Usa ka Sulat gikan sa Propeta
Kelly Santos Figueiredo Ribeiro
Goiás, Brazil
Paghulagway pinaagi ni Chris Lyons
Nagduha-duha ko nga magpasakop sa Simbahan dihang ang akong bana mipaila niini kanako. Iya kong gihatagan og Basahon ni Mormon, ug human sa daghang mga leksyon ug hapit duha ka tuig nga pakigtrabaho sa mga misyonaryo, nabunyagan ko niadtong 2007. Nanlimbasug ko sulod sa usa ka panahon human ko namiyembro sa Simbahan. Wala ko makasabut sa kaimportante sa mga propeta sa bag-ong panahon. Sa akong hunahuna, ang usa ka propeta kinahanglan nga sama kang Moises uban sa iyang sungkod.
“Makigsulti ba ang propeta sa Dios?” Gipangutana nako ang akong bana.
“Oo,” miingon siya.
“Sigurado ka?”
“Oo, ang propeta makigsulti sa Dios.”
“Nan mohangyo ko sa Ginoo nga sultihan ang propeta sa pagpadala kanako og sulat nga nag-ingon nga kini mao ang Simbahan ni Jesukristo.”
“Oy dili!” miingon ang akong bana. “Dili ingon niana!”
Determinado ko.
“Kon makigsulti ang propeta sa Ginoo, nan ang Ginoo makigsulti sa propeta, ug mopadala siya og sulat kanako.”
Sa simbahan usa ka Dominggo, usa ka misyonaryo mihatag kanako og DVD ug mihangyo kanako sa pagtan-aw niini uban sa akong pamilya. Anaa niini ang mga pagpamatuod sa mga propeta ug mga apostoles. Ang unang tawo nga namulong mao si Presidente Gordon B. Hinckley (1910–2008). Nakadayeg ako. Daw sinsero siya, ug gibati nako nga nagsulti siya sa kamatuoran.
“Tan-awa, mao kini ang imong pagpamatuod sa propeta,” miingon ang akong bana.
“Dili, gusto gihapon ko og sulat gikan niya,” mitubag ko.
Usa ka gabii, ang mga misyonaryo miabut sa among panimalay ug mihatag kanako og magasin.
“Wala mi kahibalo ngano, apan gibati namo nga kinahanglang amo kining dad-on kanimo,” miingon sila. Usa kadto ka kopya sa Oktubre 2006 nga Liahona, giputos pa og plastic.
Giablihan nako kini ug nakita ang usa ka artikulo gikan ni Presidente Hinckley nga namulong ngadto sa bag-ong mga miyembro sa Simbahan. Miingon siya, “Akong ibilin kini nga pagpamatuod, akong panalangin, ug akong gugma sa matag usa kaninyo ug ang akong pagdapit nga ipadayon ang pagkahimong kabahin niining talagsaon nga ulahing adlaw nga milagro nga mao Ang Simbahan ni Jesukristo sa mga Santos sa Ulahing mga Adlaw.”1
Gibati nako nga direkta siyang namulong kanako. Dili pa gani ko miyembro sa Simbahan sa dihang gimantala kini, apan gitipigan kini alang nako. Nasayud ko nga ang Ginoo modungog sa atong mga pag-ampo ug nga Siya mamulong ngadto sa usa ka buhing propeta karon.