Tovolea, Tovolea, Tovolea
Mai vei Peresitedi Henry B. Eyring
iKarua ni Daunivakasala ena Mataveiliutaki Taumada
Na iVakabula sa biuta na Yacana e yalomuni. O ni sa vakila tiko na loloma savasava i Karisito ena vukudra na tani kei na vukumu.
Kemuni na taciqu kei na ganequ, au vakavinavinaka ena madigi meu vosa vei kemuni. Sa veilaveti ka veivakatataki cake vei au na koniferedi oqo. Na Yalo Tabu sa kauta ki yaloda na sere e lagati kei na vosa e cavuti. Au masuta me na kauta yani vei kemuni na veika au tukuna na Yalo vata oya.
Ena vicavata na yabaki sa oti au a nona imatai ni daunivakasala e dua na peresitedi ni tikina ena tokalau kei Amerika. E vakavica, ni keirau gole tiko ki na neirau veitabana lailai, a kaya vei au, “Hal, ni o sotava e dua na tamata, qaravi koya me vaka e sotava tiko e dua na leqa bibi, ena vuqa na gauna ena donu na nomu nanuma.” E sega walega ni dina o koya, ia au sa vulica ni toso na veiyabaki ni sa rui lailai nona ivakatautauvata. Nikua au gadreva meu vakayaloqaqataki kemuni ena leqa o ni dau sotava.
Na bula oqo e nakita e dua na Kalou dau loloma me veivakatovolei ka ivurevure ni tubu vei keda yadua. O ni nanuma nona vosa na Kalou me baleti ira na Luvena ena Buli ni vuravura: “Io, meda vakatovolei ira mada kina, era na muria na veika kece sa vakarota vei ira na Turaga na nodra Kalou se sega.”1
Mai na ivakatekivu a sega ni rawarawa na veivakatovolei. Eda sotava na veivakatovolei ka vu mai ena noda mai vakayago. Eda bula kece tiko ena dua na vuravura sa kaukauwa cake tikoga na nona valuta tiko o Setani na dina kei na noda bulamarau yadua. E rawa ni vaka vei iko ni sa tubu cake tikoga na yavavala e vuravura kei na nomu bula.
Oqo na noqu veivakadeitaki: na Kalou dau loloma a vakatara vei iko na veivakatovolei oqo sa bulia talega e dua na ivakarau dei mo lako siviti ira kina. Sa rui lomani keda na Kalou ka tala mai kina na Luvena e Duabau Ga me vukei keda.2 Sa solia na Nona bula na Luvena o Jisu Karisito ena vukuda. A colata o Jisu Karisito na bibi ni noda ivalavala ca taucoko mai Kecisemani kei na kauveilatai. A sotava na yaluma, na mosi, kei na revurevu ni noda ivalavala ca me rawa ni solia vei keda na vakacegu ka vakaukauwataki keda mai na veivakatovolei kecega ni bula.3
O ni nanuma tiko na veika e tukuna na Turaga vei ira Nona italai:
“Keirau sa duabau kei Tamaqu. Au sa tu vei Tamaqu ka sa tu vei au ko Tamaqu; ia ni dou sa ciqomi au, dou sa tu kina vei au kau sa tu vei kemudou.
“Ia, Au sa tu ena kemudou maliwa, ka sai Au na ivakatawa vinaka, ka uluvatu kei Isireli. O koya sa tara cake ena uluvatu oqo ena sega sara ni bale.”4
Na noda parofita, o Peresitedi Russell M. Nelson, sa solia talega na veivakadeitaki oqori sa vakamacalataka e dua na sala me da tara cake ena uluvatu oya ka biuta na yaca ni Turaga e yaloda me tuberi keda ni da vakatovolei.
