biaen long mi.
“Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i kasem laef blong hem.
“?Sapos wan man i kasem olgeta samting wol, be i lusum laef blong hem, hem bambae i save winim wanem? Sapos laef blong man i lus, bambae hem i no save givim wan samting nating blong God blong pembak laef blong hem bakegen?”4
Tru long toktok ia, Sevya i talemaot bigwan se evriwan we oli wantem blong biaen long Hem, oli nidim blong fogetem olgetawan mo kontrolem ol samting we oli wantem, we bodi i wantem, mo givim sakrifaes blong evri samting, iven laef sapos i nid, mo folem fulwan, tingting ia blong Papa—semmak olsem we Hem i bin mekem.5 I tru, hemia nao praes blong pem blong sevem wan sol. Jisas i minim mo i yusum ol simbol blong wan kros blong helpem ol disaepol blong Hem blong oli andastanem moa wanem i stret mining blong givim sakrifaes mo stret mining blong gat ful tingting i go long wok blong Lod. Pikja blong wan kros, ol disaepol, mo olgeta we oli stap long Gavman blong Rom oli save gud long hemia from Ol Man Rom oli fosem olgeta we bae oli hang long kros, blong tekem, long pablik, kros, o kros timba blong olgeta i go long ples we bae oli hangem olgeta long hem.6
Hem i bin afta long Laef bakegen long ded blong Hem, we maen blong olgeta i open blong oli andastanem evri samting we oli bin raetem abaot Hem7 mo wanem bae oli mas mekem stat long tetaem ia i go.8
Long sem fasin, yumi evriwan, ol brata mo sista, i nidim blong openem maen mo hat blong yumi blong andastanem moa fulwan mining ia blong tekem kros blong yumi long yumiwan, mo stap biaen long Hem. Yumi stap lanem, tru long ol skripja, se olgeta we oli wantem tekem kros blong olgeta, olgetawan, oli lavem Jisas Kraes long wan wei we oli nomo folem eni samting we i no blong God, mo oli sakemaot evri rabis fasin blong wol ia mo oli stap obei ol komanmen blong Hem.9
Strong tingting blong yumi blong sakemaot evri samting we i agensem tingting blong God, mo blong sakrifaesem evri samting we Hem i askem yumi blong givim, mo blong traehad blong folem ol tijing blong Hem bae i helpem yumi blong stap strong long rod ia blong gospel blong Jisas Kraes—iven taem we hadtaem, wiknes blong sol, o fos blong sosol laef mo ol tingting blong man oli agensem ol tijing blong Hem.
Eksampol: long olgeta we oli faenem yet blong patna we i no save finis, mo oli filim se oli stap olgetawan mo no gat hop; o olgeta we oli bin divos o filim se oli lego mo fogetem olgeta, mi wantem talem stret se, blong akseptem invitesen blong Sevya blong tekem kros blong yufala mo folem Hem, i minim blong stap gohed wetem fet blong stap long rod blong Lod, blong holem hed stret oltaem, mo no foldaon long rabis evri dei fasin we bae i tekemaot hop we yufala i gat long lav mo sore blong God.
Semfala prinsipol i go long olgeta we oli fesem fasin blong laekem wan we i sem seks, mo filim blong givap mo no gat help. Maet hem i risen ia nao we sam long yufala i stap filim se gospel blong Jisas Kraes i nomo blong yufala nao. Sapos i olsem, mi wantem talem gud long yufala se i gat hop oltaem long God Papa mo long plan blong hapines blong Hem, long Jisas Kraes mo long sakrifaes blong Hem we i pem praes from sin, mo long fasin blong stap laef folem ol komanmen blong Tufala. Long stret waes, paoa, jastis, mo sore blong Hem, Lod bae i silim yumi se yumi blong Hem, blong oli save tekem yumi i go long Hem mo i sevem yumi olwe, sapos yumi gogohed mo no stap muvmuv blong stap obei ol komanmen,10 mo oltaem stap mekem ol gudfala wok.11
Long olgeta we oli mekem ol series sin, blong stap akseptem semfala invitesen ia, i minim, wetem sam moa samting, blong yufala i putum tingting blong yufala i stap daon long fored blong God, blong yufala i kaonsel wetem ol stret lida blong Jos, mo sakem sin mo lego ol sin blong yufala fogud. Rod ia bae i blesem tu evriwan ia we i stap faet agensem ol strong adiksen, opiohid, ol drag, alkol, mo ponografi. Blong tekem ol step ia bae i tekem yufala i go kolosap moa long Sevya, we long en, i save mekem yu fri long sem, harem nogud, mo fasin blong stap slef long spirit mo laef long wol ia. Antap long sapot we i kam long ol lida blong Jos, bae yufala i wantem sapot tu we i kam long famli, fren mo ol stret dokta mo kaonseling pipol.
