Ang Imong MTC nga Kasinatian
Gusto ka og talagsaon nga misyon? Ang missionary training center motudlo kanimo kon unsaon.
Hunahunaa nga karong adlawa nadawat na nimo sa katapusan ang imong mission call. Ang imong assignment maglakip og usa ka piho nga dapit, pinulongan sa misyon, ug petsa sa pagsugod. Ug nianang petsaha, malagmit mo-report ka ngadto sa usa sa 13 ka missionary training center (MTCs) sa tibuok kalibutan.
Sama sa unsa kaha ang imong kasinatian sa MTC? Atong susihon.
Ang Imong Unang Adlaw
Gawas kon nagpuyo ka nga duol ra sa MTC aron mo-drayb didto, han-ayon sa Simbahan ang imong pagbiyahe.
Sa MTC sa Provo, Utah, USA, ang mga misyonaryo ug mga kawani mogiya kanimo ngadto sa usa ka linya sa parkinganan diin manamilit ka sa pamilya, makighimamat sa tig-abi-abi nga mga misyonaryo, ug dayon mosulod. Ang tig-abi-abi nga mga misyonaryo—mga misyonaryo nga anaa na sa MTC sulod sa pipila ka semana—mao ang inyong mga giya sa inyong pag-abut. Siguroon nila nga ang inyong mga bag moabut ngadto sa inyong puy-anan samtang modawat kamo sa inyong name tag ug mangita sa inyong klasehanan.
“Ang tanan maayo kaayo. Bisan og anaa sila sa imong district o misyonaryo nga sulagma lang nimong nasugatan, ang tanan andam nga motabang kanimo,” miingon si Sister Hanks, usa sa siyam ka mga misyonaryo nga among giinterbyu sa Provo MTC kinsa nagkat-on og Mandarin Chinese. Ang mga misyonaryo gikan sa iyang district moserbisyo sa Taiwan, Canada, ug California, USA.
Miingon si Sister Prestwich, “Mao na ang pinakanindot, ang masayud nga sa katapusan ania na ka ug mahimo na nga mobuhat niining talagsaong butang nga nasayud ka nga gihangyo ka sa pagbuhat.”
Imong Unang Klase
Sa imong pagsulod sa MTC, magsugod dayon ang pagkat-on. Sa imong unang adlaw, mosulod ka sa inyong klasehanan ug magsugod sa pagkat-on ug pagpraktis kon unsaon sa pagtudlo sa ebanghelyo.
Miingon si Sister Singleton, “Misulod mi sa among klasehanan ug ang tanan nga mas magulang nga mga tawo sa among zone nagsulti og Ininsek ug ang among mga magtutudlo nagsulti og Ininsek.”
Miingon si Elder Adams, “Nagkinahanglan kini og panahon, apan sa dihang mosugod na ka sa pagsabut, makakat-on unsaon sa pagtuon sa epektibong paagi, mopaspas ang imong pagkat-on. Positibo gayud nga proseso sa paglambo samtang magkat-on ka.”
Ang kurikulum sa pagbansay managsama gayud sa tanang MTC. Sa gagmay nga mga MTC, interbyuhon ka, tudloan, ug makig-istorya sa makadaghan sa presidente sa MTC ug sa iyang asawa. Kon ang mga sakop sa Korum sa Napulog Duha ka mga Apostoles mohatag og pakigpulong sa debosyonal sa Provo MTC, isibya kini ngadto sa ubang mga MTC.
Ang Imong Bag-o nga Branch
Sa dagko nga mga MTC, ang mga misyonaryo i-assign sa usa ka branch nga adunay kapangulohan sa branch (lokal nga mga naghupot sa Melchizedek Priesthood nga gitawag sa pagserbisyo diha sa MTC). Mag-abut sila sa ilang branch para sa sakrament miting ma-Dominggo. Sa gagmay nga mga MTC, ang mga misyonaryo mag-abut ubos sa direksyon sa kapangulohan sa MTC.
Sa dagko nga mga MTC, ang matag misyonaryo i-assign sa usa ka zone nga gilangkuban og pipila ka mga district. Mao kini ang sama nga organisasyon nga masinati sa mga misyonaryo sa natad sa misyon. Diha sa MTC, ang mga district tingali adunay mga duha ka managkompanyon, o tingali kini adunay lima o unom. Ang mga zone langkuban og mga duha ka district o tunga sa dosena. Ang organisasyon motabang sa pagbansay ug pagkat-on. Ang mga kapangulohan sa MTC ug mga kapangulohan sa branch ug ang ilang mga asawa mohatag usab og tambag ug suporta sa mga misyonaryo samtang nagpahiangay sila sa kinabuhing misyonaryo.
