Bigfala Wokbaot blong Yu
Sevya ia i stap invaetem yumi, evri dei, blong lego ol gud mo sef ples blong yumi mo joenem Hem long wokbaot blong stap wan disaepol.
Abaot Ol Gudfala Lisepsep
Wan buk blong pikinini we oli raetem plante yia i pas, i stat wetem sentens ia: “Insaed long wan hol long graon, wan gudfala lisepsep i stap ia.”1
Stori blong Bilbo Baggins i abaot wan nomol gudfala lisepsep we i kasem wan gudfala janis evriwan—janis blong wokbaot luk ples, mo promes blong wan bigfala praes.
Problem i we, ol gudfala lisepsep we oli gat respek long olgetawan, oli no gat fasin blong wokbaot olbaot. Laef blong olgeta i blong stap long gud ples nomo. Oli laekem blong kakae sikis taem long wan dei taem i posibol, mo oli laekem blong spendem dei long garen, talem stori wetem ol visita, singsing, plei miusik, mo mekem ol simpol samting blong laef.
Be, taem Bilbo i kasem wan janis ia blong wokbaot fulap, wan samting i kik dip insaed long hat blong hem. Hem i andastanem long stat se, wokbaot ia, bae i gat fulap jalenj long hem. Iven sam oli ol denja. I save hapen tu se bae hem i no save kambak.
Be yet, singaot ia blong go wokbaot i kasem dip insaed long hat blong hem. Mekem se, naes gud lisepsep ia i aot long gud ples blong hem, mo i tekem rod ia blong longfala wokbaot blong hem we bae i tekem hem i go “kasem longwe mo kambak.”2
Longfala Wokbaot blong Yu
Maet wan long ol risen we stori ia i ringim sora blong plante long yumi, i from se i stori blong yumi tu.
Long, longtaem i pas, iven bifo yumi bin bon long wol ia, long wan taem we taem mo memori i haedem, yumi tu, oli bin invaetem yumi blong go long wan longfala wokbaot. God, i givim, we i Papa blong yumi long Heven. Blong akseptem longfala wokbaot ia, bae i minim blong aot long gud ples mo sef ples kolosap long Hem. Bae i minim blong kam long wol ia blong mekem wan wokbaot we i fulap long denja mo tes we yumi no save.
Yumi bin save se bae i no isi.
Be tu, yumi bin save se bae yumi winim plante rij samting, we i gat wan bodi blong mit mo bun mo yumi gotru long ol bigfala glad mo harem nogud blong laef long wol ia. Bae yumi lan blong traehad, blong lukaotem, mo blong gat hadtaem wetem samting. Bae yumi faenem ol trutok abaot God mo yumiwan.
I tru, yumi bin save se bae yumi mekem ol mistek folem rod ia. Be tu, yumi bin kasem wan promes: se from bigfala sakrifaes blong Jisas Kraes, bae yumi kam klin long ol rong blong yumi, bae spirit blong yumi i kam gud mo klin evriwan, mo wan dei, bae yumi laef bakegen long ded mo yunaet bakegen wetem olgeta we yumi lavem.
Yumi bin lanem hamas God i lavem yumi. Hem i givim laef long yumi mo Hem i wantem yumi blong kasem samting. From hemia, Hem i bin rere wan Sevya blong yumi. “Be,” Papa we i stap long heven i talem: “yu save jusum yuwan wanem yu wantem, from se mi givim long yu.”3
I mas gat ol pat blong wokbaot long laef ia we i bin mekem ol pikinini blong God oli fraet mo fraet bigwan, from se wan bigfala namba blong ol spirit brata mo sista blong yumi oli bin agensem.4
Tru long presen mo paoa blong fridom blong joes, yumi bin disaed se hamas bae yumi save lanem mo kam blong taem we i no save finis, bae i stret long mak blong denja ia.5
Mekem se, yumi bin trastem ol promes mo paoa blong God, mo Pikinini blong Hem we Hem i Lavem Tumas, mo yumi bin akseptem jalenj ia.
