Yu No Trikim Mi
Taem yumi stap obei long ol komanmen blong God, oltaem bae Hem i lidim yumi long stret rod, mo bae oli no trikim yumi.
Tedei, mi givim ol toktok blong advaes long evriwan, be speseli long yufala blong jeneresen ia we i stap kam antap—ol Praemeri pikinini, ol yang man, mo ol yang woman. Profet blong Lod blong tedei, Presiden Russel M. Nelson i lavem yufala bigwan—i bigwan we hem i bin toktok long plante long yufala long wan spesel wol yut divosen brodkas las yia long Jun 2018 mo i singaotem “Hop Ia blong Isrel.”1 Plante taem, yumi harem Presiden Nelson i stap singaotem yufala hemia nao stret—“hop ia blong Isrel,” jeneresen ia we i stap kam antap mo fiuja blong Jos Ia blong Jisas Kraes we i kambak.
Ol yangfala fren blong mi, bae mi wantem stat blong serem tu famli stori.
Namba 102 Dalmasen
Sam yia i pas, mi aot long wok mi kasem haos, mo mi sek blong luk waet peint evri ples—long graon, doa blong garaj, mo red brikis haos blong mifala. Mi luk gud i go mo faenem se peint ia i wetwet yet. Wan trak blong peint i go kasem biaen long haos mo mi folem i go. Long ples ia, mi faenem faef yia boe blong mi, i holem bras blong peint long han, i stap ronem dog blong mifala. !Naes blak Labrado, oli pentem haf waet!
“?Yu stap mekem wanem?” Mi askem wetem wan smat voes.
Boe i stop, i lukluk mi, i lukluk dog, i lukluk peintbras we waet peint i stap folfoldaon long hem, mo talem: “Mi jes wantem hem i olsem ol blak mo waet dog ia long muvi—yu save, hemia wetem 101 Dalmasen.”
Mi laekem dog blong mifala. Mi ting se hem i stret finis, be boe blong mi i gat defren tingting.
Straep Smol Puskat
Seken stori blong mi i abaot Bigfala Bubu Grova we i stap long wan haos long rurol, longwe long taon. Bubu Grova i stap kam olfala. Mitufala i ting se i gud ol boe oli luk hem bifo hem i ded. So, wan aftenun, mifala i draev longtaem i go long naes haos ia. Mifala i sidaon tugeta blong storian mo presentem ol boe blong mitufala. I no longtaem afta we mifala i stat storian, tufala yang boe ia, ating 5 mo 6 yia, i wantem go aotsaed mo pleiplei.
Bubu Grova, we i harem hemia, i bendaon smol kolosap long fes blong tufala. Fes ia i olfala mo tufala i no save, mekem tufala boe i fraet smol long hem. Hem i talem long wan series voes: “Lukaot—i gat fulap skank aotsaed ia.” Taem mitufala i harem, Lesa mo mi i sek; !mitufala i wari se bae skank ia i sprei long tufala! Ol boe oli go aotsaed blong pleiplei mo mifala i gohed storian.
Afta long hemia, taem mifala i go insaed long trak blong gohom, mi askem ol boe: “?Yutufala i luk wan skank?” Wan long olgeta i ansa: “No, mitufala i no luk wan, !be mitufala i luk wan blak smol puskat wetem waet straep long bak blong hem.”
Bigfala Man blong Trikim Man
Olgeta stori ia abaot ol pikinini we oli no save samting mo stap faenem samting abaot laef mo wanem i tru long laef, i mekem wanwan i smael, be tu, oli soem wan mo dip tingting.
Long fasfala stori, yang boe blong mitufala i gat naes dog we i lukaot long haos; nomata hemia, hem i hang long wan galon peint, wetem bras long han, i gat strong tingting blong krietem wan ril samting we i stap long tingting blong hem.
