Vaavaai atu i le Tuputupu Ae o le Malumalu o Roma
“Ou te fia vaai i le malumalu. “Ou te ulu i ai i se aso” (Tusipese a Tamaiti, 99).
Na pulatoa atu Gioele ma Michele i le tulaga o le galuega i le isi itu o le auala. Sa mafai ona la iloa atu le tele o pou uamea ma faaputuga o sima.
“E lei foliga lava o se malumalu,” na faapea mai ai Gioele.
“Ae o le a foliga i ai i se aso,” na tali atu ai Michele.
O le uluai taimi lea na vaai ai le auso i le mea o fausia ai le Malumalu i Roma Italia. I lea taimi sa tau malaga lo latou aiga i Suitiselani e asiasi i le malumalu. Ae o lea malumalu fou ua na o le 30 minute le mamao mai lo latou fale!
Sa matamata Michele ma Gioele o la’u e loli sasama lapopoa faaputuga palapala.
“Ou te manatu o o tonu o le a i ai le isi tumutumu,” na faapea atu ai Michele, ao tusi atu i se nofoaga e latalata i luma o le fale.
Sa lue le ulu o Gioele. “Vaai! O lea ua sau papa,” na ia faapea atu ai. Sa ofu lo la tama i ona ofu faigaluega masani—ofu lotu ma se pulou fau fale paepae. Sa ia galue o se enisinia o mea tau eletise i totonu o le malumalu. Sa fiafia i laua e faalogologo e uiga i mea na ia galue ai i aso taitasi. Mo se faataitaiga, i se tasi aso na ia tau atu ai ia te i laua ua taunuu mai le faatagata o Keriso. O se isi taimi na ia tau atu ia i laua e uiga i le vai papatisoga.
O lena po, na faamautinoa e Michele e fai ana tatalo ma faafetai atu i le Tama Faalelagi mo le malumalu. Sa ia maua se lagona mafanafana i soo se taimi lava na te tatalo ai i ai.
Na mavae atu vaiaso. O puipui faaofuofu o le malumalu sa ufitia i maa malolosi, ma sa tutu ae ai tumutumu uumi e lua agai i le lagi. Sa fausia se fale mo tagata asiasi laitiiti e latalata ane i ai. Mai i lea taimi i lea taimi, e o ai Gioele ma Michele e oomi o laua foliga i le faamalama e vaai poo lea se mea ua sui.
Ona oo lea i se tasi aso ae faateia i laua i se tala fou fiafia.
“Pe lua te fia matamata la i le faatagata o le agelu o Moronae o tuu i le tumutumu o le malumalu?” Na fesili atu ai tina. O aiga o e na galulue i le galuega sa valaaulia uma e matamata.
Sa faigata ona talitonu i ai Gioele ma Michele. Sa matuai fiafia lava i laua!
O le taeao na sosoo ai na ofu ai o la ofutino papae ma fusiua. Sa latou savavali faataamilo i le malumalu faatasi ma isi aiga. Sa mafai foi ona pue se la ata faatasi ma le agelu auro o Moronae. Sa maoae le tele!
Ona amata lea ona siitia e le aufaigaluega le faatagata. Sa matamata Gioele i le siligi lapoa o sii faaeteete atu le agelu o Moronae i luga o se tasi o tumutumu. Sa uu faatamilo se mea pue ata faalele i le ea i le pueina o le ata. Sa matuai seki lava!
Sa mafaufau Gioele e uiga i tagata uma e mafai ona aoao e uiga i le Ekalesia e ala i le asiasi i laueleele o le malumalu. Sa ia mafaufau i le tele o tagata o le a faaipoipo iina ma tagata o le a papatisoina e sui mo e ua maliliu.
“O lea la ua foliga e pei o se malumalu,” na ia tau atu ai i lona uso. Sa ataata Michele ma lue lona ulu.
Sa lagona e le auso le fiafia. Sa fiafia i laua e o i totonu o le malumalu i se taimi o lata mai! Sa tuputupu ae faatasi a la molimau faatasi ma le fale. ●