Mi bin mekem.
Mo yufala tu.
Yumi bin agri blong aot long sef ples blong fas gudfala laef mo go long wan longfala wokbaot blong go longwe mo kambak.
Singaot Ia blong Longfala Wokbaot Ia
Be yet, laef long wol ia i gat wan wei blong pulumaot tingting blong yumi, ?i tru? Yumi gat fasin blong nomo luk longfala wokbaot, mo yumi laekem gud ples mo isi laef, be i no blong groap mo progres.
Be yet, i gat wan samting we yumi no save tanem baksaed long hem, we i stap dip insaed long hat blong yumi, we i hanggri from wan ples we i hae moa mo gud moa. Hanggri ia i wan long risen from wanem ol pipol oli kam long gospel mo Jos Ia blong Jisas Kraes. Gospel ia we i kambak, long wan wei, i givim bakegen, singaot ia blong wan longfala wokbaot we yumi bin akseptem longtaem finis. Sevya ia i invaetem yumi, evri dei, blong lego ol gud mo sef ples blong yumi mo joenem Hem long wokbaot blong stap wan disaepol.
I gat plante kona long rod ia. I gat ol hil, ol flat ples, ol rod we i go raon. I gat ol bigfala spaeda, ol smol man mo ol tolfala man, mo iven wan o tu dragon. Be sapos yu stap long rod ia mo trastem God, bae long en, yu faenem hae fiuja ples ia we i gobak long hom blong yu long heven.
?Yumi stat olsem wanem?
I simpol nomo.
Putum Hat blong Yu I Stap Wetem God
Faswan, yu nid blong jusum blong putum hat blong yu i stap wetem God. Traehad evri dei blong faenem Hem. Lan blong lavem Hem. Mo afta, letem lav ia i givim insperesen long yu blong lanem, andastanem, mo folem ol tijing blong Hem, mo lan blong obei long ol komanmen blong God. Gospel ia blong Jisas Kraes, we i kambak, i givim yumi wan klia mo simpol rod we wan pikinini i save andastanem. Be yet, gospel blong Jisas Kraes i gat ansa long plante long ol bigbigfala kwestin long laef, mo i gat ol samting we oli dip mo oli bigwan, we, iven sapos yu stadi mo tingting hevi long olgeta blong laef taem, bae yu no save andastanem iven wan smol pat.
Sapos yu holembak yu long longfala wokbaot ia from se yu ting se yu no naf, tingbaot se fasin blong stap wan disaepol i no blong mekem samting i stret evriwan; i blong mekem samting wetem tingting. Ol joes blong yu nao i soem ril yu, be i no tumas ol samting we yu save mekem.6
Iven taem yu foldaon, yu save jusum blong no givap, be yu jusum blong faenem niu paoa long tingting, gohed, mo go antap moa. Hemia nao bigfala tes blong longfala wokbaot ia.
God i save se yu yu no stret evriwan, se bae yu mestem rod samtaem. God i lavem yu semmak nomo taem yu gat hadtaem o taem yu win.
Olsem Papa we i lavem yu, Hem i wantem yu blong yu minim blong stap traem. Blong stap olsem disaepol, i olsem blong lanem blong plei piano. Maet, wanem bae yu save mekem faswan i blong plei wan miusik ia, “jopstik.” Be sapos yu gohed blong traem, ol simpol tiun we yu no save plei gud, bae wan dei, oli givim wan naes miusik, ol rapsodi, mo konset.
Nao, maet dei ia i no kam long laef ia, be bae i kam. Evri samting we God i askem i blong yu gohed blong traehad wetem ful tingting.
Go Help Wetem Lav long Ol Narawan
I gat wan intresting samting, abaot rod ia we yu bin jusum: wan wei ia nomo i stap blong yu progres long gospel wokbaot blong yu, i blong helpem ol narawan blong progres tu.
