Hi’o ia pāpā e hīmene
Maria Oka
California (Marite)
Faʼahōho’araʼa nā Allen Garns
E maha ’āva’e noa ’e te ’āfa vau i roto i tā’u misiōni i Honolulu, i Vaihī (Marite) i te tupura’a te ma’i hōpi’i i ni’a iā’u nō te taime mātāmua. I te mau ’āva’e i muri mai, hope’a ’ore au i te fare ma’i nō te mau hi’opo’ara’a, ’e ’ua hōro’ahia mai te hō’ē rā’au ’āpī ’aita tō’u tino i au roa.
Nā mua a’e terā ’ati, ’ua rōtahi noa vau i ni’a i tā’u ’ohipa misiōnare ’e ’aita vau i mihi rahi i te fare, mai te taime rā o tō’u hōpi’ira’a, ’ua māuiui noa tō’u ’ā’au. ’Ua mihi au i tō’u nā metua ’e ’ua tae mai te mana’o ’ōtahi noa atu ā te mau ta’ata fa’ahiahia ’e te aupuru ’ati a’e iā’u. ’Aita vau i hina’aro e ho’i i te fare, ’ua hina’aro rā vau i te mana’o hau.
’Ua fa’ati’a mai tō’u peresideni misiōni ’ia paraparau vau i tō’u nā metua nā roto i te niuniu nō ni’a i ta’u mau rā’au. ’Ua nā ’ō mai tō’u metua tāne, tei manuia tōna moemoeā e tomo i roto i te pupu hīmene o te Fare menemene i Temple Square, e hīmene ’oia ma tōna ’ā’au ato’a nō’u i roto i te ’āmuira’a rahi, ’o tē ha’amata i te mahana nō muri iho.
’Ia po’ipo’i a’e, ’ua pure tu’utu’u ’ore au nō te hau, ’o tō’u hina’aro rahi roa ho’i. ’Ua noa’a a’enei tā’u mau pāhonora’a i roto i te ’āmuira’a rahi nā mua a’e, ’e ’ua tu’u vau i tō’u ti’aturi ē, e fāri’i fa’ahou vau i te arata’ira’a. I te ha’amatara’a te ’āmuira’a, ’ua hīmene te pupu hīmene i te hīmene « E te mau tamari’i here ē » (Te mau hīmene, n°48). I roto i te minuti mātāmua vau te ’itera’a i tō’u pāpā i roto i te ’āfata teata. ’Ua fa’arahi te camera i ni’a iāna nō te tahi ma’a taime.
’Ua tahe tō’u roimata ’a pū’ohu ai te hō’ē mana’o hau rahi iā’u. I ’ite na vau ē, ’ua here te Atua iā’u. ’Ua pāpū maita’i iāna e aha tō’u hina’aro i terā mahana—te hō’ē ha’apāpūra’a ē, tei pīha’i iho ’oia iā’u ’e te ha’apa’o ra ’oia iā’u. ’Ua putapū vau i te here o te Atua, ’e mai reira atu, te here o tō’u ’utuāfare, o tō’u mau hoa misiōnare ’e o tō’u peresideni misiōni. ’Aita fa’ahou te mana’o teimaha, ’ua ’ite rā vau i terā taime i te rāve’a nō te ha’afātata atu ā i te Fatu.
’Aita tō’u fifi ma’i i ’ore. Tītauhia ’ia ho’i au i te fare nā mua i te hope’a o tā’u misiōni, ’ua ’ite rā vau ē, tei reira te Atua ’e ’ua here ’oia iā’u. ’Ua ’āpe’e noa terā mana’o pāpū iā’u i roto i te mau taime ’ua māuiui tō’u ’ā’au ma te hōro’a mai i te tīa’i i te mau hora pōiri roa a’e. E parau paha vetahi i te reira ’ei ’ohipa hape noa, ’ua ’ite rā vau e semeio iti te ’itera’a i tō’u pāpā e hīmene ra nō ni’a i te here o te Atua i tō’u taime fifi.