Te parau ti’a au
Tē ora nei te ta’ata pāpa’i i Colorado (Marite).
« ’Ia rave… ’outou i te parau maita’i ra » (2 Korinetia 13:7).
« ’Ua hina’aro vau ’ia hi’o ’oe i tō oe teina », tē parau ra māmā. « E haere māua pāpā e tauturu i te hō’ē ta’ata tei ma’ihia. »
’Ua ’imi au i te purūmu nō te purūmu i te tahua o tō mātou fare na’ina’i ’e ’ua ’ē noa atu vau i te upo’o. ’O māmā te peresideni Sōtaiete Tauturu, e mea pinepine ’oia i tē hāhaere i te mau tuahine o tā mātou pāroita.
« Māuruuru e Arlyn », ’ua nā ’ō mai māmā ma te ’āpā iāna i ni’a i te upo’o. « Tē ta’oto ra ’o John. ’Ua fa’arapu vau i te faraoa tei ni’a i te ’iri vaira’a. ’Eiaha e ha’uti i te reira ».
’Ua hi’o atu vau nā roto i te ’ūputa i te fa’ahorora’a rāua i te pere’o’o i ni’a i tō mātou purūmu repo. E te’ote’o ri’i nō’u ’ua tu’u mai māmā i tōna ti’aturi i ni’a iā’u.
’A purūmu ai au i te piha tūtu, ’ua hi’ohi’o ri’i au i te faraoa. ’Ua hina’aro roa vau ’ia ho’i ’oi’oi mai ’o māmā i teie pō nō te tunu i te reira. Tei mātauhia e mātou, e ’amu mātou i te faraoa ’āpī ’e te mōmona nā ni’a iho, e mōmona tei hāmanihia i te fare nei. ’Aita fa’ahou rā tā mātou mōmona ’a toru ’āva’e i teienei.
Te mōmona ! ’Ua hia’ai roa vau i te hō’ē mea monamona i te ferurira’a vau i te reira. ’Ua fā’ao vau i te mōhina tihota, tei ni’a i te pa’epa’e ni’a roa. ’Ua ’ite au tē fa’aherehere ra māmā i te reira nō te hāmani i te mōmona.
Terā rā, rahi noa atu vau i te ferurira’a i te tihota, rahi noa ato’a atu tō’u po’ia. Tu’u a’era vau i te hō’ē pārahira’a i pīha’i iho i te ’iri vaira’a ’e ’ua pa’uma atura. ’Ua ra’e ri’i noa tō’u manimani rima i te mōhina tihota. ’Ua tūra’i ri’i mai au i te hiti o te pa’epa’e…
’Ei reira te mōhina i te topara’a mai ! ’Ua tāmata vau i te haru mai i te reira, ’ua topa rā te reira i roto mau i te faraoa. ’Ua purehu te tihota nā ni’a i te faraoa ’e i ni’a i te ’iri vaira’a ’e i te tahua.
« ’Aia ! » ’Ua tuō vau. Ara mai nei tō’u teina. Ha’amata a’era ’oia i te ta’i. ’Ua hina’aro roa vau e ta’i ato’a. E aha pa’i tā māmā e parau nō teie huera’a ?
I te nāra’a John, ’ua fa’aitoito vau i te tāmā i te tihota. ’Ua rave mai au i te mōhina i roto i te faraoa ’e ’ua horoi au i te reira. ’Ua horoi au i te tihota i ni’a i te ’iri vaira’a ’e i ni’a i te tahua. ’Aita rā e rāve’a nō te tātara i te tihota i roto i te faraoa.
’Ua mana’o vau e fa’aho’i i te mōhina i ni’a i te pa’epa’e. Penei a’e e’ita ’o māmā e ’ite mai ’ua pau te tihota. ’Ua ’ite rā vau e ’ere i te mea ti’a. ’Ua tu’u ihora vau i te mōhina i ni’a i te ’aira’amā’a ’e ’ua tīa’i au ia māmā ’e pāpā ’ia ho’i mai.
I te taera’a mai rāua, ’ua haru ’oi’oi te mata o māmā i ni’a i te mōhina tihota.
ʼUa huti au i te aho. « ’Ua hina’aro noa vau i te tahi ri’i tihota. ’Ua topa rā te mōhina mai ni’a mai i te pa’epa’e. ’Ua tāmata vau i te tāmā i te reira, ’aita rā i haere nō te faraoa ». ’Ua matara noa mai te parau ’a pi’o noa ai au i te upo’o i raro.
’Ua vai mū noa māmā hō’ē minuti.
’Ua parau marū atu vau : « Tē tātarahapa nei au ».
’Ua puhi ri’i mai māmā i te aho. « ’Ua oti ïa, e mea monamona tā tātou faraoa i teie pō », ’ua nā ’ō ’oia. ’Ua hi’o a’era tō’u mata i ni’a. E mata ’ata’ata tōna i ni’a iā’u. « Māuruuru nō te paraura’a mai i te mea i tupu. »
I te ’amura’a mātou i te faraoa monamona i terā pō, ’ua paraparau mātou māmā ’e pāpā nō ni’a i te ha’avare ’ore.
« E hape iho ā tātou pā’āto’a e rave rahi taime », ’ua parau pāpā. « Mai te mea rā e mea ha’avare ’ore tātou ’e e tāmata i te tātarahapa, e ’oa’oa te Metua i te Ao ra ’e Iesu. E ha’amaita’i-noa-hia tātou nō te ’ore-noa-ra’a e ha’avare—noa atu ā e mea huru pa’ari i te ha’amatara’a ».
Tē vai noa ra tō’u ’oto nō te purehura’a te tihota. I ’ite na vau ē, e’ita paha e rahi tā mātou mōmona i teie matahiti nō teie hape tā’u. ’Ua ’oa’oa rā vau ’ua parau vau i te parau mau. E mana’o au te reira e’ita e noa’a i te tihota.