E kaya o koya: “Vei kemuni o ni dau yalolailai ena so na gauna, nanuma tiko, a sega ni nakiti me rawarawa na bula. Me colati na veivakatovolei ka vosoti na rarawa ena ilakolako. Me vaka o ni nanuma ‘ni na sega ni dredre vua na Kalou e dua na ka’ (Luke 1:37), mo kila ni o Koya na Tamamu. O iko e dua na luvena tagane se yalewa ka buli me ucui Koya, sa dodonu ena nomu bula kilikili mo ciqoma na ivakatakila me vukei iko ena nomu sasaga dodonu. Mo taura na yacana savasava na Turaga. E rawa ni o vakadonui mo vosa ena yacana tabu na Kalou (raica na V&V 1:20).”5
Nona vosa o Peresitedi Nelson e vakananuma vei keda na yalayala ena masu ni sakaramede, na yalayala ena vakayacora o Tamada Vakalomalagi ni da cakava na veika eda yalataka.
Oi kemuni na Kalou, “na Tamai keimami Tawamudu, keimami sa kerei kemuni ena yaca ni Luvemuni, ko Jisu Karisito, mo ni vakalougatataka ka vakatabuya na madrai oqo ki yalodra o ira kece era sa vakaivotavota kina, me ra kania ka vakananuma kina na yago ni Luvemuni, ka vakadinadinataka vei kemuni, na Kalou, na Tamai keimami Tawamudu, ni sa lomadra me ra taura na yaca ni Luvemuni, ka dau nanumi koya tiko ga, ka muria na nona ivakaro sa solia vei ira; me tiko ga kina kei ira na Yalona. Emeni.”6
Ena veigauna ni da cavuta na emeni ni cabori na masu oya ena vukuda, eda sa yalataka ni da vakaivotavota ena madrai sa lomada me da taura na yacana tabu o Jisu Karisito, dau nanumi Koya tikoga, ka muria Nona ivakaro. Ka sa yalataka o Koya “ni na tiko ga vata kei keda na Yalona.” Ena vuku ni yalayala eso oqori, na iVakabula sai koya na uluvatu eda rawa ni taqomaki tu kina ka sega ni rere ena cava kecega eda sotava.
Niu sa vakananuma titobu na vosa ni veiyalayalati kei na kena veivakalougatataki yalataki, au vakataroga na cava na kena ibalebale ni sa lomada me da taura na yaca i Jisu Karisito.
E vakamacalataka o Peresitedi Dallin H. Oaks: “E bibi kina ni gauna eda vakaivotavota kina ena sakaramede eda sega ni vakadinadinataka ni da sa taura na yaca i Jisu Karisito. Eda vakadinadinataka ni sa lomada me da kitaka vakakina. (Raica na V&V 20:77.) Ni da vakadinadinataka ga ni da sa lomasoli, e tukuna ni dodonu me yaco e dua tale na ka ni se bera ni da qai taura na yaca tabu oya ena kena vakasama bibi duadua.”7
Na malanivosa ni sa “lomada me da taura” na Yacana e tukuna vei keda ni gauna eda taura taumada kina na Yacana ena noda papitaiso, na taura na Yacana e sega ni oti ga ena papitaiso. Sa dododnu me da cakacaka tikoga me da taura tiko na Yacana ena noda bula taucoko, oka kina ena noda vakavouya na veiyalayalati ena teveli ni sakaramede ka cakava na veiyalayalati ena valetabu savasava ni Turaga.
O koya sa rua kina na taro bibi sara vei keda “Na cava meu cakava tiko meu taura kina na Yacana?” vakakina “Au na kila vakacava niu sa toso tiko?”
Na malanivosa nei Peresitedi Nelson e solia e dua na isaunitaro me veivuke. E kaya o koya ni rawa ni da taura na yacana na iVakabula ka rawa ni da vosa ena Vukuna. Ni da vosa ena Vukuna, eda qaravi Koya tiko. “Me na kila vakaevei na tamata na turaga ka sega ni bau qarava, ka sega ni kilai koya, ka yawa sara mai na vakanananu kei na gagadre ni lomana?”8
Na vosa ena Vukuna e gadrevi kina na masu ni vakabauta. E gadrevi na masu yalodina vei Tamada Vakalomalagi me da kila na vosa me cavuti me vukea na iVakabula ena Nona cakacaka. Me da vakadonui ena Nona yalayala: “se mai na domoqu ga se mai na domodra na noqu tamata, e sa tautauvata ga.”5
Ia, ena sega ni rawa ni da taura na Yacana ena noda vosa walega ena Vukuna. Sa dodonu me tu e yaloda na vakanananu eso me da vakadonui me Nona italai.
