Lototele i Lo’u Taua
O le aoao e uiga i o’u augatama na ou maua ai le lototele e tau ma o’u taua faaleagaga.
Ata na tusia e Alex Nabaum
I le pe a ma le 11 o o’u tausaga, sa ou amata iloa ai ponokalafi. O lena mea e tasi na tuputupu ae o se faafitauli tele atu na faapea ona avea ma tauiviga aupito tele ao o’u avea ma se tagata talavou. E oo ane i le taimi na ou i ai i le aoga maualuga, ua ou liliuese mai ponokalafi ae agai atu i le Togiola a Iesu Keriso. E ui ina sa ou maua se vavega i le tapeeseina o le eleelea mai lo’u mafaufau, ae sa ou lagonaina pea i lo’u loto le lofituina o le tausalaina.
Pe a o le vaitaimi lea, sa nono mai ai e lo’u tinamatua le tusi o talaaga tusitusia o le olaga o le tina o le tina o tinamatua o Thea. I totonu o ni nai aso, na ou lagona le matuai loloto o lo’u pipii atu ia Thea Martina Waagen (1883–1967). Sa maliu faafuasei le tama o Thea i ni nai masina a o lei fanau mai o ia, o lea sa tausia ai o ia e lona tina sa malaga mai Nouei, ua oti lana tane. Sa faigata le tuputupu ae, ae sa ia maua le olioli i le tauina o vivao ma le taina o le okeni i lana lotu Luteru i le latou nuu. Sa toe faaipoipo le tina o Thea, ma faatasi ai ma le fesoasoani a le toalua o lona tina, sa aoga ai o ia i le kolisi. Mulimuli ane i le olaga, sa liliu mai Thea ma lona aiga i le Ekalesia ma siitia atu ai i Iuta, ISA. Sa le faigofie ia mea mo Thea. Sa tetea o ia ma lona toalua. Sa ia oo i le loloto o le lototiga ma le ogaoga o le atuatuvale, ae sa ia tumau faamaoni pea i lana molimau.
A o ou aoao e uiga ia Thea ma lana filifiliga ia onosai pea e ui i faigata, sa lofituina a’u i se alofa malosi na faapea ona faatupuina ai lo’u lototele e uiga i lo’u taua ma sa fesoasoani ou te faatoilaloina ai lo’u faataupepe i le tausalaina. Sa ou iloa ai, afai na mafai ona ia faia ia mea faigata, ou te mafaia foi.
Sa ou alu i le LDS.org ma talosagaina le faamanuiaga faapeteriaka o Thea. Sa atili ai lo’u ootia ina ua ou faitauina, “O le a tulai mai fua o ou sulugatiti ma valaau ia oe amuia oe i fafine i Siona.” Sa ou iloa ai o lo’u faaaloalo loloto mo ia o se faataunuuga lea o lena fuaiupu faatauvaa. O le alofa o Thea sa fesoasoani e faamalolo ai lo’u loto i le tausalaina ma liliu atu ai lo’u loto i o’u augatama. O la’u molimau muamua lea i le folafolaga a Elder David A. Bednar e faapea, o le auai i le galuega o talafaasolopito o aiga, o le a “puipuia ai [a’u] e faasaga i faatosinaga malolosi a le fili” (“O Le a Liliu Atu Loto o Fanau i o Latou Tama,” Liahona, Nov. 2011, 27).
Ua ou lagonaina se fuataga faaopoopo o le malosi ma le manino i lo’u olaga a o faaauau ona ou sailia o’u aiga ma aoao i a latou tala. O le auai i taimi uma i gaoioiga o talafaasolopito o aiga, ou te lagona ai le pei e maua se autau atoa o aumea o e e fesoasoani ia te au e tauina a’u taua faaleagaga. E mafai ona ou ola e aunoa ma le fefe aua, “e toatele ua ia te i tatou [o o tatou augatama] i e ua ia te i latou [o au a Satani]” (2 Tupu 6:16).
E ui ou te le’i maua ni afe o igoa o le aiga e ave i le malumalu, ae ua ou aoaoina i tala a o’u augatama ma sueina o latou aiga e ala i suesuega toto’a. Ua ou faaaluina le taimi e manatua ai o latou olaga ma faaaloalo ai i o latou talatuu. Ou te iloa ua faamalosia au ma puipuia e faasaga ia Satani a’o ou faatumulia lo’u olaga i le malamalama e uiga i lo’u aiga.