E Te Manatu O Le A E Toe Vaai i Lou Tuagane?
Wendy Jennings (e pei ona taua ia Leah Barton)
Iuta, ISA
Ata na tusia e Allen Garns
O le leva o le po, na o au le faatauoloa na tiute, ma e leai se isi agaga i totonu o le faleoloa atoa. Ao ou soloina laulau fai faatau, sa amata ona ou uu.
Sa vave ona sui lau uu i le pesepese. Sa amata ona ou pese i le “O Mai, Outou o le Au Paia,” (Viiga, nu. 17). E le masani ona ou usuina ni viiga e faafiafia ai, ae na ou usu ma le malosi seia oo ina taofia au i le vaai atu i se tasi.
Na savali mai se toeaina matua.
“Ou te iloa le pese lena,” na ia faapea mai ai. “E faapefea ona e iloaina?”
“O se viiga matou te usuina i la’u ekalesia,” na ou faapea atu ai.
“O oe o se Mamona?”
Na ou tali atu o au o se Mamona.
Na ia faapea mai o lona toalua sa avea o se Au Paia o Aso e Gata Ai ma sa maliu i le kanesa i le 2011. Sa ia faapea mai o le “O Mai, Outou o le Au Paia,” sa usuina i lona falelauasiga. Na ou faailoa atu lou faamaisega ma ou fai atu ia te ia o lo’u tuagane matua na maliu i le 2011 ao ave se misiona i Chile. Sa matou usuina foi lenei viiga i lona falelauasiga. Na pai mai le Agaga i maua loto ao maua maofa i lea “mea fetaui.”
”E te manatu la e te toe vaai i lou tuagane?” na ia fesili mai ai.
Sa ou fesili faafia ia te au lava ia i lenei fesili. I masina faigata ina ua maea le maliu o lo’u tuagane, sa ou tauivi ai i masalosaloga. E lei pine, ae faamanuiaina au e le Tama Faalelagi i le malamalama suamalie e faavavau aiga. Sa i ai pea au fesili, ae na ou pupula atu i le toeaina ma faapea atu, “Ioe, ou te iloa!”
“E tele le faatuatua o ia te oe,” na faapea mai ai le toeaina. “Sa masani ona faapea mai lo’u toalua e tatau ona ia te i maua ‘se susulu atoatoa o le faamoemoe.’” Na ou ioeina ma taulotoina le faaiuga o le 2 Nifae 31:20, lea e tatau ona tatou alolofa i le Atua ma tagata uma, fetaomi atu i luma, ma taumamafa i le afioga a Keriso, ma tumau e oo i le iuga.
“O lena tonu lava!” na faimai ai le toeaina ma loimata i ona mata. “O le mea lena e ono ia faimai ai! E faapefea ona e iloa lena mea?”
Na ou fai atu ia te ia sa i ai i totonu o le Tusi a Mamona. Sa ia fesili mai pe faapefea ona ia maua se kopi. Sa ou tau atu i ai le auala e faia ai i luga o upega tafailagi. Sa lulu e le toeaina lou lima, faafetai mai ia te au i lou igoa, ma alu.
O le i ai o le faatuatua o lona uiga tatou te faalagolago i le Atua tusa lava pe tatou te le iloaina tali uma. Ou te faafetai ina ua valaauina au e tali fesili a lea toeaina, sa mafai ona ou faalagolago i lou faatuatua i upu moni o loo ou iloaina. Sa lei atoatoa lou faatuatua, ae na ou iloa ua lava lea i luma o le silafaga a le Alii.