Plis, neva givap taem yu mestem rod bakegen mo no luk se yu no save lego sin mo winim adiksen. !Yu no save stop nomo blong traem mo afta gohed nomo long wiknes mo sin! Oltaem, traehad blong mekem bes we yu save mekem, mo soem, tru long ol wok blong yu, se yu wantem klinim insaed long yu, olsem Sevya i bin tijim.12 Samtaem, ol ansa blong samfala jalenj oli kam afta plante plante manis blong hadwok. Promes we i stap long Buk blong Momon, we i se: “hem i tru long gladhat blong God we Lod i sevem mifala, afta evri samting nomo we mifala i save mekem,”13 i blong ol situesen olsem. Plis, tingbaot se presen ia we i gladhat blong Sevya, i no nomo “afta” we yumi mekem evri samting. Yumi save kasem gladhat blong Hem bifo, long taem, mo afta we yumi hadwok.14
Mi testifae se, taem yumi gogohed blong traehad blong winim ol jalenj blong yumi, bae God i blesem yumi wetem ol presen blong fet blong yumi kasem hiling mo wokem ol merikel.15 Bae Hem i bin mekem blong yumi wanem we yumi no save mekem blong yumiwan.
Antap long hemia, olgeta we oli harem nogud, oli kros, hat i stap nogud, o oli jenem olgeta long ol harem nogud from wan samting we oli filim se i no blong olgeta, nao, blong tekem kros blong yu mo biaen long Sevya i minim blong traem putum long saed ol filing, mo tanem yumi long Lod blong Hem i mekem yumi fri long kaen tingting ia mo i helpem yumi blong faenem pis. Sore tumas, sapos yumi stap holemtaet ol nogud filing mo tingting ia, bae yumi stap luk se yumi stap laef blong Spirit blong Lod i no mekem wok long laef blong yumi. Yumi no save sakem sin long bihaf blong ol nara pipol, be yumi save fogivim olgeta—taem yumi talem, no, se bae yumi no prisena blong olgeta we oli mekem nogud long yumi.16
Ol skripja oli tijim se i gat wan wei aot long ol situesen ia—taem yumi invaetem Sevya blong yumi blong helpem yumi blong riplesem ol ston hat blong yumi wetem ol niu hat.17 Blong hemia i hapen, yumi nid blong kam long Lod wetem ol wiknes blong yumi, yumi putum tingting i stap daon long fored blong Hem,18 mo yumi askem help mo fogivnes blong Hem,19 speseli long wan tabu taem olsem taem yumi tekem mo kakae long sakramen evri Sandei. Bae yumi jusum blong askem help blong Hem, mo tekem wan impoten mo had step blong fogivim olgeta we oli mekem nogud long yumi, blong ol soa oli save stat blong kam oraet. Mi promes se, taem yufala i mekem olsem, bae yufala i spel long ol naet blong yufala from maen blong yufala i stap long pis wetem Lod.
Taem hem i bin stap long Libeti Kalabus long 1839, Profet Josef Smit i bin raetem wan leta i go long ol memba blong Jos, we insaed, i gat ol profesi we yumi save yusum long evriwan long ol situesen ia. Hem i raetem: “Evri jea blong king mo ples we hem i rul, ol ples blong prins i rul mo ol paoa, bae mi soemaot mo givim long olgeta evriwan we oli bin stap strong wetem strong tingting from gospel blong Jisas Kraes.”20 Taswe, olgeta we oli tekem long olgeta, nem blong Sevya, mo stap trastem ol promes mo gohed strong kasem en, bae Lod i sevem olgeta21 mo bae oli save stastap wetem God long wan hapines we i no gat en.22
Yumi evriwan i fesem ol situesen blong agens long laef blong yumi we i mekem yumi filim se yumi no hapi, no gat yus, no gat hop, mo samtaem, yumi kam slak. Sam long ol filing ia bae i save lidim yumi blong kwestinim Lod se: “From wanem mi gotru ol situesen ia? O ?From wanem tingting blong mi i no hapen? !Be mi mi stap mekem evri samting ia long paoa blong mi blong tekem kros blong mi mo folem Sevya!”
