Sa Digital Lamang
Wala Ka Mahibalo sa Unsay Wala Nimo Mahibaloi
Kon pwede pa lang kitang maminaw nga walay paningkamot sa pag-usab sa hunahuna sa usa ka tawo, nagtuo kong masurprisa kita kon unsay atong makat-unan.
Sa nagkolehiyo pa ko, miadto ko sa gawas sa nasud sa United Kingdom sa pag-eskwela. Niadtong higayuna, naglisud gyud ko nga mobati nga duol sa Langitnong Amahan. Moadto ko sa mga miting sa sakrament ug sa simbahan matag Dominggo, ug moadto ko sa mga misa sa Katoliko ug sa matahum, hilum nga miting sa Quaker. Sa kasagaran moadto ko sa Evenson, usa ka matahum nga choral service sa Anglican. Nagpangita ako og bisan unsang dapit diin mobati ko og kalinaw. Mobasa ko og mga basahon sa pag-ampo diha sa mga katedral ug mamulong sa Apostles’ Creed uban sa mga tawo kinsang mga gituohan, sa daghang paagi, poparehas gayud sa akoa. Ug akong nakaplagan og balik ang Dios.
Akong gibati ang tumang paghigugma ug kamatuoran niadtong mga dapita. Ang mensahe nga akong nadawat mao nga kon nahigugma ang Dios sa tanan Niyang mga anak igo nga mahatagan sila og daghang kamatuoran ug katahum, niana Siya nahigugma ug nakaila usab kanako.
Mao kini ang usa sa paborito nakong piraso sa atong doktrina, sa tinuod, nga ang Dios mohatag sa kamatuoran ngadto sa tanan Niyang mga anak ug kini adunay kamatuoran nga ikapaambit kanato (tan-awa sa 2 Nephi 29:7–13). Sa atong simbahan naghisgot kita mahitungod sa pagbaton og “kahingpitan sa ebanghelyo.” Apan wala kana magpasabut nga nahibalo kita sa tanan, ug dili lamang kita ang adunay mga tubag. Si Elder Neal A. Maxwell (1926–2004) sa Korum sa Napulog Duha ka mga Apostoles misulti niini sa matahum nga paagi: “Si [Jesukristo] buhi karon, sa manggiloy-ong paagi mihatag sa tanang kanasuran kutob sa kahayag nga ilang madawat ug ilang kaugalingon nga mga mensahero nga motudlo kanila. (Tan-awa sa Alma 29:8.)”1
Ug dili lamang kini relihiyusong kamatuoran nga gihatag sa Dios sa Iyang mga anak. Sama sa gipasabut ni Presidente Russell M. Nelson, “Motumaw man ang kamatuoran gikan sa siyentipikong laboratoryo o sa pagpadayag, ang tanang kamatuoran naggikan sa Dios. Ang tanang kamatuoran kabahin sa ebanghelyo ni Jesukristo.”2
Akong nakita kana nga kahayag sa kamatuoran sa daghan kaayong mga basahon ug katawhan ug mga dapit—samtang nagtan-aw sa mga basahon sa art, mibisita ug mga mosque, naminaw og mga pakigpulong sa mga scientist, nagboluntaryo kauban sa mga maduha-duhaon. Tanan sila adunay mga kamatuoran nga ikatudlo kanako—unsaon nga matagad og maayo ang uban, sa pagka mas mabination sa akong mga pangagpas; sa laing pulong, nakatudlo sila kanako og mga paagi sa pagsunod kang Jesukristo. Apan kinahanglang atua ako didto—bisan og dili kini pamilyar—ug kinahanglan kong maminaw.
Mahitungod man kini sa relihiyon o politika o estilo sa kinabuhi, saba ang atong kalibutan, ug kasagaran gibombahan kita og mga mensahe gikan sa mga tawo kinsa nakasiguro nga eksakto sila ug gani dili na makombinser sa uban. Usahay kita kanang mga tawhana. Si Elder Quentin L. Cook sa Korum sa Napulog Duha ka mga Apostoles miingon, “Ang mikuyanap nga pagkadaut sa matinahurong komunikasyon … makapabalaka. Ang mahangturong baruganan sa kabubut-on nagkinahanglan nga kita motahud sa daghang kapilian diin wala kita magkauyon.”3
Nasayud kita nga mabalak-on usab ang Manluluwas bahin niini. Usa sa nag-unang mga butang nga Iyang gitudlo diha sa Basahon ni Mormon sa Iyang pagbisita sa mga Nephite mao nga “kini dili mao ang [Iyang] doktrina, ang pagkutaw sa mga kasingkasing sa mga tawo sa kasuko, usa batok sa usa.” Angay kitang magpalayo sa ingon nianang mga butanga. (Tan-awa sa 3 Nephi 11:29–30.)
Kon kita makadungog gayud og tawo ug mosulay sa pagsabut sa ilang gihunahuna o gibati, kon kita makapaminaw lamang, nga dili mosulay sa pag-usab sa hunahuna sa usa ka tawo, sa akong pagtuo masurprisa kita kon unsay atong posibling makat-unan. Makakaplag kita og dugang nga simpatiya ug respeto sa ilang panan-aw o opinyon, o pinakaminos dili sila kaligutgutan tungod niini. Gani posibling makakat-on pa kita og bag-ong kamatuoran nga ikadugang sa kaugalingon natong panabut. O makadiskubre nga nakigbahin diay kita sa sama nga kamatuoran. Ang yawe mao ang pagpaubos—ug pagdawat nga kita makakat-on gikan sa uban.
Dunay gipapilit nga mubo nga sulat sa akong lamesa nga nag-ingon, “Wala ka mahibalo sa unsay wala nimo mahibaloi.” Anaa kini nga nagpahinumdom kanako lapas sa kaugalingon nakong kasinatian, nga una sa tanan ako ignorante. Naghimo kini kanako nga mapaubsanon; Hinaot nga nagsilbi kini.
Anaa usab kini aron sa pagpahinumdom kanako nga dili magpabiling ignorante—nga ako diay adunay responsibilidad nga padayong magkat-on ug maminaw ug magpangita sa kamatuoran, bisan og kana nga kamatuoran naggikan sa dili pamilyar nga mga butang. Ang Langitnong Amahan dunay daghang ikahatag kanato, kon kita maminaw.