E vakamacalataka na parofita o Momani na vakanananu eda na vakadonui ka rawa kina ni da taura na Yacana. Okati kina na vakabauta, inuinui, loloma cecere, sai koya na loloma savasava i Karisito
Vakamacalataka o Momani:
“Ni’u sa vakadeitaka ni dou sa vakabauti Karisito ena vuku ni nomudou yalomalua; ni kevaka dou sa sega ni vakabauti koya, sa sega ni kilikili mo dou okati ena kedra maliwa na lewe ni nona lotu.
“Oi kemudou na wekaqu lomani, au na tukuna oqo vei kemudou baleta na inuinui. Dou na rawata vakaevei na vakabauta, kevaka sa sega vei kemudou na inuinui?
“Ia na cava na ka dou vakanuinui kina? Raica au sa kaya vei kemudou, ni dou na rawata na inuinui ena vuku ni veisorovaki i Karisito kei na kaukauwa ni nona tucake tale mai na mate, mo dou vakaturi cake kina ki na bula tawamudu, ia dou sa rawata oqo ena vuku ni nomudou vakabauti koya, me vaka na vosa ni yalayala.
“O koya gona kevaka e dua sa tu vua na vakabauta, sa tu tale ga vua na inuinui; ni kevaka sa sega na vakabauta, sa sega tale ga ni rawa ni dua na inuinui.
“Ka raica, au sa kaya tale vei kemudou, ni na sega ni rawa ni tu vua na vakabauta kei na inuinui kevaka sa sega vua na yalomalua kei na yalo lokumi.
“Ia kevaka sa vakakina, sa tawayaga na nona vakabauta kei na vakanuinui, ni sa sega sara e vakadonuya na Kalou o koya ga sa yalomalua ka yalo lokomi; ia ko koya sa yalomalua ka yalo lokomi ka vakatusa ena kaukauwa ni Yalo Tabu ni sa Karisito ko Jisu, sa tu vua na loloma uasivi; ni kevaka sa sega vua na loloma uasivi, sa ka wale ga ko koya; o koya sa dodonu kina me tu vua na loloma uasivi.”
Ni vakamacalataka na loloma uasivi, a tomana o Momani ena nona kaya:
“Ia na loloma uasivi sa i koya na loloma taucoko i Karisito ka sa ia tikoga ka sega ni mudu; ka na vinaka vei koya sa kunei ni sa tu vua ena siga mai muri.
“O koya oqo oi kemudou na wekaqu lomani, mo dou masuta na Tamada ena yalomudou taucoko me vakasinaiti kemudou ena loloma oqo, ka sa solia vei ira era sa muria na Luvena ko Jisu Karisito ena yalodina; mo dou yaco kina mo dou luve ni Kalou; ia ni sa rairai mai ko koya, eda na tautauvata kaya, ni da na raica na matana dina; me da rawata na inuinui oqo ka vakasavasavataki me vaka sa savasava ko koya. Emeni.”10
Na noqu ivakadinadina ni iVakabula sa biuta tiko na Yacana e yalomuni. E vuqa vei kemuni, sa levu cake tiko nomuni vakabauti Koya. O ni sa vakila vakalevu na inuinui kei na nanamaki. O ni sa vakila tiko na loloma savasava i Karisito ena vukudra na tani kei na vukumu.
Au raica vei ira na noda daukaulotu era veiqaravi tu e vuravura raraba. Au raica vei ira na itokani kei ira na lewe ni matavuvale o ira na lewenilotu baleta na Lotu i Jisu Karisito ni Yalododonu Edaidai. Era sa veiqaravi tiko vei ira na nodra itokani na tagane, yalewa, itabagone, kei ira mada ga na gonelalai, ena nodra lomana na iVakabula kei ira na wekadra.