Blong helpem ol narawan, hem i rod ia blong stap wan disaepol. Fet, hop, lav, sore, mo seves oli smutum yumi olsem ol disaepol.
Tru long ol hadwok blong yu blong helpem olgeta we oli pua mo olgeta long nid, blong go helpem olgeta long hadtaem, bae fasin blong yu i kam klin gud mo i kam smut, spirit blong yu i kasem moa, mo yu save stretem hed moa.
Be lav ia, i no save kam sapos yu ting se bae oli pembak yu. I no save kam kaen seves ia we wan i wet blong oli givimbak wan samting, o mekem wan samting i kambak.
Ol tru disaepol blong Jisas Kraes oli lavem God mo ol pikinini blong Hem mo oli no wet se bae oli kasembak wan samting. Yumi lavem olgeta we oli no mekem gud long yumi, we oli no laekem yumi. Iven olgeta we oli stap daonem, abiusum, mo lukaot blong mekem nogud long yumi.
Taem yu fulumap hat blong yu wetem stret lav blong Kraes, yu no lego wan ples blong fasin blong givimbak, jajmen, mo mekem man i sem. Yu obei ol komanmen blong God from se yu lavem Hem. Long rod ia, sloslo yu kam moa olsem Kraes long ol tingting mo wok blong yu.7 ?I gat wan longfala wokbaot we i gud moa bitim hemia?
Serem Stori blong Yu
Nambatri samting we yu traehad blong mekem gud long longfala wokbaot ia, i blong tekem nem blong Jisas Kraes long yuwan, mo no stap sem long huia yu.
Yumi no haedem bilif blong yumi.
Yumi no berem tu.
Be, yumi tokbaot longfala wokbaot blong yumi wetem ol narawan long ol nomol fasin blong yumi. Hemia nao wanem ol fren oli stap mekem—oli tokbaot ol samting we oli impoten long olgeta. Ol samting we i stap insaed long hat blong olgeta mo i mekem samting i defren.
Hemia i wanem yu mekem. Yu stap talem ol stori mo ol eksperiens blong yu olsem wan memba blong Jos Ia blong Jisas Kraes blong Ol Lata-dei Sent.
Samtaem, ol stori blong yu oli mekem ol pipol oli laf. Samtaem bae i mekem olgeta oli krae. Samtaem bae i helpem ol pipol blong gohed wetem longfala tingting, fasin blong girap mo gohed bakegen, mo strong paoa long tingting blong fesem wan nara aoa, wan nara dei mo kam kolosap moa long God.
Serem ol eksperiens blong yu fes tu fes, long sosol media, long ol grup evri ples.
Wan las samting we Jisas i bin talem long ol disaepol blong Hem, i we, oli mas goraon long wol mo serem stori ia blong Kraes we i girap bakegen.8 Tedei, wetem glad, yumi akseptem bigfala wok ia we Hem i putum long solda blong yumi
Hem i wan mesej blong glori we yumi mas serem: from Jisas Kraes, evri man, woman, mo pikinini i save gobak sef long hom blong olgeta long heven, mo longwe, bae yumi !stastap long glori mo stret mo gud fasin!
I gat plante moa gud nius blong serem.
!God i bin kamaot long man long taem blong yumi! Yumi gat wan profet we i stap laef tedei.
Mi wantem rimaenem yufala se God i no nidim yu blong “salem” gospel we i kambak, o Jos Ia blong Jisas Kraes.
Hem i wantem luk nomo se yu no haedem andanit long baket.
Mo sapos ol pipol oli disaed se Jos i no blong olgeta, hemia desisen blong ol.
I no minim se yu no win. Yu gohed blong mekem gud long olgeta. Mo i no minim se yu stop blong invaetem olgeta bakegen.
Wanem i defren bitwin ol wanwan sosol kontak mo strong paoa mo sore blong disaepol, hem i—!invitesen!
Yumi lavem mo respektem evriwan long ol pikinini blong God, i nomata weaples oli stap long laef, i nomata long kala blong skin o relijin, i nomata desisen blong laef blong olgeta.