Ang Imong Sinemana nga Buluhaton
Ang mga misyonaryo matulog sa mga kwarto nga giambitan nila sa ilang mga kompanyon ug ubang mga misyonaryo—kasagaran upat sa usa ka kwarto. Matag adlaw, aduna silay panahon sa pag-ehersisyo (gawas sa Dominggo), panahon sa pagplano, ug panahon sa pagkaon. Kasagaran sa ilang panahon igahin diha sa klasehanan, diin modawat sila og pagbansay bahin sa doktrina sa ebanghelyo, pinulongan (kon gikinahanglan), ug unsaon sa pagpangita og mga tawo nga katudloan, unsaon sa pagtudlo pinaagi sa Espiritu, ug unsaon sa pagplano sa ilang panahon. Kini nga pagbansay mao ang nag-unang katuyoan sa MTC—sa pagpalambo sa imong pagsabut sa ebanghelyo ug sa pagkat-on unsaon sa pagpaambit sa epektibong paagi ang mensahe sa ebanghelyo ngadto sa uban. Ang imong mga magtutudlo mao ang miuli na nga mga misyonaryo kinsa nasayud unsaon sa pagtabang kanimo sa pagpalambo sa misyonaryo nga mga kahanas nga imong gikinahanglan. Ang inadlaw nga iskedyul lisud apan magantihon.
Miingon si Elder Jackson, “Sa wala pa ko moabut dinhi, nagtuo ko nga kini tingali lisud, medyo makaguol. Apan makalingaw gayud kini nga kasinatian. Alegre kaayo. Nalingaw kami ug nagtrabaho og maayo.”
Ang mga misyonaryo may mga oportunidad usab sa pagserbisyo ug usa ka adlaw sa pagpangandam. Kini nga adlaw naghatag kanila og panahon sa pagpanglaba, pagpanglimpyo sa ilang mga lawak, ug pagsulat ngadto sa panimalay. Panahon usab kini nga ang mga misyonaryo makabisita sa templo.
Sa mga Dominggo ang mga misyonaryo mosimba uban sa ilang kaubang mga misyonaryo. Mahimong dapiton sila sa pagpamulong diha sa miting sa sakrament ug sa pagtudlo sa mga miting sa priesthood o Relief Society. Ang mga elder moapil sa pagpanalangin ug pagpasa sa sakrament. Gawas sa regular nga mga miting sa Simbahan, ang mga misyonaryo moapil usab sa mga miting sa district, interbyuhon sa ilang kapangulohan sa branch o MTC, motan-aw og media sa Simbahan, mag-istoryahanay sa ilang kompanyon, ug mohimo og personal nga pagtuon. Ang mga misyonaryo nga i-assign sa pagserbisyo isip mga zone leader, mga district leader, ug mga sister training leader adunay mga pagbansay usab sa pagpangulo ma-Dominggo.
Samtang nakalatid na ang kadaghanan sa inadlaw nga iskedyul sa mga misyonaryo, aduna usab silay libre nga oras. Miingon si Sister Hanks nga gibati niya nga responsable nga tarungon sa paggamit ang iyang oras: “Ikaw ang mopili kon unsaon nimo sa paggamit ang imong oras. Depende na nimo unsaon nimo sa paggamit ang oras sa Dios.”
Ang Imong Unang Kompanyon
Ang pagpahiangay ngadto sa kinabuhing misyonaryo mahimong lisud—mingawon sa balay, mokaon og lahi nga pagkaon, adunay lisud nga kasinatian sa pagkat-on. Ang usa ka maayo nga kapanguhaan mao ang publikasyon sa Simbahan nga Pag-adjust sa Kinabuhing Misyonaryo, nga giimprinta, anaa sa online sa LDS.org, ug sa Gospel Library app.