Long seken stori, ol boe oli no save long denja we bae tufala i fesem sapos tufala i faenem wan skank. From tufala i no save luksave wanem tufala i fesem, tufala i stap long denja blong safa long wan nogud samting. Ol stori ia, blong mistek long aedentiti—i soem se ril samting i wan nara samting. Long wanwan stori, risal i no bigwan.
Be, tedei, plante i gat trabol wetem ol semfala problem, be oli bigwan moa. Oli no save luk ol samting olsem we oli rili stap, o, oli no glad inaf long trutok ia. Antap long hemia, i gat ol fos oli wok tedei, we oli minim blong lidim yumi longwe long ful trutok. Ol trik mo giaman ia, oli go i bitim mistek blong aedentiti, mo plante taem, i gat ol series, be i no smol risal we i no stret.
Setan, papa blong ol giaman, mo bigfala man blong trikim man, bae i mekem yumi kwestinim ol samting olsem we oli rili stap, mo mekem yumi no wantem save long ol trutok ia we oli no save finis, o i jenisim olgeta i kam wan samting we i moa gud long yumi. “Hem i mekem wo wetem olgeta sent blong God”2 mo i bin spendem taosen yia blong kalkuletem mo praktisim paoa ia blong winim evriwan long ol pikinini blong God blong bilivim se gud i nogud mo nogud i gud.
Hem i mekem wan nem blong hem blong winim ol man long wol ia se ol skank oli ol smol puskat, o, sapos yu putum peint, !yu tanem wan Labrado i kam wan Dalmasen!
Bae yumi tanem yumi i go long wan eksampol blong stret prinsipol ia we i stap long ol skripja taem wan long ol profet blong Lod, Moses, i bin kam blong fesem semfala problem ia. “Wan taem … God i bin tekemaot Moses i go antap long wan bigfala hil we i hae tumas, mo hem i bin luk God, i luk fes blong hem mo i bin toktok wetem hem.”3 God i tijim Moses abaot aedentiti blong hem we i no save finis. Hem i talem se nomata Moses i wan man we i save ded mo i no stret evriwan, God i bin tijim hem se hem “ripresentem Wan Stret Pikinini blong mi Ia Nomo; mo Wan Stret Pikinini Ia Nomo blong mi, bae hem i Sevya.”4
Moses, long bigfala visen ia, i bin luk God, mo hem i bin lanem tu wan impoten samting abaot hemwan: se nomata hem i save ded, hem i bin wan pikinini blong God.
Lisin gud long wanem i hapen taem gudfala visen ia i finis. “Mo i bin hapen se … Setan i bin kam, i stap temtem hem, i talem: Moses, pikinini blong man, yu wosipim mi.5 Wetem strong paoa long tingting, Moses i ansa: “?Huia yu? From luk, mi mi wan pikinini blong God, we mi ripresentem Wan Stret Pikinini Ia Nomo blong hem; mo ?wea nao glori blong yu, blong mi stap wosipim yu?”6
Long nara toktok, Moses i talem: “Yu no save trikim mi, from mi save huia mi. Oli bin krietem mi folem fasin mo bodi blong God. Yu no gat laet mo glori blong Hem. ?So, from wanem bae mi wosipim yu mo foldaon long giaman blong yu?”
Nao, luklukgud long wei we Moses i ansa i go. Hem i talem: “Setan, !yu kamaot long ples ia! Yu no trikim mi.”7
I gat fulap samting we yumi save lanem aot long bigfala ansa ia blong fesem temtesen blong enemi. Mi invaetem yufala blong ansa semmak taem temtesen i fosem yu. Givim oda long enemi blong sol blong yu, mo talem: “!Yu go longwe! Yu no gat glori. !Yu no temtem mo giaman long mi! From mi save, mi mi pikinini blong God. Mo oltaem bae mi singaot long God blong mi blong i help.”
Be Setan, i no isi blong lego ol rabis tingting blong hem blong giaman mo daonem yumi. Hem i no bin mekem hemia wetem Moses, mo i wantem blong mekem hem i fogetem huia hem i blong taem we i no save finis.
Mo olsem se hem i sakem wan bigfala kros blong pikinini i kam, “Setan i bin krae long wan voes we i laod, mo i singsingaot, i tok strong long wol, mo i bin givim oda, i talem: “Mi nao, mi Wan Stret Pikinini Ia Nomo, yu wosipim mi.”8
Yumi luklukbak. ?Yu harem Setan i jes talem wanem? “Mi nao, mi Wan Stret Pikinini Ia Nomo. Yu wosipim mi!”
Bigfala man blong trikim man i talem stret: “Yu no wari, bae mi no spolem yu—mi no wan skank; mi jes wan kwaet blak mo waet smol puskat.”
Afta, Moses i prea long God mo i kasem paoa blong Hem long heven. Iven we Setan i bin seksek, mo wol i bin seksek, be Moses i no bin folem hem. Voes blong hem i bin strong mo klia. Hem i talem: “Setan, yu kamaot long mi, from se wan God ia nomo bae mi wosipim, we i God we i gat glori.”9
Long en, “Setan … i bin kamaot … long fes blong Moses.”10
Afta, Lod i bin kam mo i blesem Moses from hem i bin obei, mo Lod i se:
“Mi blesem yu, Moses, … mo mi mekem yu kam strong moa bitim plante narafala wota; …
“Mo luk gud, mi stap wetem yu, go kasem en blong laef blong yu.”11
Taem Moses i stanap agensem Setan, i wan ditel eksampol we i givim laet long wanwan long yumi, nomata weaples yumi stap long laef. Hem i wan strong mesej we i go long yuwan—blong yu save wanem blong mekem taem Setan i traem blong trikim yu. From se yu, olsem Moses, God i blesem yu wetem presen ia blong kasem help blong heven.
Ol Komanmen mo Ol Blesing
?Olsem wanem nao yu save faenem help ia long heven, semmak olsem Moses, mo no foldaon long trik o long temtesen? Wan klia rod blong tabu help, Lod Hemwan i talem bakegen long dispensesen ia taem Hem i bin talem: “Taswe, Mi Lod, we mi save bigfala trabol we bae i kam long ol man we oli stap laef long wol, mi bin singaotem wokman blong mi, Josef Smit Junia, mo mi stap long heven mo toktok long hem, mo givim ol komanmen long hem.”12 Blong yusum ol moa simpol toktok, bae yumi save talem se Lod, we i save “en stat long stat,”12 i save ol stret hadtaem blong taem blong yumi. From hemia, Hem i givim wan rod blong stanap agensem ol jalenj mo ol temtesen, we plante oli kam olsem wan stret risal blong ol paoa blong giaman blong enemi mo ol atak blong hem.
Wei ia i simpol nomo. Tru long ol wokman blong Hem, God i toktok long yumi, ol pikinini blong Hem, mo i givim ol komanmen long yumi. Yumi save talem ol ves ia long nara wei: “Mi, Lod mi … bin singaotem wokman blong mi, [Presiden Russel M. Nelson,] mo mi stap long heven mi toktok i kam long hem, mo mi givim ol komanmen long hem.” ?Hemia i no wan trutok we i bigwan?
Mi talem tabu witnes blong mi se, i tru, Lod i rili stap long heven mo toktok i kam long Josef Smit, i stat long taem blong bigfala Fas Visen. Hem i stap toktok tu long Presiden Nelson long taem blong yumi. Mi testifae se God i bin toktok wetem ol profet long ol taem bifo mo i bin givim ol komanmen long olgeta we oli blong lidim ol pikinini blong Hem blong oli stap hapi long laef ia mo long nekis glori.
God i stap gohed blong givim ol komanmen long profet blong yumi we i stap laef tedei. Ol eksampol oli fulap–wan hom we i senta, we Jos i sapotem, i balens long gospel tijing; wok blong riplesem hom mo visiting tijing wetem wok blong givhan; ol jenis long ol polisi mo ol odinens blong tempol; mo niufala program blong Ol Pikinini mo Ol Yut we bae i stat long 2020. Mi sapraes long gud fasin mo lav mo sore blong wan Papa long Heven we i gat lav, mo long Pikinini blong Hem, Jisas Kraes, we i bin putumbak Jos blong Hem long wol ia bakegen mo i bin singaotem wan profet blong taem blong yumi. Restoresen blong gospel blong Jisas Kraes i agensem ol denja taem wetem taem we evri wok i kamtru.
Fasin Nogud I Neva Bin Fasin blong Stap Glad
Fasin blong obei long ol komanmen we God i givim long profet, i wan ki blong stap longwe long paoa mo giaman blong enemi, be tu, blong gat glad mo hapines we i stap we i stap. Tabu rod ia i simpol nomo: stret mo gud fasin, o fasin blong stap obei long ol komanmen, i tekem ol blesing i kam, mo ol blesing oli tekem hapines, o glad, insaed long laef blong yumi.
Be, long semmak wei, Setan we i bin traem blong trikim Moses, nao i traem trikim yu. Oltaem i stap priten se hem i wan samting be i no tru. Oltaem i traem blong haedem huia ril hem. Hem i talem se fasin blong stap obei i mekem laef i nogud, mo bae i stilim hapines long yu.
?yu yu save ting long sam giaman plan blong hem blong trikim man? Olsem. Hem i priten se i no gat denja blong tekem rabis drag mo stap drong, mo i talem se i mekem man i glad. Hem i draonem yumi long ol nogud samting we i stap long ol sosol media, olsem fasin blong komperem yuwan mo gat wan defren lukluk long ril laef. Antap long hemia, hem i haedem ol nara dak, rabis samting onlaen we i spolem yumi, olsem ponografi, bigfala buli long intanet, o spredem giaman infomesen blong mekem man i gat tu tingting mo fraet long hat mo maen blong olgeta. Long nogud waes blong hem, i talem slo: “Jes folem mi, bae yu hapi tru.”
Ol toktok we blong plante handred yia bifo, wan profet blong Buk blong Momon i raetem, oli blong taem blong yumi tedei: “Fasin nogud i neva bin fasin blong stap glad.”14 Bae yumi luksave ol trik blong Setan olsem we oli stap. Bae yumi stanap agens mo luk tru long ol giaman mo fos blong wan ia we i wantem prapa spolem sol blong yumi, mo stilim glad blong yumi tedei mo fiuja glori blong yumi.
Ol dia brata mo sista blong mi. Yumi mas gohed blong stap fetful mo lukaotgud, from hemia i wan wei ia nomo blong luksave trutok mo harem voes blong Lod tru long ol wokman blong Hem. “From Spirit i talem trutok mo i no giaman. … Taswe, ol samting ia oli soemaot long mifala long wan klia fasin, blong sevem sol blong yumi. … from God i bin talemaot tu, ol samting ia long ol profet blong bifo.”15 Yumi Ol Sent blong God we I Gat Olgeta Paoa, !hop ia blong Isrel! ?Bae yumi foldaon? ?Bae yumi ronwe o no go long faet? !No! … Folem oda blong God, wetem sol, hat mo han, yumi fetful mo tru mo stanap.16
Mi talemaot witnes blong mi, abaot Tabu Wan Ia blong Isrel—we nem blong Hem i Jisas Kraes. Mi testifae abaot lav, trutok, mo hapines blong Hem we i stap, we i posibol tru long sakrifaes ia we i no gat en mo i no save finis. Taem yumi stap obei long ol komanmen blong Hem, oltaem bae Hem i lidim yumi long stret rod, mo bae oli no trikim yumi. Long tabu nem blong Sevya blong yumi, Jisas Kraes. Amen.