Ol dia fren blong mi. Yumi mas tingbaot se blong tekem kros blong yumi long yumiwan i minim tu blong gat tingting i stap daon, mo stap trastem God mo waes blong Hem we i no gat en. Yumi mas talemaot se Hem i savegud wanwan long yumi mo nid blong yumi. Hem i nid tu blong akseptem se taem blong Lod i defren long hemia blong yumi. Samtaem, yumi askem wan blesing mo putum wan taem limit blong Lod i mekem i kamtru. Yumi no save putum se bae yumi stap tru long Hem taem yumi putum wan taem blong Hem i ansarem wanem yumi wantem. Taem yumi mekem olsem, yumi olsem Ol Man blong Nifae ia we oli tingting tu, we oli jikim ol brata blong olgeta se taem i pas finis blong ol toktok blong Samuel i kamtru, mo hemia i mekem tingting i konfius long medel blong olgeta we oli bin biliv.23 Yumi nidim blong trastem Lod inaf blong yumi stap kwaet mo save se Hem i God, se Hem i save evri samting, mo Hem i save wari blong wanwan long yumi.24
I no longtaem i pas, mi bin gat janis blong givhan long wan wido sista, Franca Calamassi, we i stap safa long sik blong bren mekem hem i no save muv. Sista Calamassi, i fas memba blong famli blong joenem Jos ia blong Jisas Kraes we i bin kambak long wol. Nomata hasban blong hem i neva baptaes, hem i bin agri blong mit wetem ol misinari, mo plante taem, i kam long ol miting blong Jos. I nomata ol situesen ia, Sista Calamassi i bin gohed blong stap fetful mo i lukaot fo pikinini insaed long gospel blong Jisas Kraes. Wan yia afta we hasban blong hem i ded, Sista Calamassi i tekem ol fofala pikinini blong hem i go long tempol mo oli tekpat long ol tabu odinens mo oli sil tugeta olsem wan famli. Ol promes we oli go wetem ol odinens ia, i givim hem plante hop, glad, mo hapines we i bin helpem hem blong gohed wetem laef.
Taem ol fas saen blong sik ia i stat blong kamaot, bisop i bin givim wan blesing long hem. Long tetaem ia, hem i talem long bisop blong hem se hem i rere blong akseptem tingting blong Lod, i talem fet blong hem se bae hem i kam oraet, mo blong stap strong tru long sik blong hem kasem en.
Long taem blong visit blong mi, mi holem han blong Sista Calamassi mo lukluk stret long ae blong hem, mi bin bin laet blong enjel i kamaot long fes blong hem—i soem tras blong hem long plan blong God mo stret hop blong hem long lav mo plan blong Papa.25 Mi filim strong tingting blong hem blong stap strong long fet blong hem kasem en taem hem i tekem kros blong hem, i nomata ol jalenj we hem i bin stap fesem. Laef blong sista ia i wan testemoni abaot Kraes, wan pruf blong fet mo strong tingting blong hem long Kraes.
Ol dia brata mo sista. Mi testifae long yufala se, blong tekem long yumiwan, kros ia blong yumi, mo biaen long Sevya, i askem yumi blong folem eksampol blong Hem, mo traehad blong kam olsem Hem,26 we yumi save wet longtaem mo fesem ol situesen blong laef, mo lego mo sakemaot ol fasin blong man blong wol, mo stap wet long Lod. Man blong raetem Ol Sam i raetem:
“Yumi mas trastem Hae God, mo yumi mas bilif long hem. Yumi no mas letem tingting blong yumi i foldaon, oltaem yumi mas trastem hem.”27
“Hem i stap lukaot gud long yumi, mo i stap givhan long yumi.”28
Mi testifae long yufala se, taem yufala i stap folem ol wokbaot blong Masta mo stap wet long Hem we i stamba dokta blong laef blong yumi, bae Hem i givim spel long sol blong yumi mo mekem ol trabol oli isi mo i nomo hevi.29 Long ol samting ia, mi testifae long tabu nem blong Jisas Kraes, amen.