Ni rogoci ga na itukutuku ni leqa tubukoso e veiyasai vuravura, era sa nakinaki na lewenilotu me ia na veivueti, so na gauna e kosovi na veiwasawasa, era sega ni kerei. Ena so na gauna sa dau dredre nodra waraka me rawa ni ciqomi ira na vanua e vakacacani.
Au kila ni so e vakarorogo tiko nikua era vakila ni uabaleti nodra vakabauta kei na inuinui mai na leqa era sotava. O ni tagica tu beka mo ni vakila na loloma.
Taciqu kei na ganequ, sa vakarautaka na Turaga na madigi eso volekati kemuni mo ni vakila ka wasea na Nona loloma. E rawa ni o masu ena yalodei me liutaki iko na Turaga mo lomana e dua ena Vukuna. E dau sauma o Koya nodra masu na yalomalua yalodina vakataki iko. O na vakila na loloma ni Kalou ena vukumu, vakakina e vukuna o koya o qarava ena Vukuna. Ni o vukei ira na luve ni Kalou ena nodra leqa, ena mamada cake na nomu leqa. Ena vaqaqacotaki nomu vakabauta kei na nomu vakanuinui.
O au na ivakadinadina bula ni dina oya. Ena dua na gauna ni bula, sa dau vosa o watiqu ena vukuna na Turaga ka qaravi ira na tamata ena Vukuna. Me vaka au sa cavuta oti eliu, a kaya vei au ena dua na gauna na neiitou bisopi, “Au sa qoroqoro. Ena veigauna au rogoca kina ni sotava na leqa e dua ena tabanalevu, au dau vakatotolo meu veivuke. Ia ena gauna au yaco yani kina, e vaka ni sa dau tu oti mai kina na watimu.” Sa dau vaka tu kina ena veivanua kece keirau tiko kina ena 56 na yabaki.
Ena gauna oqo sa rawa ni dau cavuta e vica walega na vosa ena dua na siga. Sa dau sikovi mai vei ira a dau lomana ena vukuna na Turaga. Ena veibogi kei na mataka au dau lagasere ni lotu vata kei koya ka masu. Au dau vakarogoya na masu kei na sere. Ena so na gauna au dau raica ni cavuta na qaqa ni serenilotu. Dau taleitaka nodra sere na gonelalai. Na vakasama e dau taleitaka duadua e umani ena sere “I’m Trying to Be like Jesus.”11
Ena bogirua, ni keirau lagata oti na qaqa ni italetale ni: “Love one another as Jesus loves you (Dou veilomani me vaka sa lomani kemudou ko Jisu). Try to show kindness in all that you do (dau yalovinaka ena veika kecega),” qai kaya vakamalua, ia e matata, “Try, try, try (Tovolea, tovolea, tovolea).” Au vakabauta ni na qai kila, ena gauna sa raici Koya kina, ni sa biuta tu na noda iVakabula na Yacana e yalona ni sa yaco me vakataki Koya. Sa keveti koya tiko ena gauna oqo na iVakabula ena nona leqa, me vaka Nona na keveti iko ena nomu.
Au vakadinadinataka ni kilai iko ka lomani iko na iVakabula. E kila o Koya na yacamu me vaka nomu kila na Nona. E kila na nomu leqa. Sa sotava oti o Koya. Ena Nona Veisorovaki, sa vakamalumalumutaki vuravura kina. Ni sa lomamu mo taura na Yacana, o na colata na nodra icolacola e vuqa vakavuqa na tani. Ena yaco na gauna mo raica ni o kila vinaka cake na iVakabula ka o lomani Koya vakalevu cake. Ena tu e yalomu na Yacana ka tudei tu ena nomu vakanananu. Sai koya na yaca o na vakatokai kina. Au vakadinadinataka, ena vakavinavinaka na Nona loloma yalovinaka vei au, vei ira noqu daulomani, kei iko, ena yaca i Jisu Karisito, emeni.