Usa sa pinakadako nga pagpahiangay sa kinabuhi isip misyonaryo mao ang pagkaadunay kompanyon uban kanimo sa tanang panahon. Tingali gikan siya sa lahi nga nasud, mosulti og lahi nga pinulongan, o adunay lahi nga panglantaw sa pagdungan og himo sa misyonaryo nga buhat. Ang mga misyonaryo kinahanglang makat-on nga mahimong komportable sa paggahin og dako kaayong panahon uban sa laing tawo. Ug kinahanglan nilang makat-on unsaon sa pagtudlo nga magkauban. Mihinumdom si Elder Juilfs, “Aduna kami usa ka leksyon nga lisud gyud kaayo. Managlahi ang among mga ideya ug naningkamot sa pagkab-ot og managlahi nga mga tumong. Apan among nakat-unan kon unsa ka importante nga motudlo isip managkompanyon ug tugutan nga mahiusa ang mga ideya.”
Unsaon nimo sa paghimo niana nga matang sa pagpahiangay? Uban sa gugma, pagpaubos, ug komunikasyon. Sama sa gipasabut ni Elder Lee, “Adunay mga miting tali sa managkompanyon diin mogahin kamo og panahon sa pagribyu sa adlaw o semana aron makasabut sa imong kompanyon, unsaon niya sa pagbuhat ang mga butang, ug ipahimutang ang imong kaugalingon aron makatabang ka sa laing tawo ug magdungan kamo sa paglambo.”
Samtang maningkamot ka sa pagserbisyo ug sa pagpakita og kamabination ngadto sa imong kompanyon, makat-unan usab nimo ang gahum sa panaghiusa. Miingon si Elder Shaw, “Kinahanglan nimong kalimtan og gamay ang imong personal nga mga tinguha, tutokan ang inyong panagkompanyon isip usa ka team. Sa higayon nga maangkon ninyo kana nga panaghiusa, gamhanan kaayo kini, ug talagsaon kaayo kini.”
Tingali Mingawon Ka sa Inyong Panimalay
Isip bag-ong misyonaryo sa MTC, tingali lisuran ka sa kakapoy sa trabaho ug sa pagkahimong layo sa panimalay. Miingon si Sister Saliva, “Normal lang nga mingawon ka sa unang pipila ka adlaw. Apan maarang-arang ra kini kay makakaplag kita og kahupayan diha sa usag usa, ug ang atong mga lider mohupay kanato. Ang pagtutok diha sa pagtuon nakatabang kanako. Gimingaw gihapon ko sa akong pamilya, apan nakatutok ko sa pagtrabaho.”
Normal lang nga mobati og kakapoy, ug normal lang nga mobati og kalagsik ug kaluya. Miingon si Elder Juilfs, “Makaangkon ka og pipila ka maayo, malipayong mga adlaw, ug sa bisan unsang rason, usahay mobati ka og kaguol. Apan kinahanglan lang nga sulayan nimo sa pagkonsiderar ang sitwasyon ug mohinumdom: ‘Wala ako magkat-on niini alang kanako; nagkat-on ako niini alang niadtong akong tudloan. Basta maningkamot lang ko sa akong labing maayo, makakat-on ako niini.’”
Apan adunay nindot kaayo nga sistema sa pagsuporta, lakip sa mga tigbansay, mga lider, ug sa imong kompanyon. Miingon si Sister Singleton, “Usa ka higayon nawad-an gyud ko og kadasig sa usa ka leksyon, ug medyo gikapoy sa sitwasyon. Apan nakigsulti ko sa akong kompanyon, ug naglakaw-lakaw mi. Kana ang nakatabang nako—istoryahan kini, hilakan og gamay. Ang pagtutok sa trabaho ug pagbaton og positibo nga kinaiya—makatabang kaayo kana.”
Mobiya Ka nga Andam
Bisan unsa pa ang imong personal nga mga kahimtang, kon moanha ka sa MTC nga bukas ang kasingkasing ug andam nga makat-on, mosalig sa Ginoo nga mosuporta kanimo, ang MTC mamahimong gamhanang dapit sa pagbansay alang sa imong misyonaryo nga pagserbisyo. Ang imong pagpamatuod malig-on, makakat-on ka sa pagpalambo og mga relasyon ug gugma sa mga tawo nga imong tudloan ug niadtong imong kauban sa pagserbisyo, ug makakat-on ka sa pinulongan sa Espiritu. Mapalig-on usab nimo ang imong panabut sa ebanghelyo ug makakat-on unsaon sa pagtudlo niini sa mas epektibong paagi ug unsaon sa pagpahiangay sa lain-laing mga kahimtang ug mga hagit. Kon moabut na ang panahon nga mobiya ka alang sa imong misyon, makabaton ka og mas dakong pagsalig sa imong kaugalingon ug sa Ginoo.