Mga Young Adult

Panahon sa Pagserbisyo

Ni Liz Stitt

Ang tagsulat nagpuyo sa Utah, USA.

Isip mga young adult, tingali aduna kitay mas daghang “sobra” nga panahon kay sa gusto natong angkonon. Ania ang unom ka mga sugyot kon unsaon ninyo nga madugangan ang gidaghanon sa mga tawo nga inyong maimpluwensyahan pinaagi sa pagserbisyo.

young adult pushing out of circle

Pipila ka tuig ang milabay, full-time ko nga nagtrabaho ug naghuman og panggabii nga programa aron maangkon ang akong degree sa Master of Business Administration. Sa dihang nahuman ko sa akong MBA, gusto nakong gamiton kanang “sobra” nga panahon nga mas makahuluganon.

Ang tambag sa usa ka kasaligan nga propesor yano ug klaro—kinahanglan nakong mangita og mga oportunidad sa pagserbisyo. Samtang nasayud siya sa akong mga responsibilidad sa Simbahan, misugyot siya nga mangita ko lapas pa sa grupo sa mga tawo nga kasagaran nakong maserbisyuhan.

Misugod ko sa mainampoong pagsiksik aron masayud asa gikinahanglan ang akong mga kahanas ug mga talento ug asa ako makahimo sa labing maayo. Sa wala madugay gigiyahan ko ngadto sa usa ka sentro sa komunidad nga nagkinahanglan og mga tigtudlo alang sa ilang programa sa kabatan-onan. Misugod ko sa pagtudlo og usa ka tin-edyer nga babaye kansang pamilya mibiya sa Somalia isip mga refugee. Matag semana magpraktis kami sa mga kahanas sa pagbasa, pagsulat, ug matematika. Apan lapas pa niana, nakapalambo kami og panaghigalaay ug nakakat-on mahitungod sa mga kultura sa usag usa ug mga pangandoy alang sa umaabut. Sa dihang mibalhin siya, gi-assign ko sa laing babaye. Ang iyang pamilya milayas sa Myanmar, ug gipadako siya diha sa usa ka refugee camp sa Thailand. Uban sa pagtuon, naghisgut usab kami sa mga hagit sa kinabuhi ug unsaon sa pagsagubang niini.

Nakakaplag pa ko og daghang mga oportunidad nga magamit ang akong mga kahanas sa lain-laing paagi ug moserbisyo sa komunidad.

Daghan kanato nga mga single adult makakaplag nga aduna kitay mag-usab-usab nga mga panginahanglan sa atong panahon tungod sa pagbalhin, paggradwar, o kausaban sa trabaho, lakip sa uban. Kasagaran, makadawat kita og pag-aghat gikan sa Espiritu nga ang mga tuig nga dili pa kita minyo dili lang “panahon nga maghulat.” Mobati kita og panginahanglan sa pagpalambo og dugang nga katuyoan ug kahulugan.

Tingali aduna kitay mas daghang “sobra” nga panahon kay sa gusto natong angkonon, mao nga ang paggahin og gamayng panahon aron makita kon unsaon nato sa paggamit niana nga panahon sa pag-awhag sa uban mahimong usa ka panalangin ngadto sa uban ingon man sa atong kaugalingon. Tutal, ang pagserbisyo sa uban mao ang paagi nga atong mapakita ang atong gugma sa Dios ug matuman ang atong mga pakigsaad nga atong ihatag ang atong tanan ngadto Kaniya.

Sa ubos mao ang pipila ka mga sugyot aron madugangan ang mga tawo nga inyong maimpluwensyahan:

1. Timbang-timbanga ang inyong panahon. Paggamit og notebook o planner aron masubay giunsa ninyo paggahin ang inyong panahon. Aduna ba kamoy pipila ka sobra nga mga oras nga wala maplanohi o nausik nga panahon? O gipabug-atan ra ba ninyo ang inyong kaugalingon sa kadaghan sa buluhaton? Importante nga makasabut kon asa kamo adunay sobra nga panahon ingon man nga makasabut kon asa kamo angay nga moplano og mas diyutay nga kalihokan. Hatagi og prayoridad ang pinakaimportante ug pagplano og panahon sa pagserbisyo.

2. Timbang-timbanga ang inyong mga kahanas. Hunahunaa kon unsay gusto ninyong buhaton o unsay gibati ninyo nga kinahanglang buhaton. Ikonsiderar ang mga pamaagi nga magamit ninyo ang inyong mga talento ug mga kahanas sa pagpanalangin sa uban.

3. Mag-ampo. Pangayo og langitnong giya aron magiyahan kon asa kamo gikinahanglan. Si Elder Jeffrey R. Holland sa Korum sa Napulog Duha ka mga Apostoles miingon, “Nasayud ko nga … ang Dios … motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato” (“Dili Ba Kitang Tanan Makililimos?” Liahona, Nob. 2014, 41).

4. Buhata ang mga butang nga dili ninyo komportableng buhaton. Samtang nagtudlo, sa sinugdanan dili ko komportable nga motrabaho uban sa mga tin-edyer o sa pagtudlo sa tanan nga mga hilisgutan. Apan usahay ang akong labing importante nga trabaho mao ang paghatag og pagdasig ug pag-awhag. Dili kinahanglang hingpit kita nga mihaum aron makahimo og kalainan. Kasagaran, ang atong dakong epekto mao ang pagkaanaa, pagpaminaw, ug pagtukod og malungtarong relasyon sa pagsalig ug kalig-on.

5. Paghimo og makanunayong paningkamot. Daghang mga organisasyon o mga tawo nagkinahanglan og makanunayon ug regular nga mga paningkamot sa pagboluntaryo—usa ka butang nga labaw pa sa temporaryong proyekto o hapiton lang.

6. Magmapailubon. Usahay maghunahuna ko, “wala ko masayud kon makapadayon ko sa pagbuhat niini. Kapoy kaayo. Nakahimo ba ko og kaayohan?” Apan sa higayon nga magsugod ko sa pagtabang, mausab ang akong kasingkasing. Talagsa ra kaayo nga mibiya ko sa usa ka oportunidad sa pagserbisyo nga wala mobati nga mas maayo ug madasigon nga mobalik. Hinoon, kon ang oportunidad lisud kaayo, ikonsiderar ang ubang mga oportunidad o pangayo og gamayng panahon nga “mopahulay” sa pagboluntaryo aron mahatag ninyo ang unsay gikinahanglan.

Si Liz Stitt migradwar sa Brigham Young University nga adunay bachelor’s degree sa communications ug gikan sa University of Utah nga adunay MBA. Nagtrabaho siya diha sa pagdumala og produkto [product management], apan ang iyang paborito nga trabaho mao ang pagka-propesyonal nga iyaan.