Long saed blong yumi, bae yumi talem: “!Kam mo luk!” Faenemaot yuwan olsem wanem blong wokbaot long rod ia blong stap disaepol, i givim blesing mo i mekem yu harem gud.”
Mifala i stap invaetem ol pipol blong “kam mo help, taem yumi traem blong mekem wol ia i wan moa gud ples.”
Mo yumi talem: “!Kam mo stap! Mifala ol brata mo sista blong yufala. Yumi no stret evriwan. Yumi trastem God mo lukaot blong obei ol komanmen blong Hem.
“Joenem mifala, mo bae yufala i mekem yumi kam gud moa. Mo, long rod ia, bae yufala tu i kam gud moa. Bae yumi tekem wan longfala wokbaot tugeta.”
?Wetaem Bae Mi Stat?
Taem fren blong yumi, Bilbo Baggins i bin filim singaot ia blong longfala wokbaot i tantanem hem insaed, hem i disaed blong go slip gud long naet, i girap i kakae gud, mo i aot fas samting long moning.
Taem Bilbo i wekap, hem i bin luk se haos blong hem i olbaot, mo kolosap, tingting blong hem i aot long gudfala plan ia.
Be fren blong hem, Gandalf i kam, i askem: “?Wetaem nao bae yu kam?”9 Blong hem i kasem ol fren blong hem, Bilbol i mas disaed se bae hem i mekem wanem.
Mekem se, nomol mo gud lisepsep ia i aot i pas tru long doa blong hem i go long rod blong longfala wokbaot, we i hariap, i fogetem hat, woking stik, mo hankijif blong hem. Hem i no iven seken moning kaekae blong hem.
Maet i gat wan lesen ia blong yumi lanem tu.
Sapos yu mo mi, i filim se kat i tantanem blong joenem longfala wokbaot ia blong stap laef mo serem wanem we Papa long Heven we i gat lav i rere blong yumi longtaem finis i kam, mi save talem stret long yufala se, tedei i dei blong folem Pikinini blong God, mo Sevya blong yumi long rod ia blong Hem blong givim seves mo stap disaepol.
Yumi save spendem wan laeftaem blong wet from taem ia, taem we evri samting i laen gud finis. Naoia i taem blong yu komitim yu fulwan blong lukaotem God, blong givhan long ol narawan, blong serem eksperiens blong yumi wetem ol narawan.
Lego hat, woking stik, hankijif mo doti haos i stap.10
Long olgeta long yumi we i stap wokbaot finis long rod ia, gat strong paoa long tingting, lav mo sore, tras, mo !gohed!
Long olgeta we oli aot long rod ia, plis kambak, joenem mifala bakegen, mekem yumi kam strong moa.
Mo, long olgeta we oli no stat yet, ?from wanem wet? Sapos yu wantem luk ol sapraes blong bigfala longfala wokbaot ia wetem spirit, !tekem step blong yu from longfala wokbaot ia! Toktok wetem ol misinari. Toktok wetem ol Lata-dei Sent fren blong yu. Toktok wetem olgeta abaot bigfala mo gudfala wok ia.11
!I taem blong stat!
!Kam Joenem Mifala!
Sapos yu filim se laef blong yu i save gat moa mining, wan moa hae stamba tingting, strong famli, mo kam kolosap moa long God; plis, kam joenem mifala.
Sapos yu stap lukaotem wan komuniti blong ol pipol we oli stap wok blong bes blong olgeta, helpem olgeta long nid, mo mekem wo ia i wan moa gud ples, !kam joenem mifala!
Kam mo luk se bigfala, gudfala, longfala wokbaot ia, i wanem stret.
Folem rod ia, bae yu faenem huia yu.
Bae faenem mining.
Bae yumi faenem God.
Bae yu faenem moa gud mo longfala wokbaot blong glori ia blong laef blong yu.
Long hemia, mi testifae, long nem blong Ridima mo Sevya, Jisas